立場新聞 Stand News

警圖改寫 7.21 歷史 《立場新聞》發佈 7.21 直播關鍵首半小時旁述文字全記錄

2020/8/26 — 21:11

警方今天(26 日)拘捕民主黨立法會議員林卓廷等 13 人,指控他們涉嫌 7.21 元朗站干犯暴動等罪,新界北總區刑事總部高級警司陳天柱見記者時指,一名「穿黃色背心的女子」離開收費區後遇襲,令事態急劇惡化,當日現場有直播片段,「只影單方面行為」、「旁述令人誤會是所謂無差別襲擊」。

《立場新聞》是事發初段,唯一在現場直播的傳媒機構,以下為《立場新聞》記者於 7.21 當晚於元朗站直播襲擊事件時的旁述報道文字紀錄,由記者目擊過程到警察到場,關鍵的首 25 分鐘的文字全記錄,方便讀者重溫關鍵時刻,是非黑白,自有公論。

在這半小時中,《立場新聞》記者並無提及「無差別襲擊」字眼;記者步出收費區時,並無挑釁行為或語言;而影片所見,記者當時有拍攝閘內市民的行為。

(直播地點:元朗站大堂入閘後,直播開始頭一分鐘,見欄杆外有一群白衣人,有人拿住棍狀物體,站內的市民穿著不同顏色衣物,部分拿住雨傘,雙方隔欄對峙,有時以手上物件對打,或互擲雜物。)

廣告

[0000] 《立場新聞》記者:大家好……呢度係……各位《立場新聞》嘅觀眾,呢度係元朗西鐵站,而家記者喺元朗西鐵站付費嘅入閘區裡面,大家見到入閘區外面,係非常多著白衫同埋拎住棍同埋唔同形式武器嘅人,咁啱啱……其實喺…大家而家見到欄杆位置係企滿咗市民,咁但係因為出面白衫嘅人不住攞住木棍去攻擊而家入面嘅市民,所以大家係退後咗。

(衝突稍為平息)

廣告

[0100] 《立場新聞》記者:重覆一次,呢度係元朗西鐵站嘅現場,啱啱記者喺元朗西鐵站嘅女廁,見到有一位中年嘅女士,佢已經,話畀一啲白衫嘅男人,圍住打咗兩至三下,佢嘅頭而家流血不止,啱啱記者喺廁所見到有呢個情況。而喺出面係真係見到好多拎住木棍,同埋唔同材質嘅棍棒嘅、著住白色衫嘅市民,不斷向閘入面叫囂。

(記者鏡頭隨住白衣人行走路線,來到近入閘機)

[0144] 《立場新聞》記者:有人打開咗封住閘機內外嘅門,但係暫時未有人入來,大家見到鏡頭方向,好多人,拎住棍狀物體,而啱啱佢哋喺而家鏡頭影住呢啲玻璃欄杆外面,向住企喺入面嘅市民揮棍……而家喺入閘區入面嘅市民,亦都係有向外面投掟水樽。而啱啱《立場新聞》記者喺另一邊嘅時候……

(有白衣人打開閘門進入收費區)

[0234] 《立場新聞》記者:而家開始有白衫市民越過閘機行入嚟……立法會議員林卓廷已經到咗現場,但係佢哋(白衣人)而家暫時退咗出去,同埋係閂埋咗閘機(閘門)。而家見到西鐵站閘機裡面,有大批市民滯留咗喺呢度。重複一次,啱啱《立場新聞》嘅記者,喺元朗西鐵站嘅女廁,見到一位女傷者,女傷者向《立場新聞》記者表示,佢係因為喺元朗落車嘅時候,見到有年輕人畀著住白衫……(現場嘈吵)…………sorry,由頭講過……

[0326] 《立場新聞》記者:見到有人士係拎住木棍向閘內叫囂,但佢哋暫時無採取任何行動話要入來,佢哋不斷要求入面嘅市民而家要行出閘機外面……而家氣氛係僵持。啱啱個 live 可能開得太慢,大家而家鏡頭呢啲玻璃欄杆,其實係出現咗有欄杆外嘅市民,攞住木棍打欄杆入面市民嘅狀況。

(白衣人再次行近閘機,叫人「出嚟」,畫面見林卓廷及一群市民在閘機內,部分人舉傘)

[0420] 《立場新聞》記者:呢度係元朗西鐵站近 Yoho Mall 出口嘅閘機入面嘅位置,大家而家見到林卓廷議員係企喺示威者最前方嘅位置,控制場面,但係到而家都仲未見到任何警員,因為《立場新聞》記者喺大概十五分鐘之前,喺女廁見到一位頭部流血嘅傷者,當時 first-aider 幫佢做急救時,已經話報咗警,但係到而家,視線範圍唔見有任何警員……另外有一啲圍觀嘅市民啦……

[0512](旁白停頓,畫面見白衣人一方與站內人士互相叫囂、僵持)

[0530] 《立場新聞》記者:呢啲喺閘機外嘅市民,極多都係拎住木棍……

(直播聲音聽到閘內市民高呼「黑社會,唔好走」)

