立場新聞 Stand News

願我們分化過後 懂得擁抱對方

2020/4/22 — 15:30

立場新聞圖片

立場新聞圖片

【文:一名讀者】

台灣大選,有幸和民進黨員傾談幾句,佢講咗樣嘢,好深刻,大意係內部初選令佢哋更團結,因為自九合一大選輸到仆直後,大部分人都好頹廢,氣氛極差,直到賴清德出嚟挑戰小英,大家見面就問對方支持邊個、原因係咩,起碼有返啲交流,會再次出力去宣傳。

講真,我聽到呆咗,換轉係香港,賴清德肯肯定係鬼係分化撚,蔡英文就係老屎忽霸住嗰位,兩派人起勢互屌,莫講話更加團結,唔嘈到割蓆已經執到。

廣告

自從理大一役,抗爭開始出現疲憊,武漢肺炎更加係令運動冷卻,不論咩崗位都感覺迷惘,好似搵唔到未來嘅方向,久而久之,就會搵嘢鬧下批鬥下、捉邊個唔做嘢或者做得唔夠多。

好似開頭民進黨嘅例子,良性嘅競爭會促使進步,我唔敢亂定論,但相信佢哋立場愈趨強硬同進取,唔多唔少都關初選事。討論並唔可怕,甚至可能搵到疲倦困境下嘅出路。老實,冇14年打後嘅路線分歧,點樣得出冇大台、勇武抗爭等嘅新方向?

廣告

係啊,我哋要大局為重,亦都冇分裂本錢,但唔需要格硬整返個大台出嚟,次次劈頭就係「三不」,甚至指責提意見嘅人「分化」。我哋要學識嘅,係點樣接納不同聲音、光譜或者行動,明白就算廣義係「黃」,都未必所有立場一致,然後彼此尊重。如果做到,自然冇鬥黃嘅必要。

台灣選舉最後嘅結果大家都知,而民進黨嘅副總統候選人係賴清德,冇錯,小英搵初選對手做拍檔,甚至會幫前時力現獨立、基進黨嘅候選人站台。嗱,當中有咩複雜政治關係我就唔揣測啦,我都知網絡上其實偶有爭執,唔係完全搭曬膊頭咁,但最少人哋臺面上做到和睦相處,接納光譜相近嘅人,演繹咩叫大黨風度。

講到尾,嘈下交冇壞,再親密嘅情侶、家人都會嗌兩句,只係我們分化過後,要懂得擁抱對方。

但係,重點在理性討論,啲私怨批鬥不在此列。即係拎啲冇證冇據嘅消息去針對某條友、單純睇佢唔順眼,或者啲花生是非。咁可能你真係有道理嘅,但打開fb、ig、tg同連登,全部洗版嘅都係內鬥,會睇到攰囉,會心灰意冷囉,一攰咪會戇鳩嘢唔想理,然後就愈嚟愈少人。係,成功其實係靠少數人,但,都要大部分人唔反對你先得架,趕走佢哋都冇意思。

陰陽怪氣、指桑罵槐咁鬧人,其實有咩意思?一係就情緒化咁屌,係發洩咗啊,然後呢?幫到啲咩?唔係下下要功利主義,都無謂情緒勒索,但鬧完,下一步要點?最好當然係道歉、握手言和。只係搲爛曬份面,仲有冇台階落?

至於點樣分認真定花生?呃,首先就唔好一刀切,即係而家好興講嘅「教條主義」,嘗試以事論事,就每一件事去獨立分析。當然,屈埋屈埋會好暴躁,輕則食花生抽水,重則撩事鬥非搵交嘈。點解決?玩動物森友會。認真嘅,投放精力去第二度,遠離是非,或者做下運動緞練,裝備自己。確實難架,共勉之啦。

 

發表意見