立場新聞 Stand News

13 歲的夏天

2020/5/11 — 13:27

13 歲,大概係就讀緊中二嘅歲數。昨日見到呢位被捕帶走(但無告到任何罪名)嘅學生記者,我就不禁喺度諗:到底我 13 歲時係做緊咩?

可能我連咩係記者,記者有咩天職都唔知。連 2006 年嘅香港發生咩事,我都唔知。我嘅世界只有學校、作業、網上遊戲,以及屋邨附近嘅遊樂場。

現今嘅香港,係逼迫新一代急速成長。試想一吓我地自己仲係初中時,當老師話要見家長已經驚到震,班黑警仲要威脅個學生記者,話下次見到佢會告埋佢阿媽,係會對佢造成幾大陰影同傷害?佢能夠行到出嚟,接受到記者訪問,即使流淚,已經係萬分堅強。

廣告

其實佢係非常之犀利嘅學生記者,能夠喺咁嘅年紀有咁嘅認知、視野、決心,我真心佩服,自愧不如。

再加上有一個更加好嘅媽媽,放手俾個小朋友去為自己相信嘅事情冒險,並且為佢辯護,喺母親節時去接阿仔出警署都對佢百分信任同愛護,我相信呢位咁出色嘅小朋友肯定有一個好好嘅家庭教育,以及來自家人無條件嘅愛。

廣告

昨日係母親節,我希望各位都能夠鼓勵、支持呢位媽媽,去同佢講:你嘅兒子十分出色,係香港人嘅榜樣。

但同時,我都希望我地嘅下一代唔洗喺咁嚴峻嘅環境奉獻自己,咁快去接觸世界最邪惡、缺乏保護嘅一面。我地呢一輩,係要繼續做多啲,直至我地下一代都可以同我地 13 歲時一樣,去 hea 去玩,放心探索世界,唔洗諗被捕被控、被自蹤、被自殺。

光復香港嘅路雖然遙遠,但我地一定要行完。

 

作者 Facebook

發表意見