立場新聞 Stand News

【長文慎入】和理非,可以有幾勇武?

2019/11/22 — 18:20

作者 Facebook 圖片

作者 Facebook 圖片

「明白呀,我記得我離開以前間公司嘅時候,已經做咗十三年,其實我好鍾意間公司,但係自己諗過,想要有一個突破,結果我就決定辭職。所以我真係明白,唔需要擔心。」

我老細真係絕非「腦細」,連我跟緊個大 project 之際,「驚喜式」辭職都可以咁體諒人。

係呀,今朝,我遞咗大信封,決定離職。

廣告

二零二零年一月一日開始,我會脫離我深愛嘅全職工程師身份,喺自己「三張」來臨之前,開展我人生嘅另一個階段。

「癡撚咗線咩你!你間屋啱啱先起完,仲有排供,個仔先幾大呀,仔細老婆嫩,萬一你病咗無得放病假咁點?生多個,又無得放產假……仲有呀,保險呢?無老闆幫你畀,要自己畀哂呀!幾多人幾想做你份工,你竟然一句話想辭職就唔撚做?你係咪 hi 大咗?」

廣告

屌得你咁應嘅朋友,其實好多時候係真心的。

「你啱。不過你第一日識我咩……我十年前 quit U 去德國讀書,你咪又係係咁屌,過咗幾年就話我走得好以後唔好返嚟,鬧我衝動之前唔該你收一收皮先啦。」

俾我咁駁法,佢又真係一時之間諗唔到點駁返我轉頭,一蕉皮爾修。

雖然咁講,但係佢講得啱,我呢個決定,其實唔係我自己一個可以做,因爲有咩差錯,唔係得我自己一個受,我老婆同個仔真係好「無辜」。

同我老婆一開始傾呢個決定,其實佢都好驚。論點同我朋友一樣。佢覺得工程師係一個「專業」,放棄呢個專業,唔單單係放棄一份薪高糧準嘅工作,而係會令自己走入一個充滿未知數嘅生活模式,佢覺得好大壓力……做一個專業人士,簡簡單單咁生活咪幾好。

咁我就同佢針對每一個未知數嚟傾,一路傾,佢開始明白我嘅構思,佢恐懼嘅感覺都越嚟越少。

「其實搵得你呢個老公,都無得唔支持你,你就係鍾意冒險,Es ist in dir,否則你十年前都唔會夠膽嚟德國。」

仲有一樣嘢,令到佢好支持我:佢其實比我更加愛香港,佢喺香港嘅美好時光,令到佢更加想香港浴火重生,所以佢好明白我希望可以做得幾多得幾多嘅心情。

早兩日去慕尼黑做分享,佢一開始都係話「你唔係上晝返完工,揸四個鐘車去講一個鐘嘢然後揸多四個鐘車返嚟呀嘛?值唔值呀?」

好彩,個分享好成功,而且有 MdB 出席,我做完分享之後,呢位國會議員毫無架子,攞住杯啤酒,即刻拉住我斟,希望有啲幫到香港嘅安排可以立刻做到。

同我老婆講完之後,佢終於話佢 zuversichtlich,呢個字唔知點翻譯,類似有信心,有希望,樂觀啦。佢話會百分之一百支持我。

今日交完信,成個人鬆哂,我個 to do list,上面幾十萬樣有關香港嘅嘢,終於有機會可以清。

登報嗰一輪,因為時間實在太緊逼,朝早起身返工,放工之後湊仔,到佢瞓咗之後就坐喺部電腦前面,做到兩點幾,真係做到個人虧咗,老細都睇得出,插過我唔好搞到自己變咗喪屍咁樣……

嗰時我返工當「休息」,放工先「返工」,老細詐我型,確實正常不過。

做完嗰一炮之後,真係要潛陣水,係有諗過直頭唔做,覺得自己根本無能力應付到,要承認自己嘅不足,摺埋算數。

但係當你以為,香港局勢唔能夠再壞落去嘅時候,7.21,8.31,10.1,11.11 呢啲數字接連出現,人地問到你可唔可以幫手,你根本就無能力 say no……

咁我呢邊唔 say no,我點爆啲時間出嚟?本來打算同公司申請減工時,老細都批咗㗎啦,不過我諗諗下,減嗰少少工時,都係杯水車薪……

都係直接 quit 最爽快。

我想做一個最勇武嘅和理非,同大家一齊打呢條德國戰線。

「咁,你即係全職投身社運?」我講咗個計劃俾朋友聽,佢咁問我。

唔係。

一:社運人士呢個名詞,我覺得有一條線要跨過,唔係求其搵個阿豬阿狗,做少少嘢,就可以話自己係社運人士。真心講,我自己六月以嚟,做咗嘅嘢,相比其他香港人,少之又少。你諗下,我喺德國䟴䟴腳,做下鍵盤戰士,連一絲 TG 都未索過,就唔好用呢啲朵,我最多係一個熱心嘅香港人咁大把。

二:我辭職,主要係想喺呢段時間回下氣,跟手做下自己一路想做,我認為會幫到香港嘅嘢,但係我都要搵食,所以我嚟緊嘅工作轉型,唔會係開善堂。話定俾你地聽,我好想食人血饅頭 — 雖然啲血我自己預先嘔咗一攤出嚟自己點住先。但係,長貧難顧,我會堅持我做嘅嘢,一定要係商業可行性行先,咁就唔好打住啲社運標籤,慈善旗號嚟呃 9 啲香港人。

係呀,我鬧緊香港啲慈善機構呀,收埋收埋咁多香港人捐款,要你地幫手嘅時候,你地死咗去邊?

我之前一路都有一啲既可牟利,又可以幫到香港人嘅概念,但係好怕有人會話我踩喺香港人嘅屍體上面搵銀,所以一路都唔敢實行。

依家?我反而放開咗,只要公開透明咁同大家講清楚我想做咩,覺得值得俾我賺嘅就支持,覺得我食你人血饅頭嘅 — 我份可以打足一世嘅長工都夠薑劈炮唔撈,你認為我會介意你點睇我?

嚟緊嘅日子,我會諗清楚哂所有我想做嘅嘢,一次過同大家交待,希望大家到時可以支持。

和理非都可以好勇武的。

光復香港,時代革命。五大訴求,缺一不可。

 

作者 Facebook

發表意見