立場新聞 Stand News

香港人,你對林鄭、監警會仲有希望嗎?

2020/5/16 — 18:12

5 月 15 日,特首林鄭月娥召開記者會回應監警會報告。

5 月 15 日,特首林鄭月娥召開記者會回應監警會報告。

5.15 一日之內四件事:教育局強迫取消 DSE 歷史科試題梁君彥違法欽點陳健波任內會主持首名被控暴動罪成者被囚四年最後監警會報告出爐全面認同警方執法林奠更以「香港的真相」為題係記者會中大讚報告「客觀、全面、具份量」。一單接一單荒謬絕輪嘅新聞,一日之間全香港好似瀰漫住一種「亡港亡國」之嘆。

其實唔需要灰心,對於監警會份審視報告,首先要了解「監警會」嘅幾個真相:

真相係監警會從來都無主動調查嘅權力;
真相係監警會無任何法定權力去傳召證人、迫使警方講「真話」,講大話或者不作供都無後果;
真相係 PK 鄧同林奠一直以來強烈反對獨立調查委員會,只接受監警會對警隊執法作出審視;
真相係監警會嘅委員全部都係由林奠委任,而上年新任委員余黎青萍同林定國都有鮮明嘅政治立場;
真相係監警會係製作報告嘅過程只係約見咗班警察,無訪談過任何抗爭者陣營;
真相係林奠重金禮聘嘅多名海外專家喺報告出爐前已經辭任兼出聲明割蓆,並指明現行權限下嘅監警會並不能夠反映事實;
真相係監警會份審視報告嘅目的,開宗明義係「協助警方改善未來的行動」以及「不會處理個別警務人員的行為」。

廣告

呢啲關於監警會嘅「真相」一早喺報告出爐之前已經定調,中間從來都無改變過,所以「成立獨立調查委員會」先會成為香港人嘅最大共因數。既然係咁,點解仲會對監警會報告有任何期望?又或者表現失望?有無人會對太監嘅性能力存有幻想,並表現失望?

經過咗差唔多一年嘅抗爭,經歷過 7.21、8.31、10.1、中大理大之戰,體會過咁多選擇性執法,睇過無數個記者會,讀過咁多法院判詞,仲會對香港政府、香港警察、香港法治抱有期望嗎?唔通林奠會出嚟開記者會,佢講嘅所謂「真相」會同香港人喺每晚直播見到嘅真相同步?定係你覺得個監警會報告會確認 7.21 警黑合作,指出 8.31 太子站恐襲無辜市民?定係會期望 PK 鄧同林奠睇完份報告之後,良心發現,痛改前非,追究刑責,承擔責任,鞠躬下台,跟住香港就可以「重新出發」,繼續炒股炒樓,返工上會,從此 happily ever after?如果真係有咁嘅諗法係咪因為睇得韓劇太多?

廣告

林奠與其港共爪牙得一個方法可以生存落去,就係全面向中共靠攏表忠。睇下鄭若驊喺英國受傷要返北京療養嘅下場,就知佢哋嘅身家性命財產已經唔再掌握係自己手中。因此,所有對現屆政府同中共嘅任何良好願望都只係一廂情願。除非中共作為香港嘅母體係政治上發生重大質變,否則香港嘅政治情況只會極速變壞,全面向「一國一制」推進。

既然知道個大環境係咁,與其長他人志氣,不如諗下林奠、警方明明已經大權在握,喺行政、立法、司法、傳媒各方面都如取如㩦,咁點解仲要監警會寫成千頁報告?點解要煞有介事咁開個記者會,特登整個 backdrop 叫「香港的真相」?點解個「檢討委員會」搵唔到人參加?佢想透過份報告同個極具挑釁性嘅記者會得到啲乜嘢?Appeal 緊啲咩人?劍指緊邊度?點解唔直接學新彊咁起「反恐教育營」?

呢堆問題嘅答案比起個報告本身重要得多。監警會報告目的就係要帶動輿論、改寫歷史,製造官方既定事實;態度強硬就係要震懾香港人,要令抗爭陣營失望、無力、灰心、認命,最後放棄。報告嘅內容其實一啲都唔重要,重要嘅係報告對香港人抗爭意志嘅影響,港人生出無力感正正就係林奠及中共想要嘅效果。到今時今日,佢仲要做呢啲門面功夫,就係因為一直未能有效管治,至今仲未能夠掌控到所有香港人,所以先無人肯加入「檢討委員會」。與此同時,中共仲需要透過呢班傀儡管治香港,繼續作為賺錢機器,中共嘅外匯來源。所以唯有用盡方法,展示高壓手段震懾港人、迫使港人歸降,達致佢哋最終嘅統戰目的。

因此與其對監警會報告感到憤怒,感到失望,不如對佢表達輕蔑、表現不屑,唔應該浪費半秒去研究內容。最重要嘅係香港人抱持「不認命、不放棄」嘅精神,堅持真相,紀錄真正屬於香港人嘅歷史,對外宣揚;徹底放棄幻想,香港再唔會回到過去,香港亦永遠唔會回復「正常」。

發表意見