立場新聞 Stand News

陳家駒:美國總統選舉,香港人點解仲要沉默?

2020/10/25 — 13:40

作者製圖

作者製圖

【文:陳家駒】

(編按:陳家駒為流亡海外的香港獨立聯盟召集人)

仲有唔夠兩個星期,美國就會選出一個新嘅總統,人類嘅命運將會由嗰一刻開始撤底改變,一面是強硬對華甚至滅共,一面是完全妥協甚至暗幫中共回血。任何一邊上場都會產生同另一面完全不一樣嘅結果。我由好早以前已經唔相信所謂反共係兩黨共識,由民主黨嘅金主係華爾街人,賀錦麗要得到其認可,種種事情已可得知民主黨當中關係已經離唔清中共。

廣告

整個民主黨嘅支持社群由荷李活電影到矽谷科技人,無一群係同中共無關係,只要中共繼續同美國友好,呢一班人就會得到更大利益。

係出呢一篇文章之前,我留意到身邊好多人都有種心態 「美國人普遍都唔支持 Donald Trump,我哋千祈唔好得罪呢班美國人」 。好多人都想係任何情況下坐享其成,盡量計算自己付出同風險,然後拎盡所想要嘅收獲。係美國大選下,香港人基於反共為兩黨共識,不斷想討盡兩邊人對香港抗爭嘅同情,而因為支持 Donald Trump 會受到一連串嘅輿論攻擊,失去道德高地,反之就算得閒抽水聲討 Trump 如何唔尊重女人,唔環保等議題就相安無事。香港人跌入一個極度「欺善怕惡」嘅思想陷阱入面,並且開始忘記抗爭嘅本質。

廣告

現時主流上對 Donald Trump 嘅評價係極不客觀,已經失去公義。Trump 上任以嚟一直兌現佢對美國人嘅競選承諾,而佢唯一做唔到嘅係將希拉利等人送入監獄。Trump 上任後民主黨全力動用左翼媒體抺黑,有大大小既反 Trump 遊行,全方位人格謀殺。呢四年間,Trump 一直受盡傳媒不實報導攻擊,通俄事件最後亦淪為笑話,但作為總統嘅佢一直無針對民主黨,所有操作都係以政策同目標行先,唔執着於無謂嘅政治攻擊遊戲。作為美國總統,佢平定中東局勢,提升國內就業,經濟,美國國力等根本就超班。但佢大部份政績亦無被煲大,甚至自己都唔刻意宣傳,只求自己支持者明白就好。所有功勞都被掩蓋,自己言行被不斷抺黑,甚至將其由最受黑人歡迎的共和黨總統講成為針對黑人的白人種族主義者。相信面對種種政治攻擊的壓力下,無乜邊幾個政治人物做到好似佢咁,仍然正面面對到。

而Trump支持者,即使如陳光誠這樣的重要民運人士,都被左派網上輿論在網上連群結黨將其嘲笑成盲人演員,收共和黨錢等。當關係到 Trump 嘅時候,大愛和平反歧視通通都不適用,黑人 Trumper 也不再是黑人。

要搵事鬧 Trump 係非常容易,求其搵網上一兩張 Meme 圖或者搵 Simpson 反侵數十條就有。好多香港時事評論人亦根據北美媒體及政治經驗,將自己變成環保少女一樣口吻,對其由上至下,左至右整齊批評一次。但呢批人從來無諗到香港現時係美國最大嘅支持,都係由其共和黨政府成員申出援手,拜登選舉時亦無提過香港。即使你批評過Trump,假若佢最終亦能成功當選美國總統,佢都唔會唔理你,在公在私共和黨政府亦會繼續係香港問題上針對中共。但好多人認為如果而家支持 Trump 或者批評 Biden,當 Biden 最終做咗美國總統,佢就可能會記住香港人得罪過佢而唔幫,甚至針對香港。有呢種想法嘅人,真係非常幼稚,因為呢一種人無論如何最終都會因為利益而出賣香港甚至所有同自己無關嘅事物。而如果你本身係相信 Trump 係反共及香港人的最大後盾,但因為強大嘅媒體壓力下而唔敢講出聲,呢一種只係對惡勢力嘅妥協。

我唔能夠話香港人係呢個時候支持 Trump 會對美國政局影響有幾多,但至少我唔希望佢哋對香港人嘅所有幫助完全無人提及,係佢哋最需要支持嘅時候,我哋為咗唔得失任何一方而冷眼旁觀。我仲好記得上年當我同幾個手足慢慢步入機場嘅時候,眼前望住數十萬人迎面離開,話係因為解放軍會嚟,機場好危險等等。而當日就係 Donald Trump 所講,阻止咗中共對付香港人嘅同一件事。如果當時嘅政府仲係奧巴馬,我相信我好有可能已經死咗係機場。

我知道我出呢篇文章將會承受好大風險,之後國際遊說好快就會有一大批左翼政客不能約見,甚至影響整個政治生涯。但我自從投身社運開始,都只係想做一個講真心說話,對得住自己嘅人,呢種想法使我係社運冷淡情緒下宣揚港獨。我唔識得每一件事都去附上意見評論,係大眾情緒最高漲時講大眾啱聽嘅說話,或許未係一個成功既政客。但我講既每一件事,都係附上真實情感,講出而家時勢需要嘅說話,即使嗰啲說話好多人唔啱聽。

支持 Donald Trump 並唔單止見到不公義而不吐不快,甚至係當拜登上台後,我認為香港甚至東亞局勢將會進入被共產黨完全滲透及控制嘅危機。即使四年後再有共和黨上台,要修正呢四年間嘅破壞亦非常困難,所以無論如何今次美國總統選舉,共和黨都必定要贏,我希望各位在 Twitter 戰線及其他媒體當中表達出香港人對共和黨政府的需要,盡最後一分力令 Trump 獲得最大勝算。

作者 Facebook

 

發表意見