立場新聞 Stand News

警察入理大 不得不提防

2019/11/28 — 6:52

書生唔明點解大家好似對今朝警察入理大的事件無咩關注。係唔係真係沉醉區選會勝利得咁緊要?

第一,理大入面仲有人(22:13 有留守者見記者!)。警察美其名話再搵到留守者只會登記,而且會比佢地去醫院,但秋後算帳一定會有。

第二,警察派安全小組和***刑偵人員***,絕對唔係尋找同處理危險物品咁簡單,仲會搜集各種檢控大家的證據。如果警方順利收集「危險物品」或其他物品的指紋,或者羅到理大的 CCTV,就算早前「走得甩」既人,都絕對有可能追蹤得返。(比警方搵到係「危險物品」留下既指紋,好大機會告得入。)

廣告

第三,警方入去搜查,會唔會「加料」?會唔會用此證明客觀環境,理大多個範圍都擁有大量非法及強力的攻擊性武器,並以此為控方他日檢控暴動罪打開方便之門?

第四,原則性問題。警方究竟會進入理大咩區域?係所有區域都可以進入,定係剩係處理所謂危險物品?如果理大任何區域都可以讓警方進入,包括宿舍房間、教員室然後可以任意取證,其實有無申請左搜查令(書生唔見任何新聞報道指警方有搜查令)?咁有無侵犯私隱(譬如可以進入房間的權利唔應該只係由校方決定和擁有)?

廣告

第五,理大校方代表雖然會陪同,但眾所周知理大校方根本信唔過,而且好可能只會完美地配合警方辦事。

聽日比得警方入去搜證,以後就同樣可以基於相當理由去中大、港大、城大依啲「危險地方」搜證。

我地可以做既野:

而家應該係理大校方配合警方,然後警方「解封」校園(又登記晒名單又搜證),原則上行動係兩者 DEAL 既結果。如果真係要阻止,第一要派區議員同學生代表到現場,問返警方有無搜查令,搜查範圍係邊度,包唔包括宿舍房間同教員室,依兩度屬私人領域,無搜查令警方原則上無權進入,即使校方尤許。第二,逼校方公開條件同承諾只處理邊個區域,係唔係只處理危險物品等。第三,如果要清理危險物品,要求消防進入就得。

作者 Facebook

(標題為編輯所擬)

發表意見