假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/5/22 - 18:21

還可以怎麼辦

聽到中共實施國安法,好多人立即恐慌起來,據說網上搜尋移民的次數大增。

首先,勿恐慌,冷靜先。中共不禁止人移民,有能力走的仲大把機會。其次,依家響出面拋頭露面反抗中共的人都未恐慌,你恐慌做乜。第三,就算真係有國安法,頂多收聲唔響 Facebook 同外面鬧中共囉,唔洗死格,十幾億人比中共直接統治緊都未死啦,只係香港唔再係香港之嘛。同埋就算你移民咗去第度,嗰度都唔會係香港,香港永遠只有一個。最後,除非你誤以為 35+ 否決預算案已經係終極攬炒,或者搞 DSE 搞港台搞立法會已經係攬炒,否則其實攬炒講緊的最壞情況一路都係中共出解放軍同一國一制,大家唔係冇諗過會變成咁,只係依家可能快咗。

不過,就算我已經有依個心理調整,我都係唔會忿氣,至少直至佢正式實施前一日,都要發出最後的吼聲。

廣告

同埋要做到同中共攬炒,國際線係好重要,嗰方面仲好多嘢可以做,尤其係請身處海外的手足幫手。首先係游說外國政客,中共出手就必須制裁、必須付出代價,唔好空口講白話。下面再詳述。跟住請香港人大量開海外銀行戶口同換美金。最重要係各方組織同手足的資料,特別亦金錢交易,都應該盡快搬離香港,如果仲未搬,依個係為咗減少秋後算帳可以捉到的人。最後,文宣同文章都在海外伺服器存底,盡力在異鄉保留香港文化香火。

游說外國政客,最重要都係美國同歐盟,因為佢地最有牙力同中共抗衡。當然我跟住講的對實際落手落腳做緊的人可能只係班門弄斧,但都想講一講。首先除咗強調民主自由同香港人幾慘,動之以情,要盡量連結實利,中共搞香港會點樣實際影響埋佢地。例如搞香港證明中共對外擴張之野心不死,完全唔會尊重國際慣例同條約,利用香港為其爪牙的人和企業滲透國際社會,陳馮富珍做咗世衛總幹事就令世衛染紅,依家害死全世界。香港亦都係第一個洩漏武漢爆肺炎的資訊,同埋第一個有非大陸專家團去武漢視察的地方,如果外國一早留意香港的資訊同埋戴口罩,而非聽中共同世衛老點,依家死少好多人。如果香港冇哂言論自由,依個重要的資訊來源就會消失。

而除咗對政客的直接游說,都要面向民眾,因為民主社會選民係政客老闆。適逢依家外國人對中國印象轉壞,而美國大選將近,依家做係效果最大之時。一定要諗辦法將香港議題在美媒炒熱,逼美國政客回應,因為選舉將至一回應佢地對中沒有最硬只有更硬。之前賣過廣告,應諗下再賣。同埋要補埋依家對中國的批評係合理的,係為咗普世價值同利益的,完全唔係歧視中國。至於有人話籌錢助選,有危險係對家贏咗就 PK,加上依家國會兩院民主共和兩黨各據其一,必須避免予人偏向某一政黨之感。至於歐盟,百貨應百客,國情唔同策略唔同,對左膠國較強調香港人權被打壓,對右膠國強調中國移民之害,特別對德國同東歐可連結埋佢地歷史講共產黨幾衰。英國同日本,我個人就唔會太大期望。如果可能,印度都應該諗諗。

完全淪陷後香港人亦都唔好忘記團火。好多民族都係被暴政統治,等咗幾十年先有機會見到暴政露出缺口,但有時缺口一出現就滿盤皆落索,原來大家並冇忘記反抗之心。近者,蘇聯一變弱整個東歐爆發民主運動。遠者,武昌起義一成功就大量精英甚至朝廷命官轉態,不但多個省紛紛宣布獨立,其中江蘇、安徽、廣東更係由江蘇巡撫、安徽巡撫、兩廣總督宣布獨立,原來革命氣勢來了咁多人會跳船。美國建國元勳都好多係殖民地社會精英。

所以大家唔好忘記。就算低頭生活,都要積存實力,無論係金錢定知識,同時海外手足繼續活動,同佢鬥長命,等待重光時機。中共政權已經 71 年,經濟狀況已是強弩之末,加上依家世界氣氛轉變,連俄羅斯都開始覺得被大陸害到雞無鴨血,就睇中共捱到幾耐,習總長命定香港人長命。

時間緊逼,思緒不周,不知所云,當係參考。補返句,be water,唔好送頭,來日方長,將來總會有需要大家之時。

ps 加埋我之前在 Facebook 上講過的:嗱,我就唔會坐定粒六覺得咩都旨意哂美國,or 美國出手就一定有效,係就全世界冇哂獨裁國家啦一早。只係,相對香港人自己可以做到的,加上國際線至少成功機會率大啲。

 

作者 Medium