立場新聞 Stand News

醫管局幾時出嚟譴責自己?

2020/2/12 — 16:44

醫管局行政總裁高拔陞

醫管局行政總裁高拔陞

大家仲記唔記得喺醫護罷工嗰個禮拜,醫管局行政總裁高拔陞每次出嚟見記者,都係到苦口婆心、動之以情咁講醫護罷工點樣影響咗公眾,講有好多手術都因為醫護「缺勸」嘅情況之下被逼取消,病人嘅等待遙遙無期,甚至影響到一啲癌症嘅病人手術。好希望醫護可以「回心轉意」,以病人嘅福祉為依歸,停止罷工。再次道德勒索醫護,分化市民同醫護,甚至將病人福祉同醫護罷工刻意造成對立。

咁大家係咪覺得自從醫護罷工過後一個星期,隨住啲醫護返番工,啲受影響嘅服務就已經恢復正常呢?病人係咪就可以做番手術呢?

事實上,本身喺流感高峰期公立醫院嘅病床已經不足,加上武漢肺炎嘅疫情,好多外科病床都被調派作內科病人之用,好騰空本身嘅內科病房接收武漢肺炎或其他流感病人,加上為咗減低醫院人流同交叉感染嘅機會,好多非緊急手術喺醫護未罷工之前已經受到影響,即使唔罷工已經取消或延遲。

廣告

而呢兩個禮拜嘅情況更加嚴峻,主要原因係因為個人保護裝備 Personal Protective Equipment(PPE)使用量大幅增加,加上訂貨貨源延遲或者來貨不足,醫管局嘅庫存量大跌,口罩僅夠一個月之用。部份醫院嘅庫存量更加令人擔心,好似噚日流出嚟嘅一張聯合醫院 PowerPoint 截圖,N95 同防水衣嘅庫存量只有五日。所以各醫院嘅管理層同病房都無所不用其極咁推出唔同嘅措施嚟減省口罩同其他 PPE 嘅使用量,好似東區醫院病房要派紙袋俾員工重用 N95屯門醫院內科醫生要配給口罩等

其中一個最大嘅舉措就係大幅削減同取消非緊急手術,即係高拔陞口中講「受醫護罷工所影響嘅服務」。根據前線醫護報料,伊利沙伯醫院大幅削減五成嘅手術,北區醫院僅僅剩番三成嘅手術,目的就係為咗慳 PPE。每個手術都係一個高風險嘅過程,而根據美國疾病管制與預防中心(CDC)嘅指引,每次喺高風險程序後都必須即刻掉咗成身嘅 PPE 包括 N95,所以每多一個手術 PPE 嘅消耗量係多好多。喺 N95 嘅供應非常緊張嘅情況之下,醫管局係被迫取消手術,用番佢哋嘅用語嚟講,係直接影響咗病人嘅福祉。

廣告

如果醫護罷工導致手術延期或被取消就要受到社會譴責,咁因為管理不善,訂唔到足夠嘅防護衣物去維持手術嘅醫管局高層,又駛唔駛負上「道德責任」,影響到市民嘅利益呢?點解因為罷工就日日出嚟講市民點受影響,但係因為 PPE 唔夠自己取消手術同服務又唔日日強調呢?唔通市民無知情權得知點解自己排咗好幾年嘅手術會押後或者取消?定係又想唔聲唔聲咁計埋醫護罷工頭上?

為員工提供安全嘅工作環境係每個僱主嘅責任,亦都係受 Cap.509《職業安全及健康條例》所保障:

第 6 條ㅤ僱主須確保僱員的安全及健康

(1) 每名僱主均須在合理地切實可行範圍內,確保其所有在工作中的僱員的安全及健康。

(2) 僱主沒有遵守第 (1) 款的情況,包括(但不限於)下述各項 —
ㅤ(a) 沒有提供或維持在合理地切實可行範圍內屬安全和不會危害健康的作業裝置及工作系統;
ㅤ……
ㅤ(e) 沒有為其僱員提供或維持在合理地切實可行範圍內屬安全和不會危害健康的工作環境。

(3) 任何僱主沒有遵守第 (1) 款,即屬犯罪,一經定罪,可處罰款 $200,000。

(4) 任何僱主如蓄意地沒有遵守第 (1) 款或明知而沒有遵守第 (1) 款或罔顧後果地沒有遵守第 (1) 款,即屬犯罪,一經定罪,可處罰款 $200,000 及監禁 6 個月。

為僱員根據美國疾病管制與預防中心嘅指引提供足夠嘅保護裝備,正正係醫管局作為僱主嘅法律責任,醫管局無能,履行唔到相關責任反而「道德勒索」醫護,要佢哋自購裝備,或者係保護裝備不足嘅情況下勉強去返工根本就係本末倒置,顛倒是非;而蓄意隱瞞因為 PPE 不足而影響服務更加係雙重標準,其心可誅。

發表意見