立場新聞 Stand News

香港國安法下,香港人仲可以點安法?

2020/5/27 — 13:03

【文:銀彈】

香港出事。講多無謂,行動最實際。出文講嘢嘅行動唔使多,除非係要搶番話語權。
國安法嘅網上資訊好多唔使我講,以下有終極幾點 Q&A 想大家注意,全部有關點樣好好生活同埋香港人心理狀態:

Q:抗爭仲點樣生活?
A:大家唔好忘記:好好生活,好好抗爭。
抗爭,大家都做緊,國際輿論戰線尤其需要大家幫忙,但唔好忘記本地呢一年嘅所有戰線先係基礎;
生活,係抗爭嘅一部份,但係生活≠抗爭,所以要以抗爭定義日常生活嘅非常生活——即係民間日常生活嘅例外狀態,而非將平時做嘅生活嘢照搬去抗爭到,包括一啲情緒、毒撚 mode 同港豬 mode。呢個就係例外狀態嘅生活,今次逃避可恥兼無用,要學下同抗爭共存。
仲有唔好唔記得抗疫,戴返個口罩。

廣告

Q:一句講晒,國安法在公在私點樣打擊香港人心理?
A:5.21 人大提出香港國安法立法議程,以全國性法律嘅姿態加落基本法附例三喺香港實施,象徵 19 年 6 月、7 月以來嘅攬炒 endgame 剛進入最後一幕,呢一幕主題係「一國一制」,可以 last 好長,可以有階段性,長期戰在所難免。
中共佢哋想利用呢種大家對國安法同對被定義為本土恐怖主義、會顛覆政權嘅外國勢力嘅恐懼,令到大家會喺日常生活各個細節進行自我審查,俾壓力你然後等佢唔使每個鐘喺你同公司同事、學校同學吹緊水、喺屋企食完飯出個 post 講嘢時執法,都已經起到改變人民生活方式,自我審查而我少啲抗爭嘅作用。你縮一下,代表中共 work 咗一下。
所以除咗香港嘅公共空間,我哋同時要保留一種私人空間同內心狀態,唔會俾中共嘅議程有機可乘,侵佔我哋。
各位珍重,take care!

Q:打算移民係咪仆街?
A:係仆街,又可以唔係。有 BNO 仲唔續就真係仆街。而家未盡力就打算移民係仆街,以移民作為抗爭手法唔係仆街。將來移民可以唔係仆街。而家諗移民多過抗爭多數係仆街,少數唔係,自己諗吓條線點畫。上網 google search 移民唔係仆街,自保以外唔會盡力攬炒救港、唔會諗下已死未死嘅手足同其他爭取香港民主自由嘅香港人先係正仆街。

廣告

Q:香港人作為中美棋子,係咪無自由命運自主?
A:我哋一日身心未死,香港依然由我哋定義。喺全球局勢、中美邏輯嘅背景底下我哋就算係棋,亦都係我哋運用香港國民自由意志去爭取香港可以喺國際立足嘅一系列方法。We define our own future,英美台等國點幫香港,都係喺佢哋 national interests 範圍內,睇香港人頭。玩咗成年都唔識玩呢個 game 咩?你可以安全企得喺度睇我篇文,就唔該即刻打開 twitter 個 app 啦仲問。

(作者按:我哋從不鼓勵大家學效黑警,以身試法;法繫良心,千祈唔好違背良心法理。兄弟爬山,自己執生;各自努力,齊上齊落。論及個人經歷,細節可能有所修改,以保障當事人權利。)

 

發表意見