立場新聞 Stand News

選民的自我修養

2019/11/27 — 12:34

【文:Sunny Cheung】

區選完左好幾日,好多人都出來寄語候任區議員要做好地區工作,的確好多新任區議員係素人,佢對社區未必好熟悉,亦唔知可唔可以堅持 4 年既工作,更唔知會唔會出賣港人。所以好多人都對區議員有好多建議。今次我就對作為選民既我地俾建議,甚至我想講,渣車要考牌,其實做選民都應該要考牌!!!作為選民,其實需要清楚:

重點:公民有權利亦有義務。選舉議員係我地權利,但唔應該認為:我選中你做議員,你一個月逗 3 萬幾,所有社區事務應該由你做翻!因為份糧包左,所以唔好搵我。呢種觀點好危險,因為佢會令選民變得抽離社區事務。其實議員作為一個社區最大既公僕,佢有最大既責任改善社會,但選民作為社區既持份者其實都有責任,至少需要監察、甚至參與社區活動。

廣告

1.善用 TG、WhatsApp Gp、FB page,香港人工作忙碌,收工翻到屋企可能已經議員辦事處閂左門。所以應該開街坊 group,隨時並且直接同議員投訴,不要讓社區變得冷漠。

2.區議會曾經係建制派既天下,好多街坊興趣班、旅行團、居民協進會/法團都係建制派圍威喂,以前大家都忙碌、唔想煩,唔想參與。由今年開始,求求大家要幫手出來(忠告區議員都要主動出來搵街坊參與),既然可以捱夜監票,何不走多一步,一齊參加社區活動?唔好怕醜,去社區旅行團都好啊!

廣告

3.距離區議會正式換屆仲有一個月,葉劉已經講左叫建制派支持者盡量投訴地下塗鴉、損壞交通燈、連儂墻,製造麻煩。大家應該幫一幫葉劉,早佔先機,提早投訴現任區議員唔做野,未修復社區設施。咁到時換屆後,建制派再投訴,候任區議員可以拎翻投訴信出來拋翻個波俾前任,雖然有卸膊之嫌,但呢個行為可以幫新任區議員拖一拖,爭取時間接棒地區工作。(投訴信 send 完俾現任區已完後記得 CC 候任區議員,Demo 請參考文末。)

4.區議會只係支線任務!支線任務!支線任務!成功既抗爭係要結合區議會同民間勢力,要抗爭記得要搵區議員幫手,除非你唔好彩當區仲係建制派,否則唔洗客氣,搵區議員寄存/提供水、banner 等基礎抗爭物資啦!當區有狗屋人即刻要搵區議員去狗屋救人!雖然唔好拉區議員落水,但需要幫手既時候絕對唔好怕醜,你肯出聲,區議員就有責任幫你。開花記得搵區議員來賞花!

5.曾經有人提出民團,而家搵區議員幫手,其實唔係無可能!

最後,請大家記得,呢四年地區工作失敗既話(事實扣除頭頭尾尾得 3 年),一切都會回到起點!大家可能含住投個政黨,或者已經唔信個制度,以上都唔緊要,大家放眼將來,好好運用,將區議會變成一個 buff,只要成功運用呢個 buff,每年每區都有大量資源幫你同暴政抗爭!

Demo:

XXX 議員:

您好。本函投訴_______________事宜,促請閣下認真審視相關問題。

本人是 XXX 當區選民。本人對於 閣下過去四年來的地區工作有不少意見,尤其對於閣下經常未有認真聆聽選民意見,並鮮有露面深感不滿。當下香港有大量深層次問題未待解決,閣下作為政府與市民之間的溝通橋樑,應該及時反映居民意見,但 閣下態度輕率未以為然,以致本區___________________________成為其中一大問題,本人對此深感不滿。

基於以上問題,請你反覆檢討過往工作,並且爭取在餘下任期完成_______________,克盡本份。來函並送交候任區議員_______通報詳情。敬請回覆,謝謝。

XXX 當區選民

年月日

 

 

發表意見