立場新聞 Stand News

香港不能封關的唯一原因

2020/1/28 — 16:24

立場新聞圖片

立場新聞圖片

【文:小市民】

武漢肺炎,連中國內部一啲小村落都知要搵人封村;香港特區政府偏偏中門大開,仲要俾無身份證嘅非港人免費醫。究其原因,都係因為香港人無香港主權,香港只係中國二等殖民地,中國要你做咩,你俾埋條命佢都冇得 say no。

自己條命自己救,香港人要自救,只有獨立一途。

廣告

唔好覺得獨立好邪惡,諗下都唔得,聽我講埋先。古今中外,你打開個地圖見到世界上大部份嘅國家,都係從原有的古老國家獨立出來。

美國獨立戰爭,唔知咩事都有聽過啩?二戰後,全球各國殖民地一個個獨立,印度、馬來西亞、新加坡,以前全部都係英國殖民地。

廣告

又,過去一百年,歐洲版圖不斷變化。冇一個地方,自古以來就係邊個國家嘅一部份。

連儂牆你一定有聽過,連儂牆元祖喺捷克。1993 年 1 月 1 日之前,捷克同斯洛伐克係同一個國家,叫捷克斯洛伐克。

一戰之前,奧匈帝國係當時極強大嘅帝國。而家你喺地圖搵唔到?冇聽過或者隱約聽過?因為奧匈帝國 1918 年已解體咗,當時嘅版圖俾現有 11 個國家繼承咗。

好喇,或者西方唔符合中國國情(雖然中國呢個字都係清末先出現)。講返「中國」,大家最鍾意睇嘅《三國演義》,或者打嘅《三國志》,魏蜀吳,你唔好理佢地爭地盤爭做大佬,咪又係同時存在鼎足而立?

邊個係邊個嘅特別行政區?又唔見邊個走出嚟講,邊度係我自古以來的一部份?

成為一個獨立國家,係天經地義嘅事。

就算你 buy 仔女同父母血濃於水嗰套,阿仔阿女大個咗都要獨立搬出去住啦。細個啲嘅,你啲利是錢都想自己袋自己話事啦。

香港獨立最大嘅障礙,唔在於中國有幾強大,香港人打唔打得贏解放軍,而係在於大部份香港人有冇要獨立嘅覺悟同心理準備。實際點做,之後再寫文講,全世界好多例子可以參考。

肺炎殺到,病毒最平等,不講黃藍,不分貧富。香港人,你準備好自救未?

p.s. To 手足,呢篇文 target audience 唔係你地,例子係想簡單易明,勿插,thanks

發表意見