立場新聞 Stand News

雙.對論之〈合一〉

2019/12/2 — 18:33

立場新聞圖片

立場新聞圖片

本博名叫「沉默是銀」,自己思考之餘繼而拒絕沉默持續發聲係應有之義。隨著香港出現史無前例嘅政治風波,區議會一夜之間變天,香港人需要持續思考出路,公民社會需要大家持續為我城明日籌謀。筆者兩年前在轟動一時的七警案審結時,第一次邀請友人「雪廠街史公子」同我一起就同一社會事件,從不同角度撰文,成就第一篇「雙.對論」。筆者今日決定為香港貢獻綿力,開放此博與各位集思廣益。如果你有題目有興趣想寫,抒發己見,只要你的文章對社會有益,或者是對不同陣營善意的批評,筆者答應向你借出平台,而且會就與你商議好的同一議題也寫一篇文,兩文合組一文以「雙.對論」系列刊出。大家就算立場相拒,亦可以文會友,共同為香港貢獻綿力,而「雙.對論」系列亦會一起在筆者《立場新聞》的專欄内刊出。有興趣者只要 PM 我就可以

「雙.對論」的第二篇文章,筆者邀請了朋友「跑唔喐嘅 IT 佬」獻文,我們兩人一齊就區議會選舉之後的大勢從不同角度分析:跑唔喐嘅 IT 佬嘗試從「和勇合一」的角度寫作,而筆者則由「黨素合一」的角度出發。所以這篇「雙.對論」,叫作〈合一〉。

〈區議會之後:黨素合一〉by 沉默是銀

非建制派在是次區議會選舉中有如海嘯般席捲全港。反之傳統建制大黨如民建聯、工聯會、經民聯都出現崩盤式的敗陣,當中代表建制最「勇武」的葉劉淑儀所領導的新民黨更是全軍覆滅。由於非建制議席超半數,可以鐵定手中會掌握選委會超過 100 票,對來屆特首選舉有重要影響力。

廣告

不少坊間分析,雖然非建制大舉拿下區議會接近 9 成議席,但兩大陣營的得票率依然未超六四之比,不能被勝利沖昏頭腦。筆者同意要謹慎樂觀,因為目測戰果,最明顯的勝因是協調成功高投票率以及和勇合一。明年立法會選舉肯定是更重要的戰場,而如果非建制陣營欠缺危機意識不作為的話,上述三個優勢都會在立法會選舉中消失

綜觀非建制陣營,非泛民政黨的區議員佔 80-90 席,數目凜然與區議會第一大黨民主黨平分秋色,絕對是個結構鬆散,但支持者數目眾多的政治力量 — 筆者姑且籠統將他們他們全部歸類為「素人」(雖這叫法與傳統「素人」的定義有差距)。素人們或來自一些今年興起的自發地區組織,或是獨立參選人。他們之間未必有政治聯繫,但都有一個共通之處:年輕,欠缺議政及地區經驗,對傳統泛民政黨有一定抗拒。即使如此,傳統泛民政黨必須正視他們的存在、影響力以及叫座力,將他們整體地視為大家可以平起平坐、一個「無大台」的盟友

廣告

筆者一直堅持能力越大,責任越大。正如社會亂象,政府有絕對責任妥協及糾正,而不是不斷委過於人。非建制奪回區議會,一眾有經驗人脈資源的泛民政黨有絕對責任主動提出與素人們合作,「黨素合一」。事實上,筆者執筆以來,好幾個泛民大黨都展示應有的魄力,例如有政黨公開招聘手足,搞分享會教育新人,提出撥出議會主席薪金支援坊間的民主運動,主席輪替等。制度内「黨素合一」的短期目標是讓這場民意海嘯可以轉化爲立法會的議席,強化制度內的抗衡能力,保護及掩護制度外的抗爭者;中期是讓非建制在區議會內的大多數席位可以延續下去;而長遠來説,則要藉區議會「興革」,在區議會做出真實成績,深化市民對民主議會的信心,將大家對議政制度的要求持續提高,用强大民意逼使建制急起直追,良幣驅逐劣幣。以此為前提,筆者提出幾個主意,抛磚引玉,希望泛民政黨可以主動付諸於行:

