立場新聞 Stand News

致和理非

2019/11/27 — 14:03

立場新聞圖片

立場新聞圖片

區選大勝,開心左一日,出 post 賀何已完、串林鄭藍絲、自 high 嘅時間係時候告一段落。皆因對家已密鑼緊鼓進行檢討、修正、謀劃緊下年9月立法會選舉嘅策略,所以我哋都要收拾心情,繼續抗爭、備戰來年立法會選舉。

我地今次抗爭可以持續咁耐,全因勇和不割,而且好多人發揮自己所長,各司其職。勇武、哨兵、滅煙隊、文宣組、後勤組、和理非等等,萬眾一心。今次當選嘅區議員,你哋嘅席位全部都係手足用血用肉爭取返嚟,我希望你哋唔好忘記,救手足之餘札實做好地區工作。我無做過區議員,無資格亦無能力教你哋,請你哋,尤其是政治素人,虛心向有經驗嘅同路人請教,亦有很多人已發文,在此不敘。

我同大部份人一樣,有背負,只能做和理非。如果你同我一樣,請你認真看看,睇下我哋喺下年立法會選舉前有咩實質嘢可以做到,做個有骨氣嘅香港人。

廣告

1. 如果你哋屋企有老人家,阿爺阿嫲阿公阿婆仲在生,而佢哋喺獨居或者住老人院嘅話,請好好 connect 佢哋。相信大家喺直播點票時都見到,好多問題票都係個剔唔係印喺圈入面,而係各式其式印係出面、候選人張相隔離、甚至係候選人個樣上面。大家可以想像到呢 d 票係咩人投,而差不多全部呢 d 票都係投俾民建聯。呢班老人家都有共通點,就係佢哋除左貪蛇齋餅糭、福袋、枕頭之外,佢哋都唔係民建聯嘅屋企人!點解呢班老人家可以被人利用到?呢個係和理非嘅責任,問問自己今次除左一早落街投票之外,有無好好防止屋企嘅老人家被人利用。屏山北嘅羅庭輝只係輸 2 票!藍田有過百張問題選票,而馮德森只係輸 50 票!無錯,對手係會用卑鄙手段,我哋預左。但邊個令佢哋有機可乘?我哋係責無旁貸! 要檢討自己,唔好將所有責任推落人哋度。我希望大家從今日起,好好 connect 番屋企嘅老人家,就算唔教識佢哋,都唔好再俾對家利用佢哋。對家今次區選雖然輸左,但佢哋確確實實多左幾十萬票,呢 d 票每日 150 個咁落嚟,可想而知如果我哋仲唔醒覺,下年立法會選舉一定輸!

要打呢場硬仗,除左出年 9 月唔好離港,仲要check下自己同屋企人嘅資料是否正確,免被人利用!

廣告

選民資料網上查閱系統

2. 秉持實行黃色經濟圈,用經濟打擊紅色資本、藍色企業。叫你哋去前線你唔敢、叫你哋罷工你哋又未必人人做到,但至少唔該你哋爭氣 d,食飯買嘢去番黃店。我每日返工見到美心、吉野家、Starbucks 等等都仲有好多人幫襯,當然我知有好多藍絲會繼續幫襯,但如果你唔係藍絲而只係貪方便幫襯開嘅話,唔該你醒醒,俾番 d 骨氣出嚟。而家咁多 apps 俾你用,「和你 eat」,「whatsgap」,「良心 guide」等等,打開一睇已經知附近邊度有黃店,連 call 的士都有黃的台。一班手足受警暴、被人拉、被性侵、被自殺,而你仍然去幫襯藍店,其實你同助紂為虐無分別! 方便唔係一個可以埋沒良心嘅藉口,暫時嘅唔方便可以造就一個更好嘅香港,當黃色經濟圈擴大,我相信將來緊有一間黃店喺左近。

3. 我相信大部份嘅和理非同我一樣,人到中年或者差唔多踏入中年,喺事業上建立左 d 成績,有家庭有經濟負擔,或者礙於身份而只能做和理非。如果你有能力有車有樓嘅,希望你久唔久可以做下家長幫下 d 前線。如果唔得嘅,亦希望大家可以恆常咁捐錢俾星火、立場、獨媒等等機構團體,等佢哋可以 keep 住有支持去支援前線、記者們得以繼續留在前線崗位監察記錄警隊所作所為,保障被捕者、同埋將真相公諸於世,揭破警謊。你同我今日仍然可以睇直播、喺 facebook 睇到警隊如何濫暴、如何插贜嫁禍、收到被捕示威者嘅資訊、喺鏡頭前叫捕被者大聲講自己個名等星火可以幫佢等等,全部係佢哋冒生命危險守在前線報道真相換返嚟,佢哋嘅專業絕對值得我哋課金一直支持。所以如果你搵唔到方法支持前線,呢個係你最佳嘅支援方法。

最後,希望大家緊記,送中惡法嘅撤回,我哋而家還擁有嘅自由,都係前線手足用血肉幫我哋爭取番嚟。無佢哋以前途、以死相搏嘅付出,我哋便只會繼續肉隨砧板上,任人宰割,而唔會有今日光復區議會嘅結果。請大家毋忘犧牲左嘅手足、以死相諫嘅義士、尚被困理大嘅同路人、彥霖、梓樂、還有千百個被捕手足。我哋係有責任為佢哋向林鄭、向政府、向民建聯、向黑警討回公道!

香港人,報仇!

 

發表意見