立場新聞 Stand News

醫管局拒透露警長病情ㅤ公院醫生:著得病人衫,就係自己(病)人

2020/4/10 — 21:01

【文:王思啟(公立醫院急症室醫生)】

今次我撐醫管局。

PTU 警長嘅病情無疑係最近眾多武漢肺炎患者之中最受矚目的一位,沒有之一。原因無他,佢係香港警察。而警察同香港人嘅關係有幾好,大家心裏有數。

廣告

筆者喺哩兩日都收到唔少讀者嘅查詢,問「呼吸衰歇」即係點、「插喉」係唔係即係好差、「佢會有事㗎呵?」,個個都好關心哩位警察會唔會好唔返。面對全港市民嘅高度關注同問候,唔洗幾耐底都一定俾人起埋,對病人及其家人都一定構成沉重壓力。再者患者只不過係一名基層警員,佢嘅病情應不涉及重大公眾利益。醫管局今次為咗平衡公眾知情權與病人私隱,決定雙重標準,筆者覺得無可厚非。

老土啲講句:著得哩件病人衫,就係自己(病)人。為病人最佳利益出發(Best of Interest)係醫護人員之天職,無論喺醫院定喺理大,無論喺當班定休班,都係不容踐踏。今次醫管局嘅雙重標準,就係要保障病人嘅最佳利益,免受滋擾。要破壞醫護專業同醫患信任嘅人,醫學界都唔會令其得逞,引用一句更老土嘅說話「over my dead body」。

廣告

筆者作為急症室醫生,自反送中以來,一路喺最前線與香港人同行,香港人片體鱗傷,歷歷在目。不過醫護之所以喺香港蒙受尊重,就係因為喺困難嘅時候都能夠撇開個人感情,恪守專業,守護病人,無論係十惡不赦之徒抑或無辜的小市民。

天理循環,報應不爽,若然未報,時辰未到。

 

作者自我簡介:公立醫院急症室醫生,做到隻狗咁,是為 #dogtor。鍾意寫字,作品與《明報》、《蘋果日報》、《亞洲週刊》、《明報月刊》有緣。

(標題為編輯所擬)

作者 Facebook

發表意見