立場新聞 Stand News

「黃色經濟圈」與中共統戰模式

2020/1/8 — 18:27

「黃色經濟圈」由提倡至今都只係停留喺雛型狀態,只覆蓋中小企嘅餐廳、少量零售業,首間踏入網購事業嘅「光時」近日亦傳出難以經營嘅消息。雖然「黃色經濟圈」嘅潛力可能仲有好大,可持續性嘅發展方向包括上游產業鏈、黃店之間利用資訊科技整合、黃色虛擬貨幣嘅概念等等,但仍然遠遠未成氣候。不過港共政權以商經局邱騰華為首、建制打手、五毛、黨媒文匯大公,甚至中共官方媒體《人民日報》已經急不及待連日嚟大肆攻擊黃色經濟圈,其力道與對付「港獨」、「極端暴力份子」不遑多讓。

最令人奇怪嘅邏輯係,佢哋每一個嘅口吻都係「黃色經濟圈係自挖墳墓,畫地為牢,唔會成功」,但係同時間顯得非常緊張。大家都問一個問題:既然深信黃色經濟圈只有失敗一途,點解中共及其爪牙會不成比例地攻擊,氣急敗壞,欲除之而後快?

有人認為「黃色經濟圈」損害到香港嘅營商環境及經濟,所以要出手。但事實上宜家受影響嘅都只係中小企同個別連鎖經營餐廳品牌,而且政府坐擁無限資源,隨時可以推出傾斜藍店嘅政策彌補佢哋嘅損失。何況大商場受警暴接二連三在商場入執法嘅影響必定大於「黃色經濟圈」杯葛嘅效果;再者比起十四億人口嘅大陸市場,香港小小嘅幾百萬人市場實在係微不足道,加上大陸掌握大部份嘅供應鏈,在港嘅地產商、租舖等都牢牢掌握手上,中共擁有龐大嘅市場作為誘因,「紅色經濟圈」嘅規模同影響力遠遠大於「黃色經濟圈」,其擔心有點太過。更重要嘅係,中共與港共政權從來都唔會將小商店的經營困難視為施政方針理念及重點;只會以政治先行,其次就係大商家嘅利益,你有幾何會見到港府擔心小店做唔住去管理下啲商舖租金?

廣告

佢哋反應之大,係因為「黃色經濟圈」背後嘅意識形態觸碰咗中共核心嘅統戰手段,所以必需要扼殺於萌芽之時。

從「恩主思維」到「順民模式」

廣告

由九七回歸到宜家,中共一直都打造自己係香港嘅「恩主」嘅角色,因為有中共、有國家支持,香港先有今日嘅發展同繁榮。既然香港人嘅安逸富貴係國家所「賜」,香港人就有道德責任去服從,否則啲「恩賜」隨時可以收番,中共一直用威脅式嘅憂患意識去統戰香港人。呢種諗法係廿二年嚟一直慢慢滲入植根咗喺香港人嘅腦海,香港多屆政府配合宣傳,多年嚟嘅不斷對中共歌功頌德,刻意貶低香港自身嘅能力同貢獻,確立「恩主思維」,孕育「順民模式」。

98 年金融危機,中共已篡改歷史,指出當年係國家嘅大力幫助先可以擊退金融大鱷,事實上係港府動用外匯儲備迎擊大鱷;SARS 一役,明明疫症由大陸傳入,則改為中央為解救香港,不惜提供僅餘物資、協助以渡過難關;其後不斷引入自由行,美其名助香港旅遊零售業復甦,事實上將香港嘅零售業生態全面改變,變成香港因為國家嘅恩賜慷慨方可蓬勃發展;大陸資金(黑金)撐起、炒起整個香港樓市,幾多經紀靠住大陸客搵食;仲有保險業、銀行業、證券商、IPO、人民幣離岸中心,甚至係各行各業,都靠住北水養起好多香港人,全面構建「紅色經濟圈」,呢班係宜家無得食大陸條水嘅人就變成咗最堅實藍絲。呢啲手法美其名係「明益香港」,確立「恩主」地位,其實係要喺香港賺取外匯、為資金搵出路,一箭雙雕。

「黃色經濟圈」嘅崛起,令到香港人意識到生活上嘅好多嘢唔駛求之於外,只要香港人團結起嚟係可以擺脫「恩主」嘅操控,「香港人可以靠自己生存」嘅意識形態,根本性地顛覆咗呢套思維。進而意識到香港自身嘅重要性:香港對於中共嘅重要性,絕不亞於中共對於香港。呢種思想模式對於中共嘅極權統治與習總「造神」形象非常危險:一旦香港「黃色經濟圈」模式成功,呢種可以不靠中央嘅思想回流番大陸,喺一啲較為先進、民智較開嘅城市如廣州、上海紮根萌芽,對於中共可以係一個滅頂嘅大災難,所以黨媒先會用到「經濟港獨」呢啲咁極端嘅字眼去形容「黃色經濟圈」無限上綱,不著邊際。

毛澤東名言:「敵人反對的我們便要擁護,敵人擁護的我們就要反對」,對家嘅口誅筆伐係官方認證我們做對了事。「黃色經濟圈」正正就係香港人擺脫「恩主思維」,真正做到「光復香港」嘅不二法門。

發表意見