人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/10/28 - 14:41

而家先嚟諗轉色?

10 月 28 日晚上於旺角彌敦道,有示威者搬出被噴有「中資?等執笠啦」的店舖圍板作為路障。

10 月 28 日晚上於旺角彌敦道,有示威者搬出被噴有「中資?等執笠啦」的店舖圍板作為路障。

從做生意嘅角度去諗,我相信大部份生意人,縱使有自己嘅政治立場,都唔會想自己被明確歸類為黃店或者藍店。雖然某個時段被同路人「懲罰」或會帶來短期利益,但長遠而言,打開門口做生意,都係唔想得罪某一個群體嘅人。盡量去食四方飯係大部份生意人嘅宗旨。

只不過,即使係呢場運動發生之前,呢個「宗旨」喺香港,就已經越嚟越唔存在了。對好多生意人嚟講,香港有太多大陸遊客,有太多大陸人嘅錢俾佢地搵。只做大陸客已經夠哂佢地食。結果養成咗乜嘢?除咗向內地人傾斜嘅產品同服務之外,最大鑊嘅,係養成咗呢啲生意人嘅傲慢,以及對非內地客嘅不屑。做生意本來就應該長期抱住危機感,任何好似好容易賺嘅錢,通常都唔會長久,並且唔穩陣。這些之前太容易賺嘅錢,讓生意人變得不可一世,甚至懶得招呼非內地嘅客戶,平日都只懂開行 turbo 去討好單一客戶來源,當形勢一變,自然死得最快。

藍店之所以讓人討厭,除咗因為某啲言論激起好多香港人嘅情緒之外,當中嘅原因,還有長久以來對本地客戶嘅傲慢態度。當佢地以為今次風波只係短時間嘅事,事情過去之後,內地貴客會重臨,所以運動初期可以企硬,點知運動一直發展,事情亦一直咁拖落去,內地客回歸無期,佢地終於發覺,呢次可能真係仆街了。依家考慮轉色?一來未必轉得嚟,二來,假使有日內地客兩返番嚟,咁今日轉咗色,將來咪冇哂啲大客?

廣告

當日上街,藍營話得二百萬人,咁香港仲有五百幾萬沉默嘅大多數。如果嗰五百萬人都真係你嘅人,其實啲生意人,又洗乜玩轉色?

咁多年嚟,都只不過係上面不斷放人落嚟去餵飽呢班生意人,根本就係另類圈養。你以為自己好識做生意賺過好多錢?到頭嚟只係有人當你廢嘅,不斷塞飽你個肚等你喪失生意人應有嘅危機感同思考能力而已。

諗吓,自己本來嘅一身好武功,係點樣被人廢咗嘅?

 

#純商業討論
#一籃子雞蛋係必死無疑

(標題為編輯所擬)

作者 Facebook