立場新聞 Stand News

「議員」們,請面對人民、而非面向人大

2020/8/17 — 14:58

作者製圖

作者製圖

本身唔想在此多談選舉、議席,但有啲謬論,實在不吐不快。

希望為各位尊貴既「民主派」議員上一堂政治1001 bb班,議員之位,應由人民經選票授權授予,而每一次既投票授權,佢既效力係有時限架,2016年投既票就係授權予你2016-2020作議員,一日不多一日不少。政治時間一日瞬息萬變,不能隨意「延任」。

民主派議員,政治「學者」,請不要再自欺欺人。如果民主派議員認為2016年既選票,可以由人大延長其效力至2021既話,我係度請問一條問題:

廣告

民主派議員,會唔會支持人大決議,比湯家驊前議員「延任」立法會多20年?公民黨2008年推薦湯家驊出選而當選,呢個授權係咪可以「延任」?如果公民黨對湯家驊既授權唔可以自動延任,點解民主派可以接受選民2016-2020既授權,可以經「人大決議」隨意延長?

最基本代議政制既政治道德、觀念,各位尊貴既民主派政治家有乜可能忘記左?

廣告

2016同2021之間香港改變左幾多,話延任點講得過去?當年「一票不投民主黨」,所以勉強投左梁耀忠既,經過「我唔鐘意做主席呀」、七一 Just Do It,你仲同佢講佢當年投比梁耀忠既一票可以由人大決議任意延長,係咪想激死香港人?黃碧雲去到2020年,初選5000票都唔夠,佢又有咩民意授權係2021年代表香港人?

今日,民主派接受「人大決議委任多一年」,聽日就失去一切既話語權,去反對人大將建制派既議席延任十年。民主派成日幻想進攻特首選委嘛,唔使諗啦,人大決議將選委,甚或林鄭特首之位,自動延長亦得。香港代議政制從此葬送。

梁家傑話「選民並無收回對民主派的授權」,呢個說法係極度危險,我不能理解佢如何講出如此違背民主原則既說法。民主政制,就係需要重新選舉。希特拉亦係透過選舉登上總理之位,然後透過充滿暴力恐嚇既「1934公投」,強行將自己既總理授權延長、加強,令自己成為終身元首;民主就係咁樣衰亡。今日香港「民主派」,竟然接受延期選舉,放棄批判延期同DQ既不公,改為接受招受,接受人大通過決議,將香港人既授權任意延長,令香港議會隨時成為百年國代,實在匪夷所思。

香港人既眼睛係雪亮既,就算民主派不停開動輿論機器講咩「寸土必爭」,呢個「臨立會」全無民意授權咁簡單既道理,香港人看得清清楚楚。

民主派議員,請不要再畏縮於前朝元老、輿論機器背後,推埋梁家傑、咩蔡子強「學者」等出黎,為人大決議辯護,用「總辭」等錯誤字眼誤導選民呢一年既議席係符合道德。

請效法朱凱廸,親自走出黎面對香港人,承認呢個「人大委任」亦無政治授權。然後,想保住自己既議席自己份工既話,就話比香港人知,你既「守土必爭」會點樣超越過去民主派既一切失敗既議會抗爭,舉證責任係你地度,你地要說服選民,你地入到去所做到既成效,必定會值得我地接受呢個不公不義既委任,如果說服唔到選民,就請勿仗倚「人大決議」,去攞你唔應得既十萬人工。

「我們知道他們在說謊,他們也知道自己是說謊,他們也知道我們知道他們在說謊,我們也知道他們知道我們知道他們說謊,但是他們依然在說謊。」

作者 Facebook

發表意見