立場新聞 Stand News

【財政預算案】民政事務總署預算睇真啲

2021/2/24 — 18:49

2021 年 2 月 24 日,財政司司長陳茂波財政預算案記者會

2021 年 2 月 24 日,財政司司長陳茂波財政預算案記者會

今日財政預算案公布,除咗大家好關注嘅放數俾失業人士但唔肯俾失業救濟金、唔肯派錢但係每個月 $1,000 電子購物券送錢俾支_寶等公司使等等,仲有各個部門嚟緊一年可使嘅預算,都會喺預算案公布時同時俾大家睇到。等我地透過睇下今年民政事務總署嘅預算,去睇睇舊年一年區議會嘅成績。

政府一邊同議員講,唔可以喺區議會討論全港性議題,一邊原來舊年全年已就住全港議題諮詢區議會 337 次,少過 2019 年嘅 402 次有 65 次。咁政府俾區議會諮詢啲乜內容?包括食環署綠色殯葬等等,由政府遞落嚟嘅文件咁囉(但係就唔俾議員提全港議題)。而政府預計仲會喺 2021 年有 300 次就全港議題諮詢區議會,除開 18 區即係一年得 16 個議題?

廣告

至於地區事務,舊年一個 2020 年,區議會已經討論咗 4,070 次,係比起 2019 年(即係上一屆區議會最後一年)嘅 2,801 次,足足多咗 1,269 次(+45%)!證明各位議員同事喺過往一年係大幅度咁掘出咗唔同嘅社區議題,加強積極監察政府抗疫工作,並唔係如民_聯事務局局長同埋特首所講係失效嘅。

廣告

至於社區參與計劃撥款(CI Funding),照數字睇就係大幅減少咗,項目數由 2019 年嘅 34,474 次跌落 9,769 次(-71%),但係受眾人次只是由 1,870 萬跌落 850 萬(-54%)。反映就算因為疫情以及民政唔批錢批准啲活動同研究,區議會活動的平均每活動受眾人數係升咗(雖然政府就賴係區議會批准活動數量跌咗)。2021 年政府預算區議會批錢的活動數目會回復到 32,342 項,同 2019 年相若,但參與人數仍然係 2019 年數字 projection 的 1,250 萬人次。

議員同事們就知道今年議員酬金,政府話跟 CPI 調整係減咗嘅。但睇翻經常帳,明明預算話部門減咗位,但係喺部門人工開資方面,2020 年卻不減反升咗 2,243 萬。相反,區議員酬金同 OER 實報實銷開支部份卻跌咗 2,979 萬……

簡單睇完以上預算嘅數字,究竟係區議會太做得嘢、民政署做唔到嘢、民政局唔識睇數字,定係政府打壓區議會肥自己呢?大家心中有數。

 

作者 Facebook

發表意見