立場新聞 Stand News

關於 7.21,大家經常忽略的一幕

2020/4/21 — 21:53

圖片來源:Now 新聞 — 7.21 警方上環驅散示威者未有示警橋上開槍( https://bit.ly/2wTcDHA )

圖片來源:Now 新聞 — 7.21 警方上環驅散示威者未有示警橋上開槍( https://bit.ly/2wTcDHA

我相信,世界冇咁多巧合。

追究 7.21 元朗恐襲,我地不能不探究背後因由。

7 月 21 日,前線抗爭者第一次喺 2019 年高喊「光復香港,時代革命」,直搗侵蝕香港人權自由幕後黑手嘅核心 - 西環中聯辦,並將漆彈擲向中共政權嘅象徵。

廣告

相信向中聯辦進發呢一個行動,真正令到呢個政權震怒。因為喺 6.12 之後,港共黑警事隔超過一個月都未曾再次發射橡膠子彈。包圍警總時候冇,「光復上水、沙田」等示威冇,甚至 7.1 攻佔立法會,都冇出現過橡膠子彈,當時嘅黑警一直都忍住咗手。直到 7.21 ,黑警先第二次發射橡膠子彈 [1]。呢一日,佢地喺未有用橙旗警示下,多次從天橋高處,狩獵式槍擊示威者,開咗超過 30 槍。

第二次開槍呢件事,本應係當時輿論焦點,理應全港震怒鞭撻。但偏偏無獨有偶,黑警喺上環開槍同時間,就出現大家都熟悉不過、更為瘋狂嘅元朗恐襲。結果,當晚嘅輿論焦點,以至時至今日,大家都比較少提起, 7.21 黑警為咗保護中聯辦,不惜喺忍手超過一個月後,再破殺戒開槍槍擊香港人。自此以後,開槍正式成為常態。我總係認為,每一件事,有一,未必有二,可能只係單一事件,但有二,就必定會有三。而呢個就係經常被遺忘嘅 7.21 上環嘅重要性。

廣告

而家,我請大家再一次記起,再一次提醒身邊人。7.21 嘅警黑勾結,絕不止於嗰 39 分鐘,不止於兩名黑警轉身離開嘅一幕,更加係有上環黑警同時所開嘅 30 槍,上環前線抗爭者嘅每一滴血。

7.21 呢單千古冤案,我地香港人必定追究到底。

 

[1] 補充:6.12 至 7.21 間嘅多次示威行動中,只有 7.1 開咗 6 發海棉彈,並冇橡膠子彈。而 7.21 當日,有 9 發橡膠彈,25 發海棉彈。資料來源:關鍵評論網〈612 至 11 月底,警方發射的各種彈藥數量〉

作者 Facebook

發表意見