立場新聞 Stand News

【警謊隨意瞞】警方隱瞞資料萬能 Keysss

2020/5/6 — 18:27

本土研究社製圖

本土研究社製圖

上星期,立法會議員索取警官會所圖則,警方竟聲稱披露圖則將會「損害安寧」,因而拒絕,被朱凱迪形容為「拒答萬能 key」(註一至三)。但警謊手法層出不窮,拒答萬能 key 何止「損害安寧」一種?今日就同大家介紹下幾種警方常用嘅拒答萬能 key,認清警謊嘅隨意「瞞」法寶。

翻查過往幾年嘅立法會文件,唔難發現警方慣性以「涉及行動細節」、「不時檢討」等空洞字眼迴避問題。今年(註四)保安局共 884 條答覆中,警察佔咗 537 條(60%)。537 條警察答覆中,有 289 次(54%)用咗萬能 key。而如果睇萬能 key 嘅出現頻率(count),保安局 884 條答覆中,萬能 key 總共出現咗 307 次,當中 289 次屬警務處答覆,佔 94%。可見,同樣有保密需要,但警察比其他紀律部隊更會托詞不公開資料。

以下同大家一齊睇吓各種萬能 key 用法:

廣告

【行動細節,不便公開】
適用於:執法情況、武器開支等
濫用次數:204 次(佔全體紀律部隊的 99%)

拒絕披露例子:

廣告

➢ 開支明細:武器及彈藥(如催淚彈、布袋彈、海綿彈等)、行動呼號卡印刷成本、「安全屋」租金;
➢ 評語:公佈買咗幾多水馬和催淚彈,難道會讓「不法分子」知悉警察於何時何地放水馬和催淚彈?其他國家嘅警察都有詳細交代。而且警方亦會喺展示軍備嘅時候(例如警訊)透露所謂「行動細節」。

➢ 所用武器同人手調配嘅詳情:購買電槍及木彈等嘅進展、警員黑色面罩嘅品牌、特務警察嘅工作時數等。
➢ 評語:向公眾交代黑色面罩所用物料,難道會令示威人士窺探警員容貌,繼而「起底」?公佈安全屋租金,會洩露安全屋位置?其實點定義行動細節?透露某啲資料的確會有保安考慮,但呢啲考慮必須與公眾利益平衡。

來源:答覆編號 SB048、SB211、SB223、SB390、SB431、SB463、SB537、SB541

【按既定機制處理】
適用於:各種運作準則及程序嘅詳細資料
濫用次數:29 次(佔全體紀律部隊的 76%)

拒絕披露例子:

➢ 銷毀示威現場錄影片段嘅機制、處分警員行為失當嘅進展等
➢ 評語:問「機制為何」,則答「有機制處理」。而且嗰啲個案冇「事件已進入法律程序」嘅制肘,冇理由唔公開。當議員擊中要害時,就話將按「機制」行事,但就冇解釋「機制」內容或其是否合理,答咗等於冇答。

來源:答覆編號 SB064、SB224、SB226、SB228

【不時檢討】
適用於:人手及設備增減的檢討機制等。
濫用次數:56 次(佔全體紀律部隊的 90%)

拒絕披露例子:

➢ 警隊新購入「人工智能技術」嘅設備開支同供應商、各警區專責處理虐待動物案件嘅人手安排
➢ 評語:與「按既定機制處理」原理相近。當議員對人手或設備增減有疑慮的時候,會要求公開相關安排作討論。警方就會以「不時檢討」推搪。潛台詞:差人做嘢唔洗你教。當議員要求更多警員執法的情況時,就藉已經「不時檢討」搪塞,變相不用交代安排是否合理,潛台詞:我無做錯到。)

來源:答覆編號 SB043、SB544

「Yellow object」、「用腳推開」並非個別警官嘅荒謬言論咁簡單,而係警務處濫用現時公開資料制度漏洞嘅表現。從撥款到執法,對警方無利嘅資料一概不公開,系統性地逃避市民同議員監察,視問責如無物。

 

#教你做警謊
#警謊生成器
#拒答萬能 key
#我答嘢唔洗你教
#開放政府研究
#財委會問答

參考資料:
【一】立法會 PWSC129/19-20(02) 號文件,第 5 頁,「由於披露相關圖則可能或有理由預期會令維持安寧、公眾安全或秩序、或保障財物的工作受到傷害或損害,因此未能提供相關資料。」
【二】香港電台:議員促提供警官會所圖則 路政署稱尊重警方指不宜公開
【三】朱凱迪:警務處拒絕提交資料「萬能 key」
【四】審核二零二零至二一年度開支預算 — 管制人員對財務委員會委員初步書面問題的答覆 局長:保安局局長

不讓官方數據隱沒真象ㅤ支持開放政府研究工作

本土研究社 Facebook

 

發表意見