立場新聞 Stand News

香港正在淪陷ㅤ自由最後一戰 — 寫在八月十九日《法蘭克福匯報》出版之後

2019/8/21 — 16:51

8 月 19 日德國《法蘭克福匯報》(Frankfurter Allgemeine Zeitung)再次刊登香港人的公開信(圖片來源:作者 Facebook)

8 月 19 日德國《法蘭克福匯報》(Frankfurter Allgemeine Zeitung)再次刊登香港人的公開信(圖片來源:作者 Facebook)

奇跡,喺六月二十七日嘅《南德意志報》上面,發生過一次。

今日,即係八月十九日,《法蘭克福匯報》(Frankfurter Allgemeine Zeitung,FAZ)政治版首頁,再一次出現一封由香港人發出嘅公開信。*

標題係:

廣告

Hongkong fällt. Der letzte Krampf für die Freiheit.
「香港正在淪陷 自由最後一戰」

同樣地,今次我繼續肩負聯絡報館嘅責任,亦都因為上一次嘅參與,今次順其自然,ViSdP 後面都係出我個名。雖然上一次我已經講過,但我都不厭其煩再講多次:我個名有幸可以出現喺公開信上面,但係我自己無咩功勞,背後成個團隊,包括翻譯,校對,設計,協調,等等等等,先係公開信可以成功出現嘅原因。喺度,我再感激 G20 × 攬炒團隊,再次創造奇跡!希望各位香港人唔好放棄,全世界都注視緊香港,我地一定要繼續堅持落去!

廣告

* 註:晨咁早,打算去火車站買份 FAZ,點知佢話今日收唔到,我周圍問極都買唔到……原來呢幾日德國天氣反常,一間印刷廠不幸被雷劈中,FAZ 只能印出大約一半數量嘅報紙。不過 FAZ 立刻免費開放網上版俾大眾閱讀,而且答應聽日(九月二十日)會喺盡量前嘅頁面再幫我地登多一次,其實就真係接觸曬唔同階層嘅德國人!今次真係連雷神都要眷顧香港人!

重要嘅嘢講完啦!喺度,我想講下我自己感受……

香港人,無論海外海內,喺呢兩個月,展現咗佢哋不屈不撓嘅一面,接二連三咁創造奇跡。每一次,我都亦悲亦喜。

開心嘅係,我終於見到香港人潛藏於心,對於自由民主嘅追求。好多香港人,雖然平日無咩聲氣,好似淨係掛住搵食。但係今次大是大非之前,好多人都已經覺醒,直接間接參與呢個活動,令到我地知道,同路人並不孤單。

傷心嘅係,我地全部人打從心底裡,其實根本就唔想創造奇跡。尤其係我呢啲去咗外國嘅人,仲有咩要求啫,都係想平平淡淡咁繼續生活……

元朗黑夜,警黑合流,當時我覺得,香港嘅政權已經突破咗道德嘅底線,正式步入徹底腐敗嘅第一步。當時我出 post 講過,「我為自己許下一個諾言:香港呢個 PK 政權一日唔倒下,我都會竭盡所能,用盡我僅有嘅時間同精力,奉陪到底,同你鬥長命。」

雖然我講呢句嘢,好想自己無咩情緒。但我承認,其實我係有一絲埋藏喺心底裡嘅怨恨。

點解?

我好好彩,喺今次反修例嘅革命牽起之前,我地一家三口,喺西貢渡過咗一個好美好嘅假期。同屋企人過年,同朋友約食飯,同老婆仔仔行街。我地當時完全唔知道,原來呢段美好時光,已經係香港年輕人同政府同警察,同建制,同舊時代割離關係嘅最後倒數。

「已經返唔到轉頭啦。」好多人咁講。

係。催淚煙終會消散,但係嗰一層毒害人體嘅微粒仲會永遠殘留喺香港嘅一街一行。

係。眼上嘅傷口總有一日會癒合,但係失去咗嘅視力,仲會伴隨住受害人嘅一生。

係。呢個極權政府可以繼續打壓,繼續派糖打經濟牌,扮成若無其事,但係俾警棍打過嘅後生仔,傷不在身,而係打碎佢地對香港未來嘅憧憬同夢想。

返唔到轉頭㗎啦。

搞咗咁耐,我都無好細心咁睇呢份公開信……今晚我開返份嘢出嚟,仔細望……加上我諗到呢度,好清楚返唔到轉頭呢樣嘢,已成定局,手開始震,眼淚一路咁流。人嬲,好多時候都係一件事而引起,但係唔係,呢種憤怒,係一種混合住悲憤,痛心,無助嘅感覺。

呢一種感覺,我一早就有,望住公開信上面煙幕瀰漫嘅香港,先至會突然無限放大。

畀返個香港我。

我要你畀返個香港我!

……我知,講係無用嘅。

依家你睇到呢個 post 嘅時間,我去完 Stuttgart 一趟。去 Stuttgart 嘅目的,係搵 Dietrich Wagner 同佢做專訪,仲會搵埋德國嘅水炮車法律專家。我要全世界都知道水炮車有幾危險,幾唔人道!而偏偏香港警察都仲要用!

今晚我都已經開咗一個會,同其他有心嘅香港人一齊,行開始建立一個 e.V.(eingetragener Verein,註冊組織)嘅第一步,我好希望喺德國,香港人都可以有一個代表到自己嘅協會。

仲有好多嘢,我同埋好多喺德國嘅香港人都做緊。時機成熟,我會話俾大家知,希望大家到時可以盡力參與。

我唔會停,到有一日你畀返個香港我,我先會收手。

 

#HongKongWiedergewinnenRevolutionUnsererZeit
#FreeHongKong
#StandWithHongKong
#AntiELAB
#五大訴求缺一不可

作者 Facebook

發表意見