立場新聞 Stand News

香港正式成為中美角力嘅戰場,新一輪抗爭揭開序幕

2020/5/28 — 17:52

  1. 美國國務院蓬佩奧根據《香港政策法》向國會遞交新一年嘅報告,措辭強硬,證實「任何一個合理嘅人都會覺得香港已經失去高度自治」,並不符繼續享有美國法律下嘅特別待遇。
  2. 加拿大溫哥華卑詩省最高法院就裁定華為副董事長孟晚舟「雙重犯罪」成立,符合引渡到美國嘅條件,孟晚舟需繼續帶住電子腳鐐留喺加拿大,繼續引渡聆訊。
  3. 日本《讀賣新聞》報導,日本政府將修改針對採購通訊設備規定方針,擴大禁止使用包括華為及中興通訊等中國電訊設備商的產品。

三單轟動國際嘅新聞,喺人大閉幕「港版國安法」議案獲通過之際一次過出爐,瞬時間風雲際會,揭開中美新冷戰序幕,

將三單新聞放埋一齊睇,核心目標都係一個:華為。

廣告

美國早已將華為列入制裁名單,禁止所有芯片供應商售賣含有美國技術嘅芯片予華為,更逼使最球最大芯片生產商台積電歸邊,決定落戶美國設廠;英國亦一轉立場,約翰遜大病後即時調整國策,三年內將華為喺英國嘅 5G 業務歸零;今次日本政府嘅取態跟隨盟國嘅步伐,相信其他西方國家棄用華為嘅 5G 亦會陸續跟隨。

《香港政策法》賦予香港有別於中國大陸嘅貿易地位,除咗關稅,其實最切中大陸核心利益嘅一環係技術轉移。美國對中共嘅禁運、禁止技術轉移並不適用於香港,中共就一直利用香港呢個特殊地位購買美國嘅敏感技術,從後門輸入中共。美國一直都知情,只不過見有利可圖,就「隻眼開,隻眼閉」不加理會。華為孟晚舟被捕,起因就係華為透過 SkyCom  呢間喺香港嘅空殼子公司,向伊朗輸出技術,違反美國對伊朗制裁。今次一次過斬斷香港嘅特殊地位,視香港與中共同等地位,就係要堵塞香港作為技術走私後門嘅角色。

廣告

所以褫奪香港嘅獨立關稅區地位,對於美國嚟講重點根本不在於關稅,單單就武漢肺炎嘅本土救市方案已經係數以萬億美元計,根本唔會在乎香港嗰幾百億貿易順差,葉劉可以替美國擔心少陣。接連幾單嘅大手筆動作,再加上之前一步接一步嘅封殺,就係要喺枱面、枱底全面封殺華為嘅生存空間,阻止佢繼續擴大,封殺 5G 領域及高端資訊科技上嘅發展同影響力。

經歷武漢肺炎後,美國感覺到自己世界霸主嘅地位受到威脅,美國人從切膚之痛中體會到中共極權對世界帶嚟禍害,決定一改對華策略,放棄「以利為先」模稜兩可嘅態度。香港就係最好嘅切入點。今次美國國務院嘅強硬表態,藉報告向世界展示圍堵中共嘅決心,正式認證香港作為中共「白手套」嘅角色,假借「一國兩假」之名,行「高壓獨裁」之實,「高度自治」只係用嚟係國際社會上「攞著數」嘅手段。呢種對華、對港策略係基本性嘅質變,亦都係朝野兩黨同美國人民嘅共識,所以十一月後不論共和、民主黨主政,喺可見嘅將來都不會改變。 

可以肯定嘅係,取消香港喺關係法下獨立關稅區地位,唔會係美國最後一步,呢枚「核彈級」制裁只係揭開咗香港作為中美角力戰場嘅序幕,之後嘅將會陸續有嚟。偷運技術轉移只係香港作為中共「白手套」嘅其中一個角色,最重要嘅角色係外匯集資中心同離岸人民幣債市市場。喺美國本土,逐步收緊對在美上市中資概念股審計調查,瑞幸咖啡案就對中資股打開第一槍;其後,中資概念股排住隊回流香港上市,希望避開美國交易所嘅制裁。喺咁嘅大環境之下,香港作為中共巨企唯一資金活口,變得史無前例咁重要。喺《香港政策法》下,美國有權左右香港以美元結算、集資嘅決定,以至終止港元與美元以聯繫匯率方式掛鈎,先至係真正致命一擊。

值得注意蓬佩奧嘅報告最後結論指出「希望有朝一日我可以再次認證香港係一個高度自治嘅地區,得以享受美國法律下嘅特別待遇,但係視乎目前嘅情況,發生嘅機會極微(remote)」,其後再次重申美國會同香港人企埋一齊去對抗中共嘅打壓。喺外交層面上,美國寫一個報告去數香港政府失去自治,打壓自由人權,甘當中共傀儡,並宣佈將會制裁,但同時強調會同當地人企埋一齊,stand with the people of Hong Kong,呢種將一個地方嘅整體利益,同當地人嘅利益割裂開處理嘅外交定位非常罕見:制裁政府等同支持當地人民。

呢種獨特嘅外交定位要歸功於去年香港人不斷喺國際線上面發聲,透過眾籌、登報、遊說、舉旗、遊行、社交媒體、大大小小嘅媒體訪問,深耕細作,一步一腳印咁成功將「香港人」呢個 identity 同「中共治下港共政權」完全割裂開,將「香港政府不代表香港人」呢個論述紥根喺國際社會。足見香港人經歷呢一年嘅磨難並無白廢,血亦唔會白流,「If we burn, you burn with us」嚟得越嚟越近。

最後「Sir, this way」。

發表意見