立場新聞 Stand News

親,咱要不要也擺放佢阿爺的大頭相?

2020/4/23 — 13:36

曾國衛(《紫荊》雜誌影片截圖)

曾國衛(《紫荊》雜誌影片截圖)

《霖你霖到街知巷聞》
伊人倩影掛在牆,如塵妾意要張掦。
情深仰望週知廣,未到清明照上香。

有一段時間,多次往大陸一些農村做調查及訪問。記得去到湘西及黃土高原附近一些村落,仍然見到有農民家裏貼着毛主席的大頭相。其中最誇張那次,那一張海報頭象大到由天花邊一路去到低過腰身。當時諗,半夜如果起身去廁所,懜懜鬆鬆見到主席凌厲的眼神,都咪話唔驚。當時已經是改革開放近三十年,都死咗幾拾年啦,使唔使咁誇張。又已經撥亂反正,又已經毛主席功過七三分都有決定,只能說可能是農村資訊落後,文化水平低,不少農民仍然較愚昧才會如此。至於大城市,機關、學校及各種生產單位當然仍然要象徵式作政治表態,但其實已經好少見到有民居會掛領導人頭像。家家掛毛像,應該是改革開放前才較為普遍吧?

在香港,以前電視台夜晚打烊前都會彈事頭婆個樣出嚟,然後就高奏「個個揸住個兜」,但其實冇乜人在意。政府部門就算仍然掛女王頭像,但都只係象徵式,除咗落嚟亦都冇人理。大學畢業出嚟做嘢之後,好似從來冇見過公務員的辦公室內要擺出女王玉照!

廣告

最近幾年,在新時期中國特色社會主義思想口號下,要大樹特樹國家主席的權威,要搞個人崇拜,最高領導人的玉照出現頻率便不斷提升。去到各地的書城,長期都有一整個書架擺出一大堆冇乜人會買的領袖著作,本本都差唔多見到佢尊容,其實已經覺得好反智,這樣做真的沒有作用嗎?

或者有啦,因為越來越明白愚昧並不止於資訊落後的農村。我估應該有的用啩,唔係就唔會做啦!但香港唔會變成咁係嘛!終於最近因為香港有某位高官獲得升呢做局長,證明香港真係有可能會變成咁,而且越嚟越可能。咪話冇用。咪話反智,事實證明這是十分有用的!吓,香港喎?

廣告

頓覺時光倒流了幾十年,真係唔到你唔承認香港社會正在急速倒退。有朋友慨嘆:「當曾衛國咁嘅樣都當了局長,香港嘅官場要乜就清楚。」係呀,可能這就是Racing to the bottom 了,講俗啲,就係要鬥快墮落。而且冇人知個 bottom 喺邊。共產黨好嘢之處,就係開咗個open ended question ,等大家去競逐墮落。而且有啲人真係會越墮落就越快樂!無端端提早升職喎!點會唔快樂?

親,咱們要跟大隊不?

作者 Facebook

發表意見