立場新聞 Stand News

警暴借疫肆虐,香港再無翻身之日

2020/4/1 — 0:22

3 月 31 日「8.31」襲擊事件七個月,大批警察於太子一帶截查在場市民。

3 月 31 日「8.31」襲擊事件七個月,大批警察於太子一帶截查在場市民。

8.31 七個月,警暴再次肆虐,喺武漢肺炎疫情陰霾下,更加多咗條「禁聚令」,規定四人以上嘅聚集均為非法,執法人員有權票控及驅散,比起公安條例嚴格十倍。

喺今晚(3.31)太子就發生咗單懷疑濫權事件,區議員陳堡明指出喺條街到被警員搜完身之後五個人一排,拍片話佢哋違反「禁聚令」,票控每人罰 $2,000,並揚言再捉到會被拘留 48 小時。

事件引起廣泛迴嚮,好多人話呢單違反「禁聚令」係廿三條嘅初版,但係大家都睇小咗呢單荒謬至極嘅事嘅嚴重性,本身比廿三條更可怕。如果警務人員用呢個方法執法嘅話,根本香港唔再需要國安法、唔再需要廿三法,就可以行私刑、執私法。

廣告

五人拉埋就 charge $2,000,同樣道理,三人成群無論有無「破壞社會安寧」都可以拉咗先告非法集結;跟住綠公仔過馬路都可以告亂過馬路;就咁行街睇你唔順眼都可以票控你亂掉垃圾。事實有無做過?重要咩?邊個有權有法就係正確。

當事實再無客觀存在,當政治凌駕一切,當無可以變成有,當行街都可以變成罪,當立場本身已定罪名,當摘葉飛花皆可為劍,香港有成千上萬條罪行,廿唔廿三條真係唔重要。

廣告

投訴?!有不滿嘅話就用現有行之有效嘅途徑投訴,即係「警察投訴科」;司法獨立?先關押幾個禮拜不准保釋先,到上庭個日未審都先坐幾個月,就算最終昭雪無罪釋放,邊個賠失去咗嘅時間同青春?

呢啲咪今日香港所謂嘅「法治」囉。法治唔止已死,仲死得透徹。大家幾時先至體會到暴政比疫症更應警惕,更殺人如麻。一日警暴仍然存在,一日香港都永無翻身之日。

發表意見