立場新聞 Stand News

香港人唔係鍾意排隊,係硬頸

2021/4/11 — 12:56

2021 年 4 月 9 日,位於九龍灣淘大商場 AbouThai 阿布泰國生活百貨,在多人正在店內選購。

2021 年 4 月 9 日,位於九龍灣淘大商場 AbouThai 阿布泰國生活百貨,在多人正在店內選購。

呢幾日阿布泰大排長龍,由街頭排到街尾,又由呢條街排到去嗰條街,位位顧客手持一大堆貨品毫無怨言地排足幾個鐘,簡直係世界奇景。

類似嘅景象係咪都似曾相識?

19 年 11 月嘅區議會選舉,2020 年 7 月嘅初選,投票嘅市民就好似今日咁喺票站外打哂蛇餅。

廣告

香港人唔係鍾意排隊 — 出哂名無耐性、追求效率嘅香港人,又點會心甘情願地排幾個鐘,就係為咗投票或者俾錢嗰一吓?

就好似 47 人案開審時西九法庭門外聚集數百人,佢地排隊唔單止係為咗入場(事實上排得較後嘅根本無可能入到),係代表咗一種信念。

廣告

就好似香港人即使嫌人多擠逼、嫌天氣熱滿頭大汗,但大熱天時喺軒尼詩道遊行時愈多人加入、行得愈耐,佢地就愈心安。

就好似喺阿布泰買嘢嘅朋友,可能真係人生第一次見到要排咁多隊買嘢而打從心底覺得高興。

呢種信念,就係不平則鳴,就係「包拗頸」,政權愈要打壓、愈唔想見到,就偏要做。

前年投票時,無人可以預見到係最後一次投一張有意義嘅選票;

去到今年法庭門外排隊、黃店門外購物,同樣地,無人知道係咪已經係最後一次可以做呢啲嘢。

我相信如果今日講他朝連黃店都可以被拉閘封鋪、被控違反「國安法」,無人會覺得係危言聳聽;假如法庭他朝拒絕公眾旁聽,好似中國大陸咁只准許官方律師、人員、公安入內,草草由法庭進行所謂嘅「審訊」,都絕對唔出奇。

事實上,喺國安法庭下,審訊可以閉門進行;而國安法首案,被控一項煽動他人分裂國家唐英傑上庭時,就已被安排拒絕陪審團參與。

好多平時覺得理所當然嘅事情,喺中共全面接管嘅「新香港」,已經唔再咁理所當然。見到阿布泰被爆買盛況,當然會感到香港人依然「喺度」,只係轉咗方式去表達不滿同抗議;但同時,喺權利不斷被剝削、欺壓下,卻只能透過銀紙去表達不滿,亦再次證明香港自由嘅沉淪係嚟得幾咁快。

不過,去到最後,都證實香港人嘅本心仍在 — 只係換咗一種方式,只能夠用更委婉嘅方法去做。呢種團結、支持、熱血,不論形式,同樣重要。最起碼我地話到俾同路人知 — 你身邊仲有好多人,從來,都無放棄。

 

作者 Facebook
 

發表意見