立場新聞 Stand News

被捕後急症室求醫手冊

2019/11/23 — 12:08

【文:一名急症室醫生】

【流程】

病人首先會去到登記處登記,然後到分流站,分流站護士會簡單問你病情及藥物敏感,以及量體溫及血壓。如果本身有藥物敏感,一定要如實作答, 有就答有,無就答無,唔肯定要問屋企人就答好似有不過要問下屋企人係咩藥,因為嚴重藥物敏感反應真係死得人。分流站護士通常都會記低,不過就未必有時間幫你即時打電話問屋企人。然後分流站護士會按你病情分流到唔同級別。

廣告

【診症】

被捕者都應該有病人私隱。根據醫院管理局嘅小錦囊,可以要求一個獨立而有窗嘅房間診症,而popo可以係小窗口看管住你。想精神壓力冇咁大,可以提出呢個要求,現實唔係次次都得,但試下都冇壞。

廣告

醫生都會再問你一次藥物敏感,所以仍然要補多句:「唔清楚有冇其他敏感,要問屋企人。」咁醫生因為醫療理由,至少可以打俾屋企人搞清楚藥物敏感先。有時醫生太忙會唔記得問,所以如果冇問要主動提出呀!

不幸被扑親頭,醫生通常都會問你,有冇失去知覺,有冇嘔,呢D野冇得厄人,有就有,冇就冇。
不過好多人其實俾人扑親頭,有「頭暈」,又行唔到,咁就算遇到藍絲醫生都好難俾你直接出院。
如果你無被扑頭,但又唔想返警署繼續坐,想入院,你就要留意下自己有無心口痛頭暈呢D重要既症狀啦。

如果身體有外傷痕跡,你又想保留證據投訴,可以要求醫生用ipad影clinical photos,資料會直接存檔係系統。
[⚠️] 特別係警署受傷果D,記得講埋係警署受傷,醫生份報告日後會係有力證據!

【驗傷紙】

驗傷紙即係警方文件 Polo42。呢份文件有兩部份。
第一部分係問你同唔同意驗傷,咁你黎得醫院我都當你同意嫁啦。
第二部分係問你份傷勢報告交唔交俾popo,好坦白講,你唔同意,有機會popo會唔俾你睇醫生。權宜之計,應承住同意係冇問題嘅。

重點係,黎到醫院就要記得同醫生講返:「 [⚠️] 我唔同意驗傷報告交俾警察」。咁醫生就唔會將你傷勢寫低係POLO42紙(popo偷聽到偷睇到就冇辦法啦!)唔同醫院有唔同做法,有醫院會俾另外一份文件你簽,話自己唔同意驗傷報告交俾警察。有D醫院係一張好頹嘅A4紙咁,但內容都係一樣。你要明白,你講左唔同意驗傷報告交俾警察,而醫生將你嘅傷勢寫落驗傷紙,你都可以告佢或者投訴佢侵犯病人私隱,我相信冇醫生會risk呢樣野嘅。特別要指出你唔同意將報告交俾警方,你日後想自己申請要醫療報告係無影響,兩件事係無關的。

【Confidential Flag】

Confidential Flag係防止其他部門醫護(特別係藍色或者八掛果D)㩒入去你醫療紀錄睇你病歷、個人資料再廣傳出去。所有無關人士Click入去嘅人都會被記錄。申請左呢個flag嘅人連屋企人問登記處都會搵你唔到。

如果你已經有家人到左,咁申請左都冇壞。咁如果屋企人未到,整左confidential flag屋企人會難搵左你。

同埋,當所有人都冇lock,但你個名隔離有,會變成「萬綠叢中一點紅」。
簡單D黎講,冇好過有

【普通市民求醫】

冇一間醫院係 100%安全。啲一睇就知俾橡膠子彈打中果D傷,黎醫院要小心,以免俾人篤灰被捕。
坊間有hidden clinic、MO oncall、杏林覺醒等等,應該都可以幫到你!
一定要黎公立醫院既,一係搵信得過既人搭好路,一係就諗定個好理由解釋你點整親。
跌低咪跌低,撞到野咪撞到野,被波省中咪省中囉,最緊要講野唔好一時一樣,咁大家好做人。

係現場俾人影住上救護車,呢D咁high profile又未被捕嘅話,例如爆眼或者明顯腳骨折行唔到,其實唔去醫院都冇可能搞得掂,拿拿聲申請confidential flag就有用喇!

發表意見