立場新聞 Stand News

袁國勇首鼠兩端,以科學之名為暴政塗脂抹粉

2020/4/5 — 14:42

近排出嚟見記者最多嘅唔係林奠、PK 鄧、陳肇恥,係袁國勇,武漢肺炎疫情之下,呢位大教授以政府專家小組之名日日亮相,作為一個「唔識政治嘅人」佢比政治人物出場嘅機會更頻密,風頭一時無兩。

上次出長文,直指「武漢肺炎乃中國人文化劣根性之產物」,唔夠一日後收番;今次就炮轟「港官唔見棺材唔流眼淚」,但係一日之後,喺電台節目兩番致歉,指自己對疫情太緊張,用咗過份激烈嘅字眼。

港台記者只係問咗世衞助理總幹事條關於台灣嘅問題,邱騰華就殺氣騰騰,指違反「一個中國」原則,要梁家榮問責;但係袁國勇直指「稱之為武漢肺炎亦無不可」,直斥中國人文化劣根性都仲可以係港共政權嘅最高顧問,甚至炮轟林奠「唔見棺材唔流眼淚」,一直口舌半句不輸人嘅林奠都無出過半句聲反駁,佢幾時變得咁有容人之量?

廣告

會唔會係林奠政府知道自己及其班子形象太差,講咩都無用,反而越講越無人聽,所以同袁大教授一個唱紅臉,一個唱白臉?全港市民都好緊張健康,醫護人員尤其係袁國勇大教授喺市民心目中嘅地位同公信力無可比擬,所以容許佢「小鬧大幫忙」,多番公開作出反政府嘅說法,同林奠政權保持一定距離,取得市民信任;之後再收回致歉,喺 official record 到保留清白之身,繼續企喺林奠身邊做佢嘅專家顧問,推動一波又一波嘅「抗疫」政策。

林奠要拉攏醫護司馬昭之心,路人皆見。四月三日全港報章、傳媒賣行廣告,準時八點為「醫護鼓掌」,連半年間一直「黑醫黑護」嘅警謊都拍片鼓掌向醫護致敬,其露骨偽善令人毛骨悚然。掌聲未落之際,袁國勇就夥同行會成員林正財上電台,指出醫護要有心理準備重用 N95,到時唔好怨天尤人,大有要醫護收聲,藉民意壓制醫護爭取足夠防護裝備之意。

廣告

袁國勇一直指疫情好可怕,要市民加強防疫。但係政府慢半拍推出一波又一波侵害市民人權自由嘅政策,成效半桶水,應禁唔禁,作為專家小組成員嘅袁國勇好似一啲都唔關佢事咁,置身事外。與此同時,佢繼續利用疫情煽動群眾恐慌,從而去 justify 林奠更多更 radical 更剝脫人權自由嘅做法同政策,賦予警暴更大嘅權力去打壓異己。

對於禁四人聚集,1.5m 飯枱距離呢啲林奠自認無科學根據嘅做法,佢無出過半句聲;對執法嘅警方大隊人馬衝入店舖,用唔同嘅標準執法,更加係噤若寒蟬。既然袁大教授以科學為先,點解有咁多機會見傳媒都唔加以駁斥? 

兩個月前,香港人戴口罩自救,林奠講「邊個官員戴咗都要佢除番落嚟」,世衞堅持民眾不應戴口罩,各國因而鬆懈,無禁止口罩等醫療用品出口;當時中國疫情緊張,得以喺全球各地搜羅逾二十億個口罩回國。到今日,疫症蔓延全世界,中國積極向各國輸出「口罩外交」,世衞隨即風向一轉,根據「香港經驗」,民眾戴口罩有利防禦疫情蔓延,而所講嘅臨床實驗,領頭者又係袁國勇。

大家仲未知世衞是哪國的世衞?喺「一個中國」原則之下,「香港經驗」會視為哪國的成功經驗?港共、中共、世衞,時機口徑配合得絲絲入扣,袁國勇嘅口罩理論,既救國亦救世。若果世界疫情因為全民戴口罩而得而改善,誰人功高至偉?哪國勞苦功高?

當年慈禧太后用「首鼠兩端」嚟形容袁世凱,戊戍政變,兩邊邀功,不可信任;到今日,同一個詞同樣可以形容喺另一個袁姓投機者。疫情之下,香港人不可鬆懈,要自救,更加要認清誰人反覆無常,首鼠兩端,借疫謀私,企喺道德高地食盡兩家茶禮。

發表意見