立場新聞 Stand News

2020 年 1 月 16 日,係香港正式進入軍政府管治嘅標誌

2020/1/17 — 16:22

鄧炳強

鄧炳強

噚日一日之間發生咗幾件事,每件事都係環環相扣:

  1. 朝早林奠到立法會接受質詢,明言「不能夠接受香港過去七個月有警暴嘅說法」;
  2. 下晝 PK 鄧到中西區區議會會見議員,指出「對警隊嘅指控係情緒嘅宣洩而非事實,係基於假新聞嘅抹黑」,自己更係正義嘅化身;
  3. 區議會會議上提出譴責鄧炳強動議,當區民政專員連同所有在場公務離因為不同意該議案離場,公務員事務局其後發帖支持;
  4. 夜晚監警會指出因為十二月有市民入稟高院對於監警會嘅權責提出司法覆核,所以首階段報告未能公開,直至司法覆核案件結束;
  5. 林奠深夜發文讚揚 PK 鄧「不亢不卑,據理力爭」,係「部門首長」嘅榜樣。

一日之內,好明顯睇到林奠堅定不移咁為警隊背書,落實佢所講嘅「除咗三萬名警員,我哋咩都無」,不惜將自己嘅政治生命(甚至身家性命)連同政府公務員一次過同警隊綑綁埋一齊,放棄咗所有嘅「公信力」、「事實根據」、「政治道德」。而林奠宜家嘅意識形態,唔係一朝一日,係七個月以嚟將自己逐漸推向極端:

由去年六月至今七個月,「警暴」一直都係成個運動嘅核心同維繫成個運動嘅燃料,林奠政府多番回應社會對「警暴」嘅質疑,回顧番咁耐以嚟林奠對於調查警暴同對監警會嘅態度轉變:

廣告
  1. 當初林奠指出要先靠「行之有效嘅獨立機構監警會去審視警方執法問題」,再「考慮成立獨立調查委員會」,嗰陣仲有嘗試面對公眾對警隊執法嘅質疑;
  2. 其後市民質疑監警會缺乏公信力,所以林奠邀請「海外專家小組審視修例風波」,同時加入兩名建制委員:余黎青萍同林定國,話會增加人手加快工作,為監警會塗脂抹粉,嘗試去暫時撫平民憤同國際聲音;
  3. 可惜做完一大場大龍鳳後,海外專家小組辭任監警會,因為表明監警會無足夠嘅權力去進行咁大規模嘅審視,監警會連基本嘅公信力都失去;嗰陣就提出「獨立檢討委員會」希望以「語言偽術」矇混過關,同時,PK 鄧表明反對一切針對警隊嘅獨立調查
  4. 到近日首階段報告嘅內容漏出,指出警方喺 612 等嘅幾個流於表面嘅執法問題,並建議政府成立獨立調查委員會,市民大眾就有「連監警會都要反政府」嘅聲音;
  5. 到一月十六日林奠索性講「不能夠接受香港有『警暴』嘅說法」;同日晚,首階段宣告不見天日。

呢個過程,代表 PK 鄧為首嘅勢力不斷膨脹,林奠受制於警隊嘅情況越嚟越明顯,到咗宜家,連監警會場戲都唔做,索性喺未有調查、未有任何報告之前,政府已經連同公務員、警隊喺兩級議會嘅公開宣告:「無警暴」,警方執法係完美無睱,不容許任何挑戰,否則就係情緒宣洩,不實指控,存心抹黑。呢種未審先判嘅態度,既定立場鮮明,連質疑嘅聲音都要扼殺,完全無視大部份民意,只用錢嚟買起六十歲以上嘅民心。

當全世界包括本地媒體、國際大報、人權組織都睇到有警暴嘅存在,至少都睇到有調查嘅必要,連親建制嘅監警會都頂唔順壓力同仲有僅餘嘅理性,首階段報告希望用最溫和嘅言語向市民交代。但係林奠選擇夥同 PK 鄧全面與事實割裂;最可怕嘅係,連一向所謂「政治中立」嘅公務員團體都被綁架,地區民政專員因為唔同意譴責議案而離席,根本違反咗所謂嘅「政治中立」,等同葬送咗公務員幾十年嚟建立高效廉潔嘅形象。

廣告

林奠嘅政治生涯已經同 PK 鄧緊接咁扣連喺一齊,不惜用盡成個政府嘅公信力、公務員團隊嘅優秀制度、過萬億嘅庫房,都要確保警隊不被查、不被起訴、不被公審,當然呢個指令肯定獲得更高層嘅背書。從 PK 鄧到北京述職開始,警務處長先係香港權力核心,2020 年 1 月 16 日係標誌住香港進入軍政府管治。換句說講,林奠在位一日,警暴都不可能被清算;PK 鄧一日在位,林奠以及其港共政權只可成為佢嘅附庸傀儡。

發表意見