[0550] 《立場新聞》記者:有救護員到咗現場……

(畫面再見到衝突,白衣人一方有人隔住欄杆揮棍,閘內有人舉傘擋住,有人掟雜物)

[0638] 《立場新聞》記者:重複,呢度係元朗西鐵站現場,啱啱大家喺畫面都見到,閘機外面有大批著住白衫嘅男士,佢哋拎住木棍同竹枝,不斷向閘入面嘅民眾襲擊,不斷攞木棍扑入嚟,同埋掟嘢,閘機入面嘅範圍亦都有……(畫面見記者所站位置有人襲擊,有人舉傘擋住,拍攝位置略為後退)

[0728](整群白衣人亦後退,離開鏡頭範圍,記者步出閘機,在閘機附近位置繼續拍攝)

[0745](突然一名穿粉紅色裇衫市民衝前,用類似竹枝物體襲擊閘內市民,再轉頭用類似竹枝襲擊在旁拍攝的《立場新聞》記者,記者呼叫倒地。)

[0759](記者起來繼續拍攝,畫面見三數名白衣人圍住一名黑衣人用雜物毆打,隨後亦見有三數名白衣人再圍住一黑衣人拳打腳踢。)

[0825] (記者一聲呼叫,鏡頭再次倒地,並有多次拍打聲,有人叫「𨳒你老母,記者……」;記者再高呼,有人大喊「唔好打」、「唔好打記者」,鏡頭廿多秒後再舉起,見周圍是白衣人。)

[0857](鏡頭搖晃中再次舉起,見一男子鼻孔位置有血。)

[0949](鏡頭見有人在閘內噴射滅火劑或噴水,地面濕滑,有人滑倒。)

[1022](鏡頭移向有白裙女士倒地位置,救護員救護中)

[1030] 《立場新聞》記者:呢度係《立場新聞》嘅直播,啱啱記者俾著住白衫嘅市民,係圍埋一齊,係圍毆,《立場新聞》嘅記者同另一位行家,畀大批白衫嘅民眾圍住我哋兩個,係圍毆,記者而家手指受咗傷,但……記者而家手指係傷咗,腫得非常厲害,所以……但係我見到喺閘機入面嘅情況,非常之可怕,大批市民係退咗去月台上面……

(畫面見白衣人湧進閘內)

[1125] 《立場新聞》記者:大批市民退咗上月台上面,有啲人係爬咗喺樓梯上面……

(鏡頭見記者手部傷勢)

[1135] 《立場新聞》記者:大家見到呢個係記者頭先畀佢哋襲擊嘅傷勢……成隻手好多手指都係流緊血嘅……我相信身上有其他地方係有傷……暫時唔影住,影番閘機入面嘅情況先。

(記者再步入閘內,鏡頭見大群白衣人,有白衣人走上月台)

[1205] 《立場新聞》記者:大家見到佢哋一路追住市民,追到上月台,我哋搵另一個方位,係可以入到月台,望一望上面情況……啱啱係有大批市民,唔係淨係記者一個,如果有睇直播,會見到有女士,成個暈低咗喺地下,另外頭先有另一位行家……(鏡頭搖晃,記者聲音似對路人說:小朋友千祈唔好過去,打緊人,似是路人問:「邊個打邊個」,記者聲音:「盡快離開呢度」;似是途人問:「差人呢?」,記者聲音:「報咗警,完全無嚟過,快啲離開,你哋快啲離開,有小朋友快啲離開……走啦走啦,快啲離開。」)

[1300] 《立場新聞》記者:現場仲係有市民唔知道情況,帶埋小朋友嚟西鐵站,情況非常之危險,到而家警察都係無嚟過。

[1330] 《立場新聞》記者:啱啱係聽到,有市民係攞住木棍,係指嚇記者……

(鏡頭叫有男人拿住條狀物體指罵記者並跨欄追趕,記者急步跑上扶手電梯,到達上層月台)

[1347] 《立場新聞》記者: 佢哋暫時無追到上嚟……(喘氣聲)但係記者剛喺一邊上到嚟,另一邊……有人向住入咗閘,上咗列車嘅市民,都不斷攞木棍同雪糕筒,係打緊喺列車入面嘅市民。

(鏡頭見白衣人把其他人推在地上毆打,鏡頭忽明忽暗)

[1425] 《立場新聞》記者:唔好意思,記者部機可能頭先跌過嚟……我哋不斷行近呢一邊……但係呢架港鐵列車係未閂門,所以離開唔到,現場月台係有好多其他市民,到而家都係仲未見到有任何警員,甚至任何嘅車站職員維持秩序,係見唔到,但記者喺半粒鐘之前, 見到傷者嘅時候,根據 first-aider 嘅講法,係已經報咗警,而家亦唔知道元朗站外面究竟係乜嘢情況。

