立場新聞 Stand News

點解林鄭要走到今日依個地步?

2020/2/5 — 9:18

作者製圖

作者製圖

今日香港市面一片死城,香港首宗武漢肺炎的死亡個案亦不幸出現。到而家林鄭仍然堅持唔封關,今日仲話要慳返口罩唔准公務員同事戴口罩,究竟佢個腦諗咩?係唔係真係想攬炒?

書生歸納出幾個原因分析點解林鄭要走到今日依個地步。

1. 任何政權都需要人民的認受性,先有合法性統治,否則社會一定會唔穩定,政府亦難以施政。依點即使中共都唔例外,中共近幾年的認受性完全來自於經濟上揚,多數中產階級賣賬,少數反對者則予以嚴厲打壓,中共政權的穩定性先維持至今。

廣告

然而,林鄭在過去半年多已經失盡民心。政治唔得、經濟又唔得。林鄭曾經將香港經濟問題歸納於反送中運動,希望可以轉移視線,用經濟換民心,但可惜民間社會除左商界外大多都唔賣賬。而今次武漢肺炎幾乎俾左林鄭致命的一撃。

經濟分階級,疾病唔會。疫情一黎,所有人都受罪。林鄭本想反送中運動開始冷卻,重施上屆政府的故技,用「民生」換「民心」,但武漢肺炎到來,林鄭連最後一道籌碼都失去埋。佢無力防疫抗疫,做事慢半拍,已經係眾所周知既事,係依個情況下,林鄭唯一可以保住權力的來源就係中共的認受性,所以林鄭為了她自己揣摩的「中共面子」,不惜犧牲香港人的健康性命,都要堅持唔封關。

廣告

大家可能唔知,香港而家既處境,甚至比內地更危險。因為近一年中國經濟開始放緩,習近平政府必須在今次疫情上盡最大力量去壓止疫情,否則習就要面對「疫症爆發+經濟唔好」的兩重困境。但,林鄭政府完全無依個問題。甚至搞爛民生都唔影響佢執政地位,因為林鄭既權力來源完全來自於中央政府和三萬警察鷹犬。所以佢願意放心去博,賭「維護中央面子」果邊會贏。

2. 當然,林鄭唔係完全無顧忌,但剛好佢需要顧忌果邊,係唔支持封關。而依班人就係來自內地的權貴同商家。如果全面封關,依班想落黎香港避難、洗錢和醫治的人就無法再落黎香港。而且強制的檢疫或隔離中心可能會透露部分內地權貴高官既身份,而依班內地高官返上去有可能會被秋後算帳,所以書生猜測林鄭早期堅持出入關口自己填寫健康申報表,依個亦係其中一個原因。

林鄭只要保住香港的金融地位,繼續將香港傳統精英洗走,讓內地權貴派遣聽教聽話的人委任為香港高官和議員(所以點解立法會會有啲好似蔣麗芸咁既人可以做議員),令到依班權貴係香港的政經地位更加鞏固,咁林鄭既任務就已經完成。對於香港人的福祉,林鄭根本唔 CARE。係今次疫情上,同樣林鄭 CARE 既只有依班內地權貴需唔需要落黎香港。

3. 林鄭昨日強調唔會向醫護罷工依啲「極端手段」妥協,態度如同面對反送中運動的訴求一樣,不論和理非定勇武,不論立良言建議還是批評言論,林鄭一概用「敵我邏輯」理解,只要敵人擁護,佢就反對。林鄭知道如果佢一「妥協」全面封關,就會自打嘴巴承認過去半年多既管治手段係錯誤。佢唔容許自己認錯,甚至唔容許佢轄下的團隊認錯(包括一眾高官同警察)。

所以要林鄭妥協係無可能。即使林鄭最後真係答應全面封關(雖然依個機會唔高,除非已妥善安排好 (2) 入面既高官權貴),亦會繼續指無關罷工的訴求,甚至可斷定佢必定會秋後算賬,包括繼續用過去半年的手段抹黑罷工的醫護,必要時繼續修改關於香港的醫療制度和條例,引進大灣區或內地的醫護落黎香港,加快中港融合,實現大灣區一體。

4. 基於 (1)-(3) ,香港人繼續指望政府高層良心發現或醫管局高層撐罷工,只會願望落空。本來,林鄭若然係有強大的政治手腕同仲有一絲「要為香港做啲事」既「初心」,起碼可以好似澳門政府咁用行政手段解決 (2) 的問題。

但係,林鄭本人既無政治手腕,佢亦馴養左一班為利是圖的無能之輩擔任高職,導致早已病入膏肓的香港最後一道防線都被摧毀。大家可以想像「毅進警察」一唔做警察,佢地就極難係香港職場搵食;大家可以想像現在的許多高官建制議員一脫離政府,就會變成一無是處「廢中廢老」。區議會一役已證明這點,中央同港府要晒一大筆錢養依班今屆輸左既「廢人」。

所以依個政府係幾咁荒謬,自己無能,卻不斷抹黑大學生、精英和醫護都係「廢青」,係社會上係「NO STAKE」,劣幣驅良幣,正正係香港走向愈來愈差的原因。

書生曾記得有政治學者提及現今的香港政體係最糟糕,因為它既沒有民主的正當性,同時又沒有專制的效率,它永遠受制於他人。主權移交 23 年,只係證明左依個政體最多維持 23 年就會爆煲。

發表意見