立場新聞 Stand News

黃色生活圈笑話一則

2020/4/6 — 15:01

立場新聞圖片

立場新聞圖片

【文:某日幫襯的磚鋪客人】

由運動至肺炎,我們或者一起見證住黃色生活圈的誕生。一開始抵制大集團壟斷,到手足裝修,到黃店 APPS 普及化,到光時重光號成立,到支持告急黃店,到建立黃色 YOUTUBER 圈等等......

聽落去好好聽,你又付出左幾多呢?

廣告

入門

你會唔會專登搵黃店食飯?
你會唔會為左唔幫襯藍店而行多幾步去黃店買枝筆?
你會唔會下載唔同黃店 APPS 為生活所需搵黃店?
我相信上面好多人都做到,如果你做唔到就請好好加油。

廣告

中階

你會唔會每日唔開 AD BLOCK 咁係電腦背景 LOOP 黃色 YOUTUBE CHANNEL?
你會唔會落去連儂牆幫手睇水?
你會唔會不辭勞苦咁睇晒手足寫比大家的新資料同新文宣?
你會唔會玩香城 ONLINE 做任?
你會唔會幫清算師手?

如果你做足,恭喜你,你已經係千中無一。
至於高階,我都唔想描述。

點解唔想描述,你自己開立場新聞 YOUTUBE CHANNEL 睇下。
50K FOLLOWERS,但每段片都唔夠 10K VIEWS。
對比起其他飲飲食食 CHANNEL 少起碼10倍 VIEWS。
或者你會話係 FACEBOOK 睇左,
但係只係叫大家係背景 LOOPS YOUTUBE比 黃色 CHANNEL 賺錢,好難做咩?

叫大家做任務,聯署,COMMENT,SHARE,LIKE,好難咩?

點解大家都一定要比人催促先肯做,點解大家唔主動 D 去抗爭?

肺炎比左個機會大家反思,除左示威遊行之外,你地仲有咩可以去做對抗政權同敵人?

另外,唔少黃色食店逆市仲擴張營業,佐證黃色飲食圈功力深不可測。
如果可以分散投資支持番少少小店會更好。

最後,亦都係我個人重點。
我個人對於黃店逆市擴張係好歡迎,但係佢地裝修筆錢又有幾多落番入黃色經濟圈入面呢。
舉個實証比大家,餐廳裝修,廚房一定要買瓷磚。
而香港就係得一間瓷磚鋪係黃色(唔開名,上黃店APPS打個「磚」字就會有)
但某日我同磚鋪老細吹水,佢居然話從來都冇黃店裝修問過佢報價買磚。
佢話「輸款式輸價錢冇所謂,但係連報價機會都冇,即係好簡單,開鋪個班人根本連黃店都冇搵過。」
當賺黃色經濟圈錢時,原來自己都唔會搵黃店消費,咁樣黃色經濟圈可以點持續?
係呀,係話你地拎住最多錢個班呀。


 

發表意見