立場新聞 Stand News

香港人要港府都有可能輸官司!

2019/11/20 — 20:26

9 月 28 日,有市民於銅鑼灣街頭張貼「9.29 全球反極權遊行」文宣。(立場新聞圖片)

9 月 28 日,有市民於銅鑼灣街頭張貼「9.29 全球反極權遊行」文宣。(立場新聞圖片)

一,之前都講過,法治,最 layman 嘅定義,就係「政府都有可能輸官司」。一個政府唔會輸官司嘅地方,就唔好成日攞法治出來說三道四。

二,好記得過渡期嘅日子,大家都會講終審庭嘅安排,因為當時有識之士相信,只要香港仍然有終審權,有外籍法官,咁個普通法制度都可以頂得一陣。

三,結果呢,人大釋法呢招一出,終審權其實名存實亡。

廣告

四,雖然法治另一個 layman 嘅理解,就係「政府都要守規矩」,不過……

五,2015 年 2 月,習近平開講,題目係《省部級主要領導幹部學習貫徹十八屆四中全會精神全面推進依法治國專題研討班》,當中提到「法大定黨大」,你估下答案係乜?

廣告

中國共產黨是中國特色社會主義事業的領導核心,處在總攬全局、協調各方的地位。社會主義法治必須堅持黨的領導,黨的領導必須依靠社會主義法治。法是黨的主張和人民意願的統一體現,黨領導人民制定憲法法律,黨領導人民實施憲法法律,黨自身必須在憲法法律範圍內活動,這就是黨的領導力量的體現。黨和法、黨的領導和依法治國是高度統一的。我們就是在不折不扣貫徹著以憲法為核心的依憲治國、依憲執政,我們依據的是中華人民共和國憲法。

六,我又嘗試用一般人可以明白嘅話語,翻譯習近平嘅宣言:「黨,就是法。規矩,係黨定嘅,係工具,所以根本唔存在黨大法大呢個『偽命題』。」

七,返來香港,其實正常人都已經唔再相信「字面上嘅高度自治」;因為無人再相信北京。甚至乎有人好後悔,當年點解明知係一個謊言,都要扮一切正常。正因為咁,會有人話,對唔住今日班後生仔。

八,又或者,1984 年 12 月 9 日,簽署中英聯合聲明個一刻,已經宣判香港玩完。

九,三十五年來,大家曾經以為可以影響返大陸。我知道,今時今日堅持呢個主張,難免會畀人話係白癡。即係,近日我話要盡力去影響十三億人,都一樣畀人話不切實際。

十,不過,我都係認為,正面思維嘅重點,在於任何時候都諗下有乜可以做。大家諗下,由六月至今,香港人最厲害係乜?係文宣。香港人嘅文宣,有超強感染力,成功將一個小城市嘅抗爭,變成世界各地都有人關注嘅大事。

十一,我係一個凡事都會試下用逆向思維去分析嘅人;可能呢個就係市場訓練出來嘅習慣,尤其是,當逆向思維得出來嘅結論,係行動代價唔高,但潛在回報可以好高嘅時候,我一定會問:「點解唔試一試?」

十二,【逆向思維】假如中共嘅統治正確性完全深植十三億人腦海,無嘢好驚,佢哋又駛乜要封鎖資訊?又駛乜要將香港人講到係「不知感恩嘅敗家仔」?

十三,我唔係話要影響哂十三億人,但中共對管治嘅 margin of error 要求其實都好高下。即係話,只要北京上海廣州深圳成都重慶之類嘅大城市,有少少跡象有思潮起伏,對中共來講都係 red flag。

十四,至於以上諗法係唔係支聯會嗰一套呢,我都唔識講。不過,支聯會做唔到嘅,唔代表唔值得做;可能係佢哋用錯方法,又或者時空錯咗。

十五,輸出革命其實未去到呢一步;但如果咁樣可以令北京重新盤算對香港嘅方針,咁咪由得北京去盤算囉。

十六,最後,之前我話「北京希望 what happens in HK stays in HK」,所以要開多條戰線去對十三億人,呈現事實,解釋利害;但都有好多人睇極都唔明,話犯駁。咁,我試下用另一個方法去講:「凡敵人反對的,就放手去做啦。」咁,大家又會唔會易啲明?

發表意見