立場新聞 Stand News

謝偉俊、劉健儀雙雄智救郭榮鏗?

2020/4/17 — 15:47

資料圖片:郭榮鏗

資料圖片:郭榮鏗

內會選主席停擺半年,本來大家都求求其其唔係好知道發生乜事。但多得兩辦衝出來柒之下,社會重新關注哩件事。

熟書朋友自然知道,內會自今個立法年度於去年開始至今,新任主席一直未能選出。前因後果係,本來應該負責主持選舉會議嘅現任主席李慧琼因為競逐連任,由於避嫌所以不能主持會議,交現任副主席郭榮鏗負責。郭榮鏗按議事規則尊重每位議員發言自由,任大家無限度發言,故此開了多次會議依然未能選出新一任正副內會主席。

政府當然不滿 — 林鄭更已經出口術指責郭榮鏗縱容拉布。但好戲在後頭 — 就係完全唔熟悉香港事務,更莫講話議事規則嘅中聯辦及港澳辦一齊走出來指責郭榮鏗可能觸犯公職人員行為失當(Misconduct in Public Office, MIPO)云云。

廣告

我唔去同大家深究 MIPO。但前內會主席嘅自由黨劉健儀,以及現任立法會議員謝偉俊,都指出根據議事規則 75 條

75. 內務委員會

(1) 立法會設有一個名為內務委員會的委員會,委員為全體議員,但立法會主席除外。

(2) 委員會的正副主席須由委員會委員互選產生,任期直至下一會期的委員會正副主席在該下一會期分別選出為止;若下一會期的委員會正副主席選舉是在下一會期開始前進行,現任正副主席的任期直至該下一會期開始為止。如主席及副主席暫時缺席,委員會可在其缺席期間另選一委員代行主席之職。

廣告

一日未選出新任正副主席,現任李慧琼及郭榮鏗依然係內會正副主席,權責依然存在,故此可以由李慧琼重新主持會議剪布,就可以選出新一任主席。當然潛臺詞就是,李慧琼既然主持會議,就不能連任。

兩辦同政府凶神惡煞,難保真係想控告郭榮鏗又或 DQ 佢。但劉健儀及謝偉俊的邏輯都令大家發現一點:

假如有人要為內會停擺負上責任的話,李慧琼作為現任主席的責任比郭榮鏗更大,因為是她將自己要連任的利益置於整體立法會事務之上!

所以如果有任何人控告郭榮鏗 MIPO 的話,其他人也可同時指控李慧琼觸犯 MIPO,實行雙攬炒!而李慧琼作為建制第一大黨主席,地位之重要肯定在郭榮鏗之上。

要保住郭榮鏗,就要將哩件事廣傳,令親共打手不敢輕舉妄動!

 

作者 Facebook

發表意見