立場新聞 Stand News

陪審團制度受《基本法》保障,葉劉僭建「國安法」架構

2020/6/8 — 21:32

葉劉淑儀,圖片來源:商台片段截圖

葉劉淑儀,圖片來源:商台片段截圖

葉劉以行政立法兩會議員身份,再為「港版國安法」說項,今次提到國安法不適合由陪審團審理,公然違反《基本法》入面嘅條文

基本法第八十六條

原在香港實行的陪審制度的原則予以保留。

喺現時嘅司法制度,高等法院原訟庭設有陪審團制度,用嚟審理一啲案情嚴重嘅案件,例如謀殺、強姦、販罪等嚴重罪行,陪審制度嘅保留係受到《基本法》第八十六條明文保障,就係為咗防止司法被裁獨政府所壟斷,成為任意檢控嘅機器。陪審團喺司法中加入人民嘅角度,注入民主元素,陪審員喺法官嘅引導下,以一般人嘅視角作出對於事實嘅裁決,保障被告嘅利益,係普通法制下行之有效嘅基石。

廣告

國安法當中嘅顛覆國家、分裂國家等罪,根據 2003 年嘅 23 條立法草案,屬於可被判以終身監禁嘅嚴重罪行,遠遠超過區域法院最高七年嘅刑期,所以理所當然地係要由高等法院原訟庭經過陪審團審判定案(當然如果國安法喺大陸法院到審就係完全另一回事)。葉劉喺國安法未有任何細節嘅情況下,就預先放風唔可以由陪審員審理,係破壞《基本法》下司法獨立嘅鐵證。

葉劉指出由陪審團審理涉及國安法並不適合嘅原因,無一個站得定腳:

廣告

1. 「過去香港極少審理涉及國家安全的案件」

「國安法」係首次喺香港立法,咁立法前當然唔會有涉及國家安全嘅案件,呢個根本係「套套邏輯」,完全不成理由。同理,喺 2003 年立 23 條前香港都無審理涉及國家安全嘅案件,咁點解當年葉劉自己做保安局局長嘅時候又會將「必須有陪審員審訊」的建議加入條例草案呢?

2. 陪審團可能會驚被「起底」

如果陪審團驚被「起底」就唔用陪審團制度,咁日日喺到審緊啲強姦、謀殺、黑社會、販毒等案件,陪審團被起底嘅機會多啲吖,定係嗰啲俾人拉「顛覆國家」、「分裂國家」嘅人會報復嘅機會多啲?咁關心陪審團嘅安危點解從來唔見佢出聲講審其他暴力犯罪案嘅陪審團私隱同安危?再退一步講,如果陪審團嘅私隱或者安危受到威脅,都應該係司法機關同政府嘅責任去保障佢哋嘅安全同堵塞呢個漏洞,而唔係因噎廢食,完全推翻陪審團制度。

3. 既然「國安法」係得到全部市民支持,咁驚乜?

林鄭、建制、中央一直都話維護國家安全立法係得到香港廣大市民嘅支持,收集到成二百幾萬個簽名,既然全香港人都咁重視國家安全,喺香港市民度揀嘅陪審團,一定會公正無私咁將嗰一小撮危害國家安全嘅壞分子繩之於法,比起由啲唔知係咪愛國愛黨嘅法官審更加可靠,咁葉劉驚乜?

當然,《基本法》最終嘅解釋權喺人大到,「國安法」違唔違反《基本法》係中央說了算,唔係法律本身,呢個就係香港現時體制下嘅最大悲哀。所以只要立場正確,葉劉係唔會被控以不擁護《基本法》而被 DQ。喺香港,「法治已死」並唔係口號,而係鐵一般嘅事實,喺政治之下,法治只容許配合,不容許異見。

發表意見