立場新聞 Stand News

關於區議會選舉,外國記者問我點解只爭取議會過半

2019/11/23 — 16:09

黃之鋒,圖片來源:黃之鋒 facebook

黃之鋒,圖片來源:黃之鋒 facebook

昨日有個德國記者問我,依家香港兩派各不相讓,社會分裂得好嚴重,幾時先會有社會共識。

我就嘗試同佢解釋,無錯香港係分親北京同支持民主既兩派,但依家要求獨立調查委員會呢項訴求,根據民調已經有超過八成香港人支持,其實香港社會已經有共識。

聽完我咁講,佢都好似唔係好明,又話佢訪問過好多人同屋企人政見不合啊,仍然堅持同我講話「乜民意唔係已經逆轉左咩」

廣告

我嘗試同佢講,無論中文大學定民意研究所,過去都有每個月做恆常民調,就算大家對抗爭有唔同睇法,但獨立調查警暴,個支持度由六月六成升到依家八成幾咁,所以結論係香港社會真係無佢想像中「後生仔好支持 中年人勁保守」既假設。

聽完之後,似乎佢唔太接受到民意方面呢,原來數據反映得咁明顯同偏向示威者既事實,我估係呢個同各國示威既普遍狀況都有唔同啦,之後佢就話「我之前訪問立法會議員都係反映支持中國政府既聲音,邊會咁團結架」

廣告

「即係呢,你訪問個立法會議員都唔係直選產生,咁佢係中共欽點既,又點會反映支持民主既訴求,如果有全面直選佢就已經失業架啦……」

佢聽到呢度之後,突然將話題一轉 —— 「如果你講到無八二比,都至少有七三比……咁點解你地只係爭取議會過半,而唔係爭取贏曬四百幾個議席?」

我最後既答法就話,無論過半定贏曬所有議席,個重點都係拎到區議會控制權,下省五千字。

引述呢段對話,純粹係見到網上好多人拗「到底應唔應該話呢個係變相公投」,我既答案係無論你當唔當呢個係變相公投,國際社會都會當呢次係公投,我地自己點樣爭論,都唔會改變到外媒記者,將聽日投票視為向中共表態既客觀現實。

唔知聽日過半機會有幾大,好坦白講自己都評估唔到,分分鐘歷史上首次票數過半,但反而議席過唔到半,所以拜托各位明白,各自守好個崗位。

國際傳媒個個星期都會問我「民意幾時逆轉」,似乎一般示威既劇目,抗爭得耐同埋武力上升,民意在世界各地就一定一定逆轉,聽日表態既票數夠多,國際戰線會打得順手好多,大家努力,選舉呢座山我地先要贏。

發表意見