1) 素人MENTORSHIP:其實這是「素人講座」的延申,重點是由來自政黨的前區議員為骨幹 + 其他非政黨的前資深區議員 + 諸如法律醫護會計工程等專業人士,在每區組成「顧問團」,將身為區議員的行政知識,議政需知,與政府部門周旋的策略等等,傳授與及輔助素人。第一避免政府以及建制必然隨之而來的 DQ 及干擾手段;第二方面火速協助這些素人投入區議會工作,hit the ground running「著地即跑」;第三為黨素之間建立互信,培養合作的默契。

2) 建立顧問團之後,下一步就是「百日維新」。台北市市長柯文哲以醫生素人的身份參選市長,一躍而成為台灣政壇的超新星,起點正是其「百日維新」計劃。素人容易被人質疑欠缺經驗,而且沒有政黨在背後支持,一旦當選後短期内做不出成績,很快就成為其他黨派鞭撻的目標,工作事倍功半。柯文哲針對這點,參選時定下上任首三個月的工作目標,全部都是一些馬上容易達成的小改善小工程,並邀請全體立委及市民一同監察他的進度。柯文哲本身是醫生,對市内的醫療系統如何改善一直有構思,加上各幕僚的建議,挑選容易執行立竿見影的來推動,令他上任後短短時間就做出實際政績,令選民眼前一亮;其他政敵怯於民意不敢與他刁難,掃除行政機關内的公務員的疑慮,全面歸心協助他施政。新區議會也應該參照這方式,「黨素合一」加上顧問團,挑選短期内馬上能完成的地區事務,一同訂出「百日維新」項目,强化支持者的信心,掃除反對者的疑慮,為其他深度改革及更有規模的項目打好基礎。

3) 「混合名單,赤壁一戰」— 可稱之為「赤壁行動」筆者之前已經提出過這個行動,以統合非建制力量,在 2020 立法會選舉時抗衡配票能力强勁的建制陣營。當年我提出這個行動時時機未成熟,但今次區議會大勝,反送中運動期間的種種,我認爲時機已到。「赤壁行動」名字取自三國時候,劉備孫權兩大抗曹勢力,暗裏不睦,對外卻連合抗魏。非建制陣營要再一次吸引整個光譜的所有選民一起出來投票,就有需要想辦法協助非建制内欠缺大台,結構鬆散,又最容易被 DQ 的板塊連合起來,將他們送入議會,才可吸引這個光譜的選民傾巢而出來投票,將非建制議席數目最大化。方法就是「混合名單」:由泛民內幾位已臨退休之齡的資深議員 — 民主黨涂謹申、公民黨郭家麒、工黨張超雄、議會陣線毛孟靜以及梁國雄 — 在五區各自為一名素人候選人抬轎,自己則坐鎮名單末席。五人可以提早提出這個計劃,讓素人們自行選出適合者組成名單,然後到選舉期,五位前輩的政黨或支持者全力為整張名單造勢拉票。這樣既不怕不同背景的素人被 DQ 而令他們的選民失去投票目標,就算退一萬步政府將整張名單 DQ,被 DQ 者也能以哀兵身份呼籲其支持者投票與另一張泛民名單,嘗試一舉取下兩席。這個行動進可攻退可守,絕對值得各政黨深思。

天下大勢分久必合,合久必分。香港非建制力量多年來不斷碎化,令大家在制度内外合作的空間及意欲越來越細。這次區議會選舉在歷史的背景下締造了史無前例的結果。如果各有心人以大局為重,堅持「黨素合一」— 香港,我絕對有信心會出現大家值得擁有的明天。

✽ㅤ✽ㅤ✽

〈區議會之後:和勇合一〉by 跑唔喐嘅 IT 佬

吸取咗雨傘運動嘅教訓,喺今次運動剛剛開始嘅時候,「不割席,不分化,不篤灰」就已經成為咗呢個運動非常早期嘅口號。亦都因為呢個口號,再加上特區政府做任何決定嘅時候都向住最錯嘅方向,所以造就咗今日「和勇合一」呢個局面。去到今時今日 「和勇合一」已經唔單止係一個口號,喺無數咁多次嘅民調,甚至乎今次區議會選舉都睇到,就算唔可以講民意正式授權,都已經某程度上默許咗勇武派嘅行動