[1524] 《立場新聞》記者:記者而家係 zoom 緊近鏡,所以距離呢一班著白衫嘅人大概有五十米嘅範圍,但佢哋不斷向緊呢個方向接近,同埋不斷打緊車廂入面嘅市民……係越打越前,上到嚟嘅白衫人士越來越多,佢哋係逐個車門入去打……大家見到呢架列車入面,男女老少有好多完全唔同嘅市民,有啲白衫有啲黑衫,有啲真係未必有去遊行嘅市民嚟嘅,喺現場極少、極少嘅市民有防具……有啲白色衫嘅民眾,係自己件衫都染血……

(月台上仍然滿是白衣人,鏡頭近處有一位黑衣人,向遠處白衣人高舉雙手)

[1642] 《立場新聞》記者:大家見到有一位民眾……

(畫面見有一白衣人拿著類似竹枝走近記者,鏡頭搖晃走避)

[1652] 《立場新聞》記者:啱啱見到白衫人,喺另一條電梯上面衝上嚟,即刻追住市民……

(記者進入車廂,再到月台)

[1720] 《立場新聞》記者:記者嘅傷勢,到而家仲係流緊血,啱啱頭先……大家見到現場,有小朋友,有家長仲係帶著小朋友,情況非常之危險,但到而家仲係一個警員都見唔到。啱啱喺記者影住嘅呢條電梯,突然間有大批白衫嘅人衝咗上嚟,佢哋一度喺月台周圍走,我哋喺車廂入面,大家見到,遠處其實係已經有啲白衫嘅人衝咗入嚟車廂度打緊人㗎喇……係啦,我客觀事實地講係打緊人。

(遠處仍見白衣人)

[1816] 《立場新聞》記者:記者係會喺安全距離,觀察住個情況,似乎有大批市民,包括有女士係頂住咗,外面不斷有白衫市民,係不斷指嚇市民,叫佢哋唔好影相,現場啱啱樓下,有見到其他行家,樓上呢度,頭先都係見到一位行家啫。

(鏡頭繼續見到白衣人聚集月台遠處)

[1913] 《立場新聞》記者:情況好危險啦,啱啱真係見到帶住小朋友嘅……帶住小朋友嘅家長都仲喺架車上面,離開緊……好嘞,而家架車係會開嘅,相信……車門而家已經關上咗……我哋遠處係見到白衫嘅民眾係拍手歡呼,但車門隨即又開番……

(月台廣播,謂列車將不停元朗站)

[2020] 《立場新聞》記者:我哋見到車門,其實一直都係閂唔到,相信同前面呢一班白色衫嘅人,佢哋仍然係不斷咁樣,阻塞緊個車門係有關係……你哋可能聽唔到,其實係佢哋拍掌歡呼緊,而家車門啱啱關上咗。入面係有非常之多嘅市民,但係暫時唔知道架車開唔開到……仍然不斷有市民上緊嚟……而家車門又開番,即刻白衫嘅人趨近又再向佢哋叫囂……同埋啱啱記者係見到佢哋向車門入面投擲一啲物件,仲見到好多帶住小朋友……

(鏡頭搖晃)

[2128] 《立場新聞》記者:啱啱見到帶著小朋友嘅人士,所以記者係勸佢哋離開先,而家都係離遠咁樣影住,好嘞,見到大批白衫人士,喺對面架車,車門關上之後,係大批一齊落緊電梯。

[2150] 《立場新聞》記者:真係唔好意思,因為記者隻手受咗傷,唔係好方便行到去最前,但係都影住而家情況先。對面呢架列車,阻礙咗大概五至十分鐘之後呢,成功咁樣開出咗。

(鏡頭見白衣人離開月台回到大堂)

[2210] 《立場新聞》記者:所有嘅、拎住一啲武器、包括木棍等等嘅白衫人,而家係落咗去車站大堂。重覆啦,呢度係元朗站,見到呢班白衫人係離開緊,離開緊月台嘅範圍,但係唔知道佢哋會唔會離開元朗站……啱啱澄清番,其實報警呢樣嘢,係記者啱啱嚟到元朗站,即係三十分鐘前,喺大堂廁所見到有傷者嘅時候呢,啲 first-aider 向記者轉達,話已經報咗警嘅。而家見到白衫人係散去緊……暫時西鐵站月台情況呢,暫時係安全嘅。即係都唔係想點樣,向大家交代番,啱啱記者喺車站大堂嘅閘機外面,同另一位男姓、第二間報館嘅行家,係一齊俾呢一班著住白衫嘅人士用唔同嘅棍棒襲擊,嗰位行家傷得比較嚴重,成個口係爆哂血,記者雙手……

(周圍尚有人叫囂,鏡頭向大堂移動)

[2413] 《立場新聞》記者:我哋見到救護員,相信係救治緊廁所嘅傷者同其他嘅傷者。

[2433] 《立場新聞》記者:哎,啱啱見到,閘外面有警察到場嘞,見到有戴住防暴頭盔嘅警察到場了,現場著白衫嘅人士,幾乎已經全部散去咗……

(直播繼續三十多分鐘,記錄了市民不滿警察太遲到場的爭論。)

發表意見