立場新聞 Stand News

香港人喺區議會贏過半議席?大數據話係得嘅

2019/11/23 — 19:05

【文:Veektop】

呢個 post 重點係討論緊點樣最大化(maximize)本土 + 民主派響區議會嘅議席,如果大家仲對含唔含撚去投票有疑問,可以睇返我上一個 post :)

數據

  1. 社會集體黃移
  2. 選民年齡與支持建制成正比(2016)

重點

  1. 投票唔一定係想泛民贏,而係要建制輸。無論嗰區有咩泛民/本土/熱狗,含淚投黃包生仔
  2. 傳統選舉智慧覺得老人票(60+)多係錯誤的,只係年輕嗰代(18-30)唔投票
    1. 如果今年年輕人投票率能夠回復 16 年立法會的數字(55%),甚至更高(expect 70%),那麼從今日開始,區議會就係黃營嘅天下
  3. 中立嘅人嘅投票傾向真係好中立。佢地愈出得多嚟投,對泛民主派其實愈不利
  4. 地區工作對選舉嘅影響其實唔算好高(20%)。相比起嚟,能唔能夠叫到自己人出嚟投票,由其係年輕一代嘅人投票先係重點
  5. 種票係以小區計嘅,並唔係全港性咁種。而且今年種票好可能只能補回建制派呢四年流失咗嘅民意

策略

  1. 想贏嘅話,理得佢係熱狗/民主黨/素人,總之有撚就含
  2. 你嗰區有兩條撚嘅話,上 vote4.hk/選舉事實處望一望先,望下真黃定假黃先投,兩個都真黃嘅話建議自己區嘅選民集中票源只投一個
  3. 對於中間派,除非你肯定佢會投黃營,唔係你叫佢唔好投票
廣告

仲有少過四十八個鐘就區選,雖然實際上大家都知區議會係殘廢機構,但而家全香港甚至全世界都關注緊區選,呢場選舉,我地只許勝不許敗。對於想含撚嘅大家,都好想知道一個答案,就係我地點含先含到區議會過半出嚟呢?為此我地成 team 人呢幾日將全香港各大民調以及選舉事務處嘅統計做咗一次全面分析同埋 modeling,推算一下我地今次選舉可以拎到幾多席。

坊間好多時會覺得用民調去估計區議會數據係唔合理嘅,佢地主要係建基於「地區工作比起政見重要」呢個迷思。但係事實上,以前泛民明星落去選嘅區一般而言都係深藍區(e.g. 長毛多次參選區議會),而事實上好多名不經傳嘅人反而可以響區議會贏到建制派。

廣告

分析方法

我地將會用到 PORI(https://www.pori.hk/) 同香港研究協會(http://www.rahk.org/) 嘅數據做一次自逃犯條例修訂以嚟香港社會整體嘅民氣變化,同埋佢對選舉結果嘅影響。PORI 主要有兩組數據,一組係每個月公佈、有原始數據嘅林鄭民調,另一個就係「我係香港人」前導計劃,其中附錄入面被訪問者政治傾向嘅數據會幫到我地理解到香港人嘅政治傾向。我地同時引用親建制嘅香港研究協會民調,主要係用以交叉檢驗 PORI 嘅民調。

結果

1. 香港整體受眾嘅政治傾向係咩?

PORI 嘅民調指出香港政治傾向正大規模泛民化,呢個結果響早前中大嘅民調都出現過。

平均嚟講,香港社會有大約 10% 嘅人係鐵桿藍絲,呢樣嘢響唔同「比分數」嘅民調都要見到同一個 trend (Source: https://www.pori.hk/s/6th_round.pdf),就係永遠有 10% 人響今日呢個社會環境比 10 分港共/中共政府。

有唔少人擔心所謂中間派同無政治傾向嘅人係咪其實係隱性建制,我地查左一次 PORI 嘅原始數據,假設比 0 分係深黃,10 分係深藍嘅情況下,中間派其實真係幾中間,平均 50% 投泛民,50% 投建制,而無政治傾向就係 55% 投建制,45% 投泛民。總括嚟講,佢地只有少少藍而無大家想像中咁藍。

同一個結果響親建制嘅香港研究協會都出現咗,經過一部份嘅數據整合,我地將香港研究協會嘅分數改換埋去 PORI 嘅比例:

相信唔需要解釋都知道林鄭已經低無可低。

2. 政治傾向點樣影響區議會選舉?