講個故仔。喺 7.21 元朗恐襲之後搞咗一次光復元朗遊行,亦都係第一次發出咗反對通知書嘅非法集會。當時我同幾個遊行嘅初哥一齊去到元朗站,其中一個位初哥同我講話佢好驚,如果出胡椒噴霧就要走㗎啦。點知去到行咗一陣間就已經出咗催淚彈,佢當然嚇到傻咗,即時搭地鐵走人。同一個朋友,係一個月之後做咗家長車,一個禮拜要接送三四晚,正面食過胡椒噴霧,催淚彈放題。去到前線仲會「撚狗」。我呢一個極度和理非嘅朋友,雖然未變到前線衝衝子嘅勇武,但絕對跨過咗之前嘅 comfort zone

喺好多嘅示威現場都會睇到另一種和勇合一,當你有勇武派、衝衝子,喺前線 set 緊 road block,揼緊磚嘅同時,亦都有後勤嘅有人做哨兵,拖手砌緊人鏈傳送緊物資。今次運動之前嘅示威遊行傳物資可能只係傳下遮傳下水。去到今時今日傳物資係傳磚頭,傳火魔法。喂!傳魔法拉得㗎喎,但依然大把西裝友 OL 企喺現場做緊呢樣嘢,你問我,我覺得佢哋都好勇。你可能會話而家去得現場嘅每個都係勇武派,呢個我某程度上係同意嘅,而家食催淚彈係 minimum,但係捐錢一定係和理非啦

你睇下啲法律支援嘅捐款,我相信絕大部分人都明白呢啲法律支援嘅錢係會去幫助一啲被捕嘅衝衝子。但同時我亦都相信好多捐錢嘅人並唔支持直接嘅暴力抗爭,但係點解仲有咁多人捐錢呢?同樣道理亦都有好多唔能夠親身去到現場嘅朋友,但係洗咗好多錢買物資送去畀前線,佢哋同樣未必支持直接嘅暴力抗爭,但係點解仲肯洗咁多錢呢?呢個政府仆街嘅行為當然係主因啦,但另一個原因係佢哋已經視呢一班人為手足、兄弟,只係手法唔同,但目標一政,咁兄弟有難,當然盡幫啦

去到而家咁嘅環境大家仲有啲乜可以做呢?

第一樣要做嘅就係唔可以習慣,有任何示威遊行活動請你抽時間出席,尤其是係由民陣搞或者有不反對通知書嗰啲,星期日尖沙咀毋忘初心嘅遊行係一個好好嘅示範,等大家同埋個政府都知道呢件事係未完,同埋未解決,keep 住個運動嘅 momentum 和理非參與遊行非常重要。

第二係要相信前線手足,去到遊行嘅前線有時會見到和理非同啲衝衝子喺度嗌交,請各位相信前線嘅判斷能力佢哋識得進退有時。亦請衝衝子嘅手足,我明白大家喺前線受到極大壓力,但請你哋同和理非講嘢嘅時候唔好咁惡啦。和理非嘅朋友都係唔想你哋受傷啫。

第三係返屋企幫手寫文宣,無論係 Facebook 嘅 status 定還是係整 poster 落街貼定還是係酒樓飲緊茶嘅時候同啲長輩解釋一下都好,可以做到嘅盡量幫手做,要解釋番畀大眾市民聽點解前線會咁做,而對大家引嚟嘅不便致歉。或者可以引導大家從另一方面諗,例如點解紅隧封咗兩個禮拜,眼見到嘅只係收費亭爛咗,紅隧係政府全資擁有,唔通唔收錢唔得?政府喺 21 號放風話通風系統有問題非常難修理,最快都要十二月頭先至可以通車,但點解區議會選舉之後兩日又可以即刻通返車嘅?

今次運動將會係一個長期嘅抗爭,大家要諗辦法互相支援。有時要適當地走出自己嘅 comfort zone,好多嘢唔試過真係唔知 work 唔 work,大家繼續努力,願榮光歸香港!!

 

#沉默是銀
#SilenceIsSilver
#雙對論
#和勇合一
#黨素合一

作者 Facebook

發表意見