立場新聞 Stand News

2 月 13 日中共官場大變的一點啟示

2020/2/13 — 23:17

2020 年 2 月 13 日,中共官場發生大變,分別撤換咗湖北武漢嘅幾個地方大員港澳辦主任張曉明,引起廣泛推測同討論,最緊要嘅係,香港人應該點解讀同應對:

1. 同日撤換湖北省委書記、武漢市委書記、武漢市長,接任嘅人選並唔重要,最重要嘅係時機。

2. 早兩日 Reuters(係,又係 Reuters)透露,習近平喺全國抗疫之際,指出有啲措施太過,會損害到中國嘅經濟,掉番轉頭諗,即係話中國經濟面臨好大困境。

廣告

3. 一邊講疫情將會受控,確診數字穩定回落,但係喺 2 月 13 日,即係撤換湖北武漢多名地方大吏嘅單日激增 14,986 確診新症,單日最大增幅。表面上講嘅係因為轉咗定義,加咗臨床確診個案。但係疫症數字係由官方嚴密控制,今次揀喺同一日大爆發,同一日轉定義,同一日撤換官員,係政治考慮同計算,唔係偶然。

4. 張曉明被撤換,由副國級「政協副主席兼秘書長」夏寶龍接任港澳辦主任,更重要嘅係中聯辦主任駱惠寧,兼任港澳辦副主任,即係形成港澳辦直接指揮中聯辦嘅架構,由國家領導人指揮港澳事務。

廣告

5. 同樣,時機考慮最緊要,點解咁多時間唔郁張曉明,要喺武漢肺炎影響全國政經穩定嘅時候先郁手?

6. 中共喺武漢肺炎席捲全國,習近平自顧不暇,分身乏術,本應無暇顧及香港,相比喺上年國新辦同外交部日日向香港發炮嘅情況,中共最近嘅注意力根本唔喺香港,而喺處理緊早已蔓延全國嘅疫情,所以係林奠係封唔封關,中港區隔咁敏感嘅決定上面,都無中央大員出過聲。

7. 中共一貫作風,無論個官員幾錯都好,單嘢一日未搞掂,撤換或者處分都係對民意或者外在壓力示弱嘅表現,所以所有嘅清算都係秋後,董建華如是,689 如是,林奠仍然坐喺度如是。所以喺肺炎疫情仲係如火如荼、香港局勢仲係越嚟越唔穩定之際換人,係一個極不尋常嘅舉措。

8. 唯一嘅解釋就係習近平無論喺黨內黨外、國內國外都受到極大嘅壓力,動搖到佢本身嘅統治地位甚至喺中共繼續執政嘅根基,因而作出斬纜、止蝕之舉,希望將一切嘅責任留喺地方而唔上身。

9. 黨內嘅權力鬥爭一定更趨白熱化,隨住中國經濟下滑,外有美國貿易戰嘅條款;國內疫情不受控,內地人民對李文亮之死嘅憤怒仍在,疫情若果繼續蔓延,有機會攬炒到成個中共有覆亡嘅可能。穩住疫情,再穩住經濟係習近平翻盤嘅唯一出路。

10. 兩日前,美國國務院宣佈,批准留喺香港嘅美國政府官員及其家人離開香港。呢個致命性嘅決定,直接影響在港嘅美資取向,亦係美國喺香港撤僑撤資嘅第一步,對中共作出直接警告。

11. 中國喺經濟下滑、銀根短缺嘅情況下,極需要香港作為外匯集資嘅缺口,香港股市 IPO 對中共而言,係唯一嘅透氣閥,如果香港經濟同集資一樣被攬炒,內外夾攻下,中共將會被堵死唯一求生門。

12. 咁先解釋到點解要係兵兇戰危嘅情況下撤張曉明嘅職,要由更高階嘅國家領導人直接操盤。

13. 根據同一個思路推測,為穩定香港局勢同經濟,等香港繼續發揮賺取外匯嘅角色,更多維穩或者妥協嘅手段會陸續出台。

14. 對於中共嚟講,文官比武官更加 disposable,林奠及其三司十三局內閣嘅政治前途已死,如果換一個內閣,換一批扯線公仔可以「止蝕」,何樂而不為?

15. 重點係,一直掌控住香港權力核心嘅早已唔係林奠,而係呢排轉趨低調嘅 PK 鄧。只要掌控到呢個軍政府之首及其武裝組織,就真正掌控咗香港嘅局勢。唔好唔記得 PK 鄧上任之初係親自去北京拜會公安部部長趙克志

16. 香港宜家係由軍政府操控係有理有據嘅,大家諗下,邊個部門先有無限量嘅 CSI 口罩供應?邊個部門有最高級別嘅保護裝置?邊個部門唔駛去守隔離營,反而係由童軍、民安隊、公務員義務執行隔離政策?

17. 好多人都推測由夏寶龍「拆十字架」嘅往績嚟推斷中共對港政策會更加強硬。其實唔駛諗咁多,換咩人都好,就算換個周圍起佛寺、教堂嘅人做港澳辦主任個結果只有一個。

18. 無論係駱惠寧又好、夏寶龍、林奠、PK 鄧都好,佢哋都只係中共嘅棋子傀儡,點換都好,都只係換咗用唔同嘅棋嚟進攻,喺背手操控嘅棋手不變之下,最終目的都只係「將軍」同全面接管香港,要香港繼續成為一隻乖乖地聽話又會同佢生金蛋嘅鵝。

19. 所以喺中共無發生重大質變嘅情況下,我哋可以假定無論點換人、表面點妥協都好,都係戰略上嘅改變,而唔係全面接管香港嘅政策有改變。

20. 咁作為香港人係咪無希望?正正唔係。習近平嘅陣前變陣,反映咗即使係一個表面極度獨裁嘅政權都唔可以完全掌控一切,唔可能係無孔不入嘅鐵皮一塊,對於海內外嘅壓力、輿論壓力、人民反抗聲音,仍然會係體制外動搖到獨裁政權。

21. 香港人要做嘅,就係無論佢點換人、點使懷柔手段,即使林奠暨三司十三局會同行政會議全數鞠躬下台,即使中央捐助香港十億口罩都好,抗爭意志唔可以退縮,要繼續係海內外繼續構成壓力,全面與政權缺裂與不合作,繼續增加中共所有代理人管治香港嘅成本,直至中共出現重大質變。

22. 香港喺目前嘅局勢下,有空前嘅重要性同影響力,更加要利用好自己作為中共「春袋」嘅優勢,爭取最大嘅討價還價成本,回到初心,「五大訴求,缺一不可」,光復香港,在此一疫。

發表意見