立場新聞 Stand News

香港現象級歌曲《願榮光歸香港》:現象如何持續下去?

2019/9/13 — 18:13

《願榮光歸香港》youtube 截圖

《願榮光歸香港》youtube 截圖

【文:Kent Lau】

歌曲可以用嚟宣傳、團結同鼓舞士氣,無疑係社會運動中有力嘅催化劑。8月26號有網民將軍歌《願榮光歸香港》初稿放上 LIHKG, 8月31號已經有 MV 出現,然後 9 月頭已經有唔少香港人自發喺商場,包括大埔、沙田、太古等地,大聲高唱,甚至港隊喺大球場作賽,香港球迷嚟一個大合唱,由大叫「光復香港,時代革命」,變成唱出嚟,喚醒香港民主自由嘅靈魂。

呢首現象級(phenomenal)歌曲,同其他現象級歌曲一樣簡單、具創意同啱 Timing!

廣告

最緊要係琅琅上口

首歌啲詞好靚?唔算係;曲好聽?都唔算係。但最重要係曲風易記易入腦,歌詞亦扣連到每個香港人嘅經歷同記憶。《義勇軍進行曲》嘅歌詞同樣唔係深唔係靚,憑住日播夜播兼旋律易記而「深入民心」,同樣道理,呢個時勢,最淺白嘅字先至係最有力嘅子彈,配上莊嚴嘅古典曲風,成為最有力量同凝聚人心嘅歌。

廣告

第一波現象級爆發

數字上嚟睇,原版 MV 已經有 143 萬次播放數,而最新 9 月 11 號喺 YouTube 推出嘅 管弦樂團及合唱團版 MV 一日之間已經錄得 80 萬次播放。淨係「願榮光歸香港」呢6個字,9月10號單日錄得超過 5 萬次搜尋!尋晚沙田大合唱,個個都識唱!(題外話:MV 用 21:9 格式發布,果然係班電影業人士做嘅!)話就話軍歌,其實唔少香港人都將佢當作國歌看待,而持相反意見嘅香港 / 中國人只會識用佢哋國歌「回敬」,亦變相將《願榮光歸香港》同《義勇軍進行曲》睇齊,間接地將港中區隔。

隱憂:熱潮係咪一下就過?

不過,唔少現象級歌曲都有個弱點:爆紅完之後就好快完,《Sing Hallelujah to the Lord》就係個好例子。加上可以預視到,中共會將《願榮光歸香港》扣上「港獨」嘅帽子,透過文宣同行政嚟打壓,要 Keep 住呢首歌持續唱落去,仍然有一定嘅未知之數。

要 Keep 住個熱度,抗爭者以至大多數香港人,必須將《願榮光歸香港》再進化,變成唔同場景都啱用嘅版本!例如細個學過牧童笛,會唔會整個牧童笛大合奏?唔同嘅電話鈴聲版本?或者喺警署門口每晚不斷 Loop 住播?或者學日本咁傍晚喺街度播歌?

當然,我哋可以將呢幾日喺各個商場同大球場嘅自發大合唱視為一個預演,喺9月15日警方仍未批准嘅遊行,大家再集結喺一齊有機會成為真正嘅 200 萬人大合唱!隨後每個禮拜嘅週末繼續遍地開花,持續爭取國際媒體嘅關注同報導,加深國際社會嘅認可。

咁點樣宣揚開去?

識印梗係印 Tee!唔好以為咁快個個都記得晒歌詞,著住出街去集會,後面嘅人睇住前面嘅背脊嚟唱,一次生兩次熟!再唔係就印 Folder 去派,前面標語後面歌詞,平時仲有得拎嚟用!《願榮光歸香港》究竟只係一首K歌定係一首代表新香港時代精神嘅歌曲,就睇大家會唔會堅持傳開佢。

發表意見