立場新聞 Stand News

香港人權與民主法案取得巨大進展

2019/11/14 — 15:03

【文:張崑陽】

啱啱同Marco Rubio office嘅人傾完,得知佢同參議院多數黨領袖Mitch McConnell 係今日稍早前開完會之後,得到Mitch McConnell 嘅承諾,會盡快將香港人權與民主法案擺上參議院大會討論同表決(scheduled and confirmed),甚至有機會喺下星期美國Thanksgiving Day之前成功通過。

更重要嘅係,之前有傳聞Mitch McConnell之所以不願意通過法案係因為佢唔希望有制裁機制,但據知佢已經作出讓步,唔會大刀闊斧動搖現時參議院嘅版本,所以香港人權民主法好大機會可以完整地通過(kept intact) 。

廣告

更更重要嘅係,之所以Mitch McConnell 會願意作出讓步,係因為香港過去幾日無論係西灣河黑警開槍殺人事件,警察恐怖分子大肆進攻香港各大學校園同學生誓死抵抗,都成功製造壓力比佢,令佢必須面對同回應香港情況。

所以各位前線手足嘅努力係冇白費,示威者嘅武力升級並冇影響法案嘅通過與否,相反正因為示威者嘅浴血奮戰同黑警嘅種種暴行,成功製造道德力量同龐大壓力,比一眾有意阻撓條法案通過嘅人唔敢再站喺與香港人民為敵嘅一方。

廣告

但係,即使條法案真係係參議院大會通過,其實由唔同嘅國會途徑得知,行政部門都未必有太大動力去執行法案,尤其特朗普同中國嘅貿易協議一日未傾好,行政部門都未必想動用條法案。所以嚟緊一段日子各位手足要繼續努力游說行政機關,確保條法案過咗真係會用,制裁一班賣港求榮嘅高官同嗜血成性嘅警察恐怖分子。

大家要繼續反抗。只要我哋一息尚存,場仗就未完。

( Marco Rubio都啱啱幫我哋學界拍左條片,同香港人講加油,稍後時間會share出嚟。)

發表意見