色唔色

幾十年前讀設計時，有一課係「色彩學」，除咗教什麼冷色暖色粉色中性色之外，原來淨係紅色都有一百幾十種，係咁意數下都有赤、朱、丹、緋（桃紅色）、彤、絳（大紅色）、茜（紅色）、纁（淺紅色）、赭（紅褐帶紫色）、赫、赬、赯、奭、殷、檀、猩……，有一名不知天高地厚少年問阿 sir，咁黑色有幾多種呀又？阿 sir 話，黑色得一種，但灰色到黑色就分冷暖起碼廿種！

後生仔點會咁易罷休吖，少年又問咁有無顏色黑過黑色呢又？CamCam 哋嘅阿 sir Mr. Lam 見慣世面，不慌不忙氣定神閒回答 : 色彩學上黑色得一種，但印刷上 CMYK 只要喺印黑色之前印一次藍色，之後再印一次黑色，嗰個黑色就會比黑色更黑，黑到實實在在深不見底咁黑鼆鼆！

出嚟做嘢之後，當年仲係印刷媒介主導嘅年代，每一次如果需要印一個大黑地的話，printer 印刷佬同美指都會自動自覺印咗個藍底先再印黑色，嗰個黑色就真係黑到大海無量咁黑，彷彿將一切光源都吸咗入去般深湛得無遠弗屆！

時移世易，印刷媒體早已式微，CMYK 都無乜人記得，當年不知天高地厚嘅少年早已知天命有餘，已經好久無跟過油墨印刷嘅項目，Mr.Lam 教嘅比黑更黑嘅原理幾乎已經拋諸腦後忘記得一乾二淨…… 

誰知，藍加黑比黑更黑除咗印刷之外，原來一直存在，根本就喺身邊，無得避無得走。

Mr. Lam 你喺邊？可以可以再教我點整番白佢呢？至多我再交學費吖？