立場新聞 Stand News

《香城 Online》升級攻略

2019/11/19 — 22:25

(立場資料圖片)

(立場資料圖片)

【文:Nana】

好多謝呢兩晚出嚟嘅每一位手足,大家為咗 Poly 入面嘅兄弟姊妹真係已經好努力,雖然結果未如理想,但係希望大家都唔好灰心,呢場仗未完,點都要頂硬上繼續打落去,而《香城 Online》嘅致勝關鍵,我覺得就係兩個字:升級。

其實道理好簡單,對家武力不停升級,由最初催淚彈,到橡膠子彈,再到水砲車,宜家直頭音波炮、震撼彈,痴撚線都唔知乜嘢嚟聽都未聽過,我哋一時三刻未反應得切其實好正常,唔需要妄自菲薄。話雖如此,我哋一定要自我要求,下一場仗一定要打得比今場好,如果冇呢個決心,我哋係永遠都唔會贏!不如早啲返屋企瞓覺,接受一國一制算數。

廣告

以下講下我覺得可以點升級:

(1) 裝備升級:到咗而家,好多和理非都係未有全裝,或者覺得可以輕裝上陣,但係其實你睇黑警近排嘅戰術,基本上已經係冇呢支歌仔唱。首先佢哋 TG 放題已經越嚟越痴線,仲要加埋係垃圾大陸貨,又臭又毒又乸,佢狂放幾輪 TG,冇豬嘴嘅人好快就冇哂行動力,根本局住一定要撤退,即係話人數會極速流失,咁樣唔單止令到士氣低落,其他繼續打嘅手足亦都更危險。希望嚟緊我哋可以做到全城豬嘴,就算出去和理非活動,都帶定個豬嘴,咁事實上啲死黑警又真係四圍放山埃二噁英,帶定防具保護自己實冇錯,而且又唔犯法,符合和理非原則。大家生理上頂到,可以繼續 stay 喺外面,先至有得繼續打機。

廣告

(2) 心態升級:以前我間中學嘅陸運會係強制所有學生都要參賽,好多唔鍾意運動嘅同學,就會求其參加啲嘢,然後落場 hea。有時打《香城 Online》,都真係令我諗起中學陸運會,但我哋而家真係生死關頭,危急存亡之秋,唔係志在參與、出現咗就當做咗嘢。希望大家落到場,唔好鳩坐、鳩 fing、㩒電話,如果唔熟架步,可以首先周圍行吓,睇吓啲環境、地形、街名,同埋睇吓周圍有咩幫到手,唔好喺最好嘅時間浪費咗體力。打機打到咁上下,體力消耗得差唔多,就記得唔好勉強,情況許可嘅話搵個位休息下,唞緊先嚟碌連登 FB 都大把時間。同埋,社會運動都係運動,玩過運動嘅人都知,你一定係要不斷追求進步,你游水跑步乜都好,都唔會容許自己停滯不前。打呢隻 game 亦都一樣,希望大家心態上能夠要求自己每次出嚟都比上次行前多一格,咁我哋嘅整體戰力先可以不斷提升,應對敵人嘅升級,就算你係和理非,都可以做一個前線嘅和理非㗎嘛。唔好成日諗住依賴勇武保護你,個概念應該係,勇武負責攻擊,和理非負責掩護勇武,係我哋要去保護返付出代價最高嘅人先啱。

(3) 技術升級:頭先話落到場要認真做嘢,咁究竟要做啲咩呢?其實去到而家,相信大家都搵到自己擅長嘅崗位,可能係文宣兵、物資兵,但其實運動嘅陣式不斷咁變緊,亦即係話不斷會出現啲新嘅角色,例如近排掘地師、路障師、調酒師嘅需求都大咗好多。大家都要靈活啲,解鎖多啲新技能,當每個人都駕馭到多幾個唔同崗位,整體戰力又可以再提升。

(4) 戰術升級:其實一路以嚟都有好多人屌陣地戰,到噚日對家出咗震撼彈/閃光彈(其實係咪同一樣嘢?),基本上係迫我哋完全放棄陣地戰,集中鑽研游擊戰術。黑警其實好廢,佢哋只係裝備勁,無可否認武備上雙方係強弱懸殊,而且仲係越嚟越懸殊。以後唔好再硬碰,唔好再對峙,總之敵進我退、敵退我進,不停搞佢後面,去冇警力嘅地方打機,等佢嘅維持唔到治安,又拉唔到人就啱。

歡迎補充,不完美嘅地方繼續改善,香港人一定會愈嚟愈打得!? 勿忘初心,奮戰到底,我哋嘅目標係打爆機!!!

發表意見