立場新聞 Stand News

「邊個用政治毒害學校?」

2019/10/9 — 18:32

【文:有種老豆】

尋晚,有些家長群組,開始討論係咪要俾仔女戴口罩返學。

一個whatapps 群組,咩人都有,係藍係黃就算唔講明都知。教育局要求數口罩人數,口講話唔要政治入校園,實際上就係曲線用政治令學生反枱,同學之間,師生之間都無曬信任,一間學校就咁俾呢班所謂負責教育嘅官員害死。

廣告

一直以來,阿叔都唔反對學生理政治,但當教育局話要數人,就實令好多學生想抗爭,甚至可能話「邊個唔戴口罩,就唔係自己人。」呢一句說話,有人當講笑,但隨時會成為一個欺凌嘅最大籍口。

作為一個老豆,我最唔想見到有學生被欺凌,不論任何立場,一個人係成長嘅階段受到欺凌,個傷口係一世。正如今日被警察打嘅呢班中學生一世都唔會原諒警察,受到欺凌嘅同學,會產生好多與人相處嘅問題,甚至對所有人失去信任。

廣告

係呢個時候,我決定去問個仔,你覺得點?

其實呢幾個月,我一直都好少同佢傾政治,作為老豆,我只希望佢發完夢可以平安歸家,飲湯食飯。真係大戰前夕,我都會上gear,係前線希望救得走佢。所以其實我預左佢會話「戴!點都同佢企硬!」

「我應該唔會戴口罩。」

阿仔嘅答案,令我意想不到。

「我覺得好有壓力,其實唔係戴與唔戴嘅問題,唔係怕咩違法,純粹係有少少朋輩壓力。我唔想成班人之間又有咩心結。煩死人!」

「何況,一陣有人篤灰就好麻煩。」佢笑一笑就自己返左入房。

上年聖誕仲同我爭取買 PS4 嘅呢個𡃁仔,今日居然講得出咁嘅一番話,做人老豆嘅,其實都幾 proud。呢幾個月,政府用盡全力搞撕裂搞分化,希望令人與人之間失去信任,彼此割蓆。但呢班年輕人實在聰明過林鄭好多,知所進退。

最重要係,佢地個心係愛護其他人,唔想傷害到人。根本唔重視他人死活嘅林鄭又點可能拆得散佢地。

發表意見