立場新聞 Stand News

香港疫情「稍好」是反送中的果

2020/2/24 — 22:10

當日韓疫症爆到七彩,Touch wood 講句,香港情況尚算不太差,竟然還比新加坡好,特別喺林鄭政府嘅極端無能以及有心整蠱嘅襯托下。但呢種情況不能純歸於「好彩」,而是一種因果:

1. 已提及多次,半年反送中運動,令大陸旅客大幅減少。雖然林鄭政府死不封關,但來港的自由行由去年年尾已大幅減少,農曆年前到各區搶年貨的「盛況」不再,連水貨勝地上水都「光復」了,比過去少了很多人。可以想像,如果今年情況跟往年一樣,香港想唔中招都難。(亦有人推測,因為大陸人唔來香港,轉去其他地方,把病毒帶入其他國家)

2. 因為反送中,林鄭政府已徹底破產。疫症爆發前,林鄭的民望已經係低過 20 分,大家亦好清楚呢個政府的辦事能力就係冇能力,本來就冇乜人信任,再加上林鄭「切腹式」的講話和回應,連藍絲都變埋色。所以佢推出咩措施,大家根本就冇期望,紛紛想辦法自救。如果好多人仲係咁天真相信個政府,已經瀨哂嘢爆哂鑊,正如一個郵輪乘客怨道:「政府當日話疫情唔嚴重我先上船……」,真係信者得「咎」。

廣告

3. 亦因為反送中,香港人 DNA 大變,竟然唔再「各家自掃門前雪」,唔再咁自私,由接放學、買飯券、撐黃店、聲援運動中的弱勢到港版鄧寇克大行動,強勁的互助自救文化和網絡已形成,大家真正發揮另類 sharing economy,「共享自救」,邊個有咩就出咩。意識已存在,文化已形成,網絡已鞏固,一埋位就做到嘢。試諗吓如果冇咗反送中半年嘅互助自救文化,大家嘅反應同執行點會咁快?

4. 又係因為反送中,全港各階層幾乎全部 connected(除咗藍絲,因為無腦或無恥是無法與其相反 connected),無論係富貧老中青不同種族,都 connected。當知道弱勢無口罩,因為第 3 點,就立即動員去派物資畀佢哋 — 即使佢哋可能曾經係藍絲,但佢哋冇口罩整個社會的抗疫力便有漏洞,等於林鄭封剩兩個關一樣。

廣告

5. 仲係因為反送中,反民主派喺區議會大敗。呢次疫症,大家都睇到建制派嘅極度無能。無他嘅,佢哋係一班「政治金笸籮」,以前咩都有個富貴阿爺打點,佢哋剩係出面派嘢做場 show,基本上全部都係能力低下,講歪理愚民就叻,做實事即變做柒事。如果區議會仲係由呢班只顧自利嘅利益集團去把持,要動員全香港自救真係難上加難,就算佢哋派物資都係呃你啲私隱資料去種票嗰吓慘。但依家十八區光復咗十七區,全香港多咗好多「樁腳」,要做事自救救人就容易好多。好似早排 Project R 搵到啲口罩,都係與區議員合作散出去,本人亦都喺區內蒙受黃營區議員之福買到少量口罩轉贈畀老人家。

6. 係,好悶,寫到第 6 點都係因為反送中。香港嘅抗爭已經蜚聲國際,以前未必有人知香港同中國有咩分別,但因為呢場波瀾壯闊嘅運動,好多地方都有報導也有特輯,令香港喺國際關係嘅聲譽同地位提升到史無前例嘅高峰。咁其實係非常有助各方人馬去全世界搜羅物資如口罩。至少你話係香港公司、香港區議員,佢唔會當你係武漢個 friend。

7. 終於唔關反送中事 — 經歷沙士之痛嘅香港,雖然傷口癒合已久,但傷疤仍在,因此香港人可以極速反應,知道最重要嘅物資係乜嘢,知道要點預防,知道咩叫 U 型管。加上社交網站發達和使用成熟(呢一點都係反送中所致,如 TG),好多知識、經驗和資訊都可以快速廣播開去。當然,香港人係咪已做到最好?唔係,但至少依家出街,你見到 99% 嘅人係戴咗口罩嘅,呢個比率連 2003 年沙士也沒有見過。比起其他地方,香港人明顯有吸取過教訓,全香港就只有香港政府同醫管局乜教訓都冇吸取過。

寫完,都覺得彷彿冥冥中真係有主宰,半年嘅持續和激烈的抗爭,香港人的犧牲,是有價值的,即使五大訴求還未竟全功。

再一次,多謝手足,多謝身在任何崗位也為守護香港盡一分力的香港人。

 

作者 Facebook

發表意見