立場新聞 Stand News

蒙面警察「有牌爛仔」 讓香港變成「犯罪天堂」

2019/12/22 — 15:56

作者製圖

作者製圖

如果我是罪犯,而家既香港真係可以成為林鄭同建制派當初講既「犯罪天堂」。

點解?因為香港而家多左一大埋蒙晒面、失晒控,又唔出示委任證既警察。

書生成日同朋友講,警察唔出示委任證又蒙晒面,最可怕既唔係我地無法識辨其身份從而投訴(算了,你投訴都無用,監警會係廢的,眾人皆知,連外國專家都知因而全體辭職);而係我地唔知有無罪犯趁機冒警,打劫、綁架、非法禁錮、強暴市民。

廣告

好似前日大埔有名少女,被幾名戴晒口罩既青年女子圍,該名少女不斷問做咩拉住佢唔比佢走,問對方係唔係警察,佢做左啲咩,再無理由唔比佢走就係非法禁錮。但對方都無正面回應,甚至同事主講「關你咩事」(黑人問號)。

書生必須非常認真地講,拉住佢唔比佢走既幾名青年女子,睇個樣真係無一個似警察,唔係講笑,講係「街童」、黑社會或流氓都有人信。幸好有傳媒影住,擾攘左一輪,班喬裝女警終於話係「一場誤會」先放佢走。而果名少女表示真係咩都無做經過就比佢地捉住。

廣告

如果依件事發生係運動之前,早有見義勇為的香港人衝埋黎質問發生咩事;但運動發生後,大家真係分唔出邊啲係警察,如果「多事」,等陣又比啲警察話阻差辦公。

試想像下,如果真係有罪犯連群結隊做「大茶飯」冒警綁架,抓少女去性侵,都相當容易。唔係講笑。書生仲記得上兩個月,有一輛白色 van 仔突然駛至行人路,幾個蒙面人士忽然跳車抓捕了路邊幾個市民上車之後就極速駛走消失左,過程完全好似電影入面啲綁架橋段畫面。期間有附近市民曾質問蒙面人係唔係警察,大多無回應,有啲就支吾以對。幸好最後件事警方有認數,話該幾名市民有可疑定唔知搞事,所以抓捕上車。

但,如果果班真係罪犯而趁混亂蒙警犯事呢?

後果不堪設想。

書生記得至少有四五次疑似喬裝警察在夜晚人煙稀少的地方抓捕少女、兒童,剛巧被拍到。有些後來有報平安,有些沒有且無法追查去向,真係死左都唔知咩事。

近幾個月發生咁多浮屍案,死傷案,但警方均表示沒有可疑。好吧,即使真的不是警方做,那麼警方怎樣確認事件全是無可疑,不是有預謀的罪犯做?

香港人而家最大問題之一,係連最基本的生命財產安全都保護唔到,唔好話靠警方,警方唔打你都算偷笑,更莫講話大量蒙面喬裝警察提供一個有利犯罪的客觀條件,仲要好多本來有可疑的案件都無查落去。

點解出示委任證咁基本?因為市民需要辦別是否真正警察。而家警察做埋啲言行舉止完全都唔似警察,仲蒙晒面,直情係「有牌爛仔」同強盜咁。市民點分係警察定強盜?

一個執法機關連咁顯淺既道理都唔知,連咁基本既規則都唔守,仲話香港治安秩序交俾佢地。當一個社會的執法機關完全失去公信力,做既野又完全唔跟規矩,言行本身甚似流氓,甚至提供一個有利犯罪的環境出黎,香港而家真係陷入真正的法治和治安危機。

涉事少女影片

作者 Facebook

(標題為編輯所擬。)

發表意見