立場新聞 Stand News

香港病人資料送中,後果可以幾嚴重?

2020/9/18 — 14:46

作者製圖

作者製圖

盧寵茂指,港大深圳醫院正係同醫管局商討,令「醫健通」可以係香港同深圳醫院互通,比深圳醫院內嘅醫生等職員可以查閱香港居民係醫管局嘅病歷、個人資料。工聯會理事長黃國亦表示,希望「醫健通」未來擴展到大灣區「三甲醫院」。

如果呢件事成真,香港人係本地公立醫院嘅病歷被「送中」,後果可大可少。我地難以確保中国醫護處理資料有幾嚴謹,會唔會有中国醫護私下將香港人嘅個人資料備份,以作不當用途,我地無從確定。

一)病歷有幾重要?

廣告

除左一啲敏感度高嘅疾病紀錄,例如愛滋病等之外,更加有好多原因,我地要保護病歷嘅私隱。好多時候出於了解病情需要等各種原因,病歷內少不免會提及病人生活中經歷嘅事,例如一個多處骨折嘅病人,病歷中可能就會提及,佢 11 月 18 日凌晨曾經係旺角某處多次被棍毆打。或者一個創傷後壓力症候群嘅病人紀錄,可能無意中提及佢屋企人曾經係某年某月某日被啲蒙面武裝份子係太子地鐵站襲擊。呢啲資訊落入唔可靠嘅人手中,後果大家可以想像。

上年六月,就曾經有病人向公立醫院護士交代自己病情,突然間,護士走去向駐院嘅警察詢問「催淚彈個催字點寫」,結果嗰位病人因而係醫院內被警方以暴動罪拘捕。

廣告

二)咩係「三甲醫院」?

「三甲醫院」理論上係中國最高級醫院,其中係深圳約有 20 間。咁即係有幾可靠?遠嘅我唔講,單講 2019 年 8 月嘅新聞,本來被評為三甲醫院嘅西安巿第三醫院,被發現上繳數據「嚴重失實」、「大量錯誤」,微創手術佔比竟然可以係100%,令到呢間醫院係評審中獲取三甲評價。

三)中國如何看待病人私隱?

就講最近中國人最鐘意嘅「健康碼」,就係要求所有人將病歷、個人資料等通通上傳到統一嘅「中央資料庫」,去進行政府所謂嘅抗疫。呢個就係中国看待病人私隱嘅態度。只要有一日,香港人嘅病歷上到左中国啦,中国政府用咩手段去強行徵收,到時香港人點阻都返唔到轉頭。

醫管局內資料有齊病人姓名、出生日期、身份證號碼、過敏記錄、出生紀錄、化驗及放射報告、臨床摘要等等,你會唔會想中国人員知道哂你呢啲所有嘢?

補充:暫時,盧教就話港大深圳醫院要係取得病人同意後,先可以取得病人在港病歷資料,但之後會點,實行會點,就睇大家自己信唔信啦。

作者 Facebook
 

發表意見