假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/10/1 - 16:27

與民為敵手法層出不窮

陳百祥

陳百祥

7 月 1 日至今三個月,國安法、禁示威、打傳媒、批法官、十二子、秋後算帳醫護教師、公務員宣誓效忠、取消三權分立......雖然已經發生很多事了,但政權與民為敵手法依然層出不窮,鑊鑊新鮮鑊鑊甘,最新連一個授勳名單都可以激瓜你。

講的,當然就是「荷蘭叻」陳百祥都獲得「荷蘭水蓋」。不知有幾多人看了政府公告,是這樣形容他的:「陳先生熱心社會公益,多年來積極支持和參與慈善籌款節目,貢獻良多,充分表現其無私與仁愛的心,也是促進社會和諧與溝通的良好榜樣。陳先生在演藝界的成就傑出,對工作投入及專業的態度是新一代演藝人的模範。現獲頒授銅紫荊星章。」

我想嘔呀。首先,佢去慈善籌款節目係因為果個係佢份工嚟㗎,唔係佢菩薩心腸呀。跟住,佢依幾年不斷舔政府、口講理性實情唔講道理、歪理不盡捩橫折曲、鬧後生人係廢青、話警察應該開槍、上節目一味冇 pt 鬥大聲,係人都知係破壞社會和諧、妨礙溝通的最強反面教材,你就叫佢良好榜樣。咁大家明政權成日話會和諧溝通時,心裡諗緊的榜樣係點啦。演藝界成就,就係一味玩 cheap 玩低級趣味玩足幾十年。sorry 講錯,因為佢根本唔好笑,冇趣味,純粹低級,又 cheap 又 low,然後你話咁樣係專業。唔好侮辱成個演藝界啦。

廣告

不過,有網民就提起已故填詞人林振強評荷蘭叻曰: 「任何電視節目,只要見阿叻有份出現,你就知道,這個節目必會變為業餘、不認真,和像馬戲團。」我睇見後都即刻放鬆下來。因為成個授勳,不就係一場馬戲嗎?只係區區一場政治酬庸、分豬肉獎嗎?有幾多獲獎人係公眾真係會認同對社會有貢獻的?當「大口狗」都可以拎到「最高榮譽」金紫荊獎,無數落選保皇區議員都拎到安慰獎的榮譽勳章,何必要為依個所謂授勳制度認真?

林氏又云:「他可以獨力改變一個電視節目的質素......以一人之力,左右一個騷,或一件盛事 (的質素)」所言甚是。藉著參與,荷蘭叻以一人之力將成個授勳制度整 cheap 同 low 晒,不簡單。甚至乎,如果可以藉此暴露整個政權同成班保皇黨幾 cheap 同 low,幾荒唐可笑,可能都算是一種貢獻。善哉善哉。 最後,就算只係精神勝利佔人便宜法,以後見到這些所謂社會賢達都可以咁講:「我真係恭喜你拎到勳章呀,同阿叻一樣咁叻呀你!」

作者 Patreon