立場新聞 Stand News

論《黃色經濟圈》進化

2020/1/6 — 13:43

被視為支持抗爭運動的「黃店」,近日經常大排長龍。(資料圖片)

被視為支持抗爭運動的「黃店」,近日經常大排長龍。(資料圖片)

【文:本土經濟戰】

黃色經濟圈由 2019 年反逃犯修訂社會運動的初期 — 罷買行動 / 全民罷買日衍生而來。及後出現荃灣北角福建幫毆打示威者及巿民事件,以及美心太子女伍淑清的抹黑香港人的言論,出現「黑裝修/ 紅裝飾 / 藍罷買 / 黃懲罰」的行動。
.
4 種行動當中,前 3 種係破壞,唯有黃懲罰係 Constructive 嘅行為。大家都理解,破壞係最簡單直接嘅,而建設性嘅行為係需要長時間去維持,正正係咁,我地個Facebook 一直堅持只針對黃店 / 良心店,我地要「懲罰」返佢地嘅無私付出之餘,亦都要靠佢地營運落去,就可以繼續用佢地嘅優勢去守護喺街上抗爭嘅年輕人。我亦深信200萬香港人一定養得起黃店,唔洗靠其他人。
.
講返正題,由罷買,演化到現在「黑藍黃」3 大行為為主,咁然後呢?
傳送門:所謂黃藍店嘅分類 以及 米豬蓮制度
.
我曾經係連登貼文表示極不同意現有機制,以及難而維持,詳情可以睇返原 Post。而一直參與黃店推廣以及社運當中,就發現有偽黃 (藍扮黃 / 中立扮黃 / 淺黃扮金黃) 被封神,亦有暗黃被抹藍等等。我一直思考以及參考不同渠道嘅想法後,我有呢個建議:
.
a) 黃店認証門檻要低;
b) 任何黃都要支持,包括偽黃;
c) 所有藍都必須要抵制,直到倒閉;
--------------------------------------------------
一直以來,喺香港做生意,最好唔涉及政治,除咗奶共。因為撐共,就有機遇,有如順水共舟;相反就會變咗逆水行舟。
.
大家諗深一層,共產黨嘅商機,即係「紅色經濟圈」,只係由上而下提供大量機遇,但唔會直接比錢你,咁邊個比錢你?
.
就係【消費者】。無論係大商家、小商戶、品牌、的士、小巴、演員等等,最後比錢埋單嘅人,都係普羅大眾,唔係政權。就算你係獨巿嘅黨鐵、TVB,我地唔幫襯就唔幫襯,因為比錢嘅人永遠都唔係會香港政府 / 中共。
.
而黃色經濟圈,係由下而上嘅機遇,我地會直接比錢,而商戶就要「黃」就 OK。所以,點解近日一直被一眾高官、藍屍 KOL、黨媒、甚至中国官方嘅猛烈批評及抹黑呢?因為【消費者先係主導經濟嘅人,唔係政權,有無聽過「顧客永遠是對的」】。極端咁講,政權可以令馬雲升仙同收皮,消費者都可以令騰訊同阿里巴巴執笠。最重要係大家嘅集體意志有幾強大。
.
當然啦,呢幾個月大家都好努力懲罰黃店,衍生咗「偽黃」呢種投機者,亦衍生咗黃藍店認証。
.
既然明知有偽黃,點解仲要建議(a)黃店認証門檻要低呢?商界一直噤聲,係因為反共無運行,所以就算幾臭幾唔情願,都要奶。而實際上奶共門檻都好低。
.
我地一定要做到黃店有利可圖,即係令商戶「奶黃」。自己友當然唔會覺得臭,但我認識好多商戶根本唔想以「黃店」名義營運,唔想食人血饅頭,而我認為必須要目標係全城黃店,藍都會變黃。
.
事實上,部份嘅「藍」眼中只有利益,沒有政見。而無人幫襯嘅真心藍撐警果啲就會倒閉 (放心,藍屍無理念唔會搞藍色經濟圈,佢地阿爺唔係消費者而且阿爺都好缺水),藍商戶 / 員工就會失業,而為咗生活就要扮黃,洪師傅話齋「為生活我可以忍,臭都要奶」,最後佢地會入黃店做黃員工,然後間間鋪都可以連儂文宣,無 TVB,無親中人士海報,餐牌日日都有「五大素球」、「獨立調茶」,喺餐廳高談闊論屌共產黨同警察。所以佢地真黃定偽黃,效果都係一定係正面嘅。就算佢係「偽黃真藍」,但為咗利益,極端嚟講就算有差佬在場,佢會幫你屌埋一份,連推動罷工活動都變得更容易。就係要迫佢地由奶共變奶黃。
.
所以嚟緊要做嘅,【力棒黃店,令藍店由奶共變奶黃】。你睇下誠哥嘅投資眼光?唔計班奴才政客,我最想睇中原地產同世紀21收檔,一個施永青一個楊官華。希望發展黃色地產中介商。
.
全城黃店,然後呢?就會發展成鬥品質、鬥黃,而基於兄弟爬山、不篤灰不指責不割蓆,就只會有良性競爭,如果有人搞事就知咩事。
.
講到口到臭,唔好捉鬼﹗無論前線抗爭,以及黃藍店都唔好捉。你覺得佢鬼嘅,行開 (唔幫襯) 就 OK,大把黃店等緊你排隊。有好多暗黃 (無論係因為本身太前抗爭,或者股東/ 家族生意有藍嘅 Partners) 未必能夠做太多太明顯變相「蒙面」,大家就唔好夾硬扯甩人地個 Mask。而果啲「偽黃」為咗生存,佢地會好努力咁掩飾自己,而不斷做「黃事」嘅 Marketing 門面野去 Convince 大家。佢地做,就一定對抗爭有幫助。
.
而真黃嘅商戶,以我地 200 萬真黃絲嘅 Network,一定會努力耳目相傳你地嘅好人好事,加上專心做好品質提供好服務,我深信到最後變咗熟客都唔洗 App 認証。
.
我對黃色經濟圈係非常樂觀,本土經濟戰係和理非抗爭嘅極致。
.
(註:其實我鐘意用良心經濟圈多啲。專頁一開始個名都係叫香港良心經濟圈)

作者 Facebook

廣告

廣告

發表意見