過去嘅選舉因為有太多嘅自動當選,同時泛民本土一般而言係響內鬥狀態,令到大家嘅投票意欲相當之低,尤以著重意識形態、從來唔用地區服務嘅年輕人最甚。故此,響過去嘅選舉年輕人嘅投票率(35%)係遠低於年長選民(~60%)。但係呢班年輕人一去到立法會就會出番哂嚟投(55%),同年長選民(~57%)嘅差距並唔係想像中咁大。

其實大家想知道結果,vote4.hk 有一個簡單版嘅總議席估算器,大家可以上去玩下。但係我地考慮到民意響過去幾個月係改變得好快,所以我地自己做咗個建基於 2016 年(民意運動後未逆轉)同 2019 年(民意運動後逆轉,即圖一)政治傾向嘅選舉模擬模型(已計算民調誤差),得出全體民主派可能得到議席嘅分佈:(x-axis 代表民主 + 本土議席,y-axis 代表機率)

事實上只要大家唔射票落海,跟返 2016 年超區嘅投票傾向去投,咁樣嘅話連出哂名最難光復嘅觀塘區都係會民主派贏大半數(11 建制,26 民主,3 新增)。而呢度嘅關鍵正正就係 30 歲以下選民。如果 30 歲以下嘅選民嘅投票率係高於全香港平均,就算係返去 2016 年,全港十八區區議會我地都光復到十七個(除咗離島,因為佢地係 10 席民選 8 席當然議員)。

而今時今日嘅社會氣氛只會有加無減。我地詳細睇咗林鄭月鵝十月嘅評分數據同年齡嘅關係,發現基本上比林鄭月鵝 0 分嘅人係異常嘅多,而且愈後生,愈極端。

但係偏偏後生嗰一批響過去 20 年都唔係好投票,咁樣區議會緊係藍到出汁啦…

3. 港共會種票,造假,引嗰啲民調去估選舉準唔準㗎?

咁呢啲可以響 model 上面改嘅。過去 20 年建制派響兩個選舉嘅票數係穩定增長嘅,從 1998 年嘅四十萬左右升到去 2016 年嘅九十萬左右。我地可以假設今次會有二十萬嘅種票。呢個數字係一個極為激進嘅估計,因為

  1. 2012 年到 2016 年建制先增長咗十八萬票
  2. 2016 年到 2019 年新增選民先有約四十萬,而 30 歲以下佔左一半

以下呢張圖係講緊建制派:

就算真係種票,建制派都攞唔番佢地響反送中運動前嘅得票數,所以大家冇嘢好擔心。

4. 香港嘅人平均對警察/示威者嘅睇法係點?

綜合咁多次 PORI 嘅民調,我地見到兩個月嘅滾動民調都有同一個結果:如果係警察就係 8 成反對 2 成支持,而示威者就會係一半一半。我地假設緊呢個世界上冇人係同時支持警察同示威者嘅,咁香港對於今次反送中運動嘅理解就係如下圖。呢個數字同政治傾向嗰度嘅比例差唔多,亦擁有差唔多嘅數字比例,故我地可以大膽估計,泛民主派嘅支持者大約就係而家同時反對警察嘅一批人。

結語

如果想單靠區議會制度同佢嘅職能去改變香港無疑係天方夜譚,但縱觀歷史上成功嘅抗爭(例如 1918 年嘅英屬愛爾蘭大選新芬黨大勝直接引致兩年後嘅獨立戰爭),一味政治潔癖只幻想靠體制外抗爭去改變社會同樣係畫地自限。和勇不分呢四個字講嘅除咗係不割蓆不篤灰外,仲指任何有助勝利嘅方法都會去嘗試,不論當年 G20 登報,8.17 維園百萬流水遊行,舉美國旗定而家區議會選舉。只要行動有成功嘅希望,我地都應該嘗試,願榮光歸香港,大家煲底相見。

光復香港,時代革命!

 

作者自我簡介:外國勢力

發表意見