立場新聞 Stand News

黃藍是政見,經濟是務實

2019/12/17 — 19:16

網民設計的「米豬連」店舖標貼,以示該店舖支持抗爭運動。(網絡圖片)

網民設計的「米豬連」店舖標貼,以示該店舖支持抗爭運動。(網絡圖片)

喺經濟世界本身無分黃絲藍絲,成龍做動作片就係好睇過我做,好多傳統食店就係藍絲老細有手藝,吉野家個牛肉飯就係平過我地開間牛肉飯店,TVB 就係多人睇過我寫文,你第一件事就係要承認咗佢。你最終嘅目標係做得好過佢地,取得佢地嘅商品同技術,在此之前你要諗點樣用佢地嘅商品價值取利。

第二件事就係經濟本身目標係要賺錢。如果咩經濟圈係要大家免費或者極廉價提供商品或者服務,咁就唔叫經濟,咁叫救濟。經濟圈嘅目標係令所有參與者互惠唔係做善堂。

第三,經濟係要可持續的,成本架構條數本身要合理,靠一時嘅風潮或者短期性嘅嘢造就嘅銷售,或者用義工或不正常友情價去架構嘅成本,條數一開始就係假的。義工無可能同你做十年八年,如果係你唔係搞緊經濟係搞緊邪教。你想優惠自己人,可以收正價再捐返出去或貸款返比對方,但你唔可以亂郁個價錢破壞大家對價錢嘅認知。

廣告

經濟圈建立係講緊點樣從大局上變得有利政治。

我舉「拉麵」做例子,傳統日本人食米飯,對小麥依賴係少,但係美國二戰後同日本結盟後,經濟上就想更結合。而美國輸出嘅係小麥,日本就慢慢改變飲食習慣,開始盛行拉麵,因為咁就會由消費米飯變小麥,而使日美經濟更結合。

廣告

咁你話黃色經濟圈,我當核心係「反對中資強化港資」,咁樣如果講緊食物嘅話,點樣減少對中資依賴呢?就係宣揚改變大眾嘅飲食同消費習慣。

咁第一件事係你要睇清楚,香港對中國輸入輸出嘅商品,結構係點,有咩可以放棄,有咩可以有代替品。例如豬肉雞肉,可唔可以輸入臺灣豬肉同雞肉,而唔食中國輸入? 如果係咁嘅話,係咪應該整個臺灣品牌嘅午餐肉去代替梅林牌,然後再說服茶餐廳改用新品牌?

又講食菜,香港本地嘅農地其實可以種到蘿蔔,而且成本唔見得高過大陸,咁係咪應該推廣多啲食本地蘿蔔,做相關料理,例如食蘿蔔糕?

有人話黃藍係政見黑白係良知,加多句,經濟係務實。

 

(標題為編輯所擬)

作者 Facebook

發表意見