立場新聞 Stand News

送頭

2020/5/25 — 13:49

作者 Facebook 圖片

作者 Facebook 圖片

因今日(24 日)活動,又有新一輪送頭的討論,令我想起昨天反國安法街站遇上的一個姨姨。

她在街站前聽了一會兒,等我們嗌咪完了,就走過來。

「你比人扣起咗護照?」
係呀,都無辦法,依家政府打橫嚟,好多手足都係咁。
「點解你哋咁都要繼續喺度擺街站?」
國安法嘛,想盡快同街坊講解下,一齊反抗。攞唔攞份單張睇下了解下?
「共產黨,邊有得反呀?」
係難㗎,但係我哋上年都成功過一次啦係咪?(chok 聲政棍 mode 開動)
「點解你哋啲後生又俾人打又俾人拉都要繼續?」
其他人我唔知呀,對我嚟講,因為呢度係香港囉。自己屋企嚟㗎嘛……
「你哋有冇讀過歷史,你哋到底知唔知共產黨係幾恐怖?」
有呀,中西史都讀過。就係共產黨恐怖所以先要反對國安法嘛。
「你哋咁樣可能會死。六四嗰陣你出世未?你有冇諗過父母感受?」

廣告

我心諗,唔通我會錯意,呢個姨姨係嚟挑機嘅?正當我努力回神諗緊點應時,個姨姨開始激動,捉住我隻手。

「我係心痛你哋班後生呀。你哋唔係我仔女,我仔女好大個了。阿姨我七十幾歲啦,咩都見過啦,香港變成點都冇所謂啦,但係見到你哋比人打到傷哂我心痛呀……」
我明。但係當我地唔去做啲嘢,咁我地嘅下一代又點算呢?同姨姨妳心痛班後生一樣道理呀……我地繼續做就係唔想我地下一代要好似我地咁呀……
「嗯……」
當幫下我地手,攞多兩份文宣派埋比街坊好無?
「好……」
感謝你呀。
「願主保佑你地!」
大家都要加油呀!

廣告

如果國泰民安的話,根本無人會想攞苦嚟辛,更唔好話送自己頭了。
然而現實就是沒有人做的話,就是大家一齊等死。

僅以《地厚天高》一段對白作結。

「呢代人就似係鋪緊一條路,你當係條路從中環過海去尖沙咀。
但每個人嘅力量都有限,只能夠搬到一兩嚿石頭只能夠鋪幾格,而且條路係單程路,鋪完你就要跳落海。但係後人可以沿著條路行落去,而且會越離越近終點。」

 

作者 Facebook

發表意見