立場新聞 Stand News

2020 指鹿為馬小小說

2020/7/11 — 14:02

【1】
2020 指鹿為馬盃賽事。
三隻鹿自動入閘。
三匹馬要簽確認書,確認自己係鹿才可以入閘。
1 號馬唔肯簽確認書,入唔到閘,被馬迷屌放棄機會。
2 號馬簽確認書入閘,被馬迷屌冇骨氣,唔堅持原則。
3 號馬唔簽都入唔到閘,但有 Plan B 替身馬簽紙入閘參賽。
賽事如期進行,結果 2 號馬勝出,但經董事研判,即時 DQ,因為佢唔係真鹿。
完!


【2】
國安法實施後,經濟繁榮,地產蓬勃。
啟宗集團樓盤陸續推出。
一日,國安封鎖集團總部,拘捕啟宗,即時送中審訊。
原因係集團地產廣告宣傳口號:「傲視香港 獨立洋房」
完!


【3】
國安法實施後,暴力不再,獲不反對通知書的和平遊行集會都和平地進行。
6.12 週年遊行路線中,花店門口,男子買花準備送給太太慶祝結婚週年紀念。花店老闆:「遊行喎,唔驚吖?」
男子:「唔犯法使咩驚,我又唔支持港獨,又冇叫光復香港。」
話口未完,數名便衣國安將男子按在地上拘捕。
男子手上花束心意卡寫著:「520  1314」。
完!

廣告


【4】
城中富豪家人圍在病榻送終,逐個跟他話別。
「放心去啦,我哋會好好照顧自己。」
「唔使擔心我哋,安心走啦。」
……
富豪已無意識,呼吸轉慢但遲遲不捨。
唔知邊個只顧掃手機睇新聞,突然叫:「國安嚟咗。」
富豪瞪眼一下,馬上走了!
完!


【5】
立法會通過中小學課室安裝 CCTV。
志豪教通識課,又完成一日課堂,接到太太電話。
「今晚去香港定九龍食飯?」
「香港」志豪答。
「send 個地址我。」太太電話中說:「我依家喺元朗買老婆餅,有新獨立包裝㗎,好冇呀?」
「獨立好。」
「好啦,買埋嘢過嚟。」
志豪出班房門口,駐校國安馬上給他戴上手扣。
CCTV 只收到志豪說話, 收錄不到電話另外一方。
完!

廣告


【6】
教育領域排毒,每堂都有視學官監課。
某老師講授宋詞,是日讀到陸游。
視學官聽老師朗讀詩詞後,馬上召駐校國安拘捕老師。
學生不滿,質問所犯何罪。
視學官怒目瞪眼:「佢啱啱講:『黃絲北定中原』,仲唔係煽動顛覆國家政權?」
完!
(陸游七言絕句:「死去原知萬事空,但悲不見九州同,王師北定中原日,家祭毋忘告乃翁。」)


【7】
某學生正在留堂,家長趕到學校。
「點解罰我個仔?」
老師:「佢喺街外講粗口。按校規留堂罰抄。」
家長:「關你鬼事,我個仔又唔係你學校嘅學生。」
老師:「受國安法啟發,我哋修改校規,任何校外人士觸犯我校校規,一進入本校範圍,即予扣留懲罰。」
家長:「屌你老母!」
完!


【8】
長老打開辦公室大門,幫任何人副簽米國海外公民護照。
有藍絲到來求簽,長老要求唱國歌才簽。
藍絲唱:「起來……」
「叮!唱錯哂。」
長老趕藍絲走。
藍絲不得其解。
苦苦追查下,得知長老屬黃,國歌另有所指。
藍絲於是苦練,再到長老室唱:「何以……」
未唱完,國安掩至……
完!


【9】
問米婆冇生意,終於等到一個氣急敗壞的男人。
問米婆:「你嚟問乜嘢?」
男人:「香港民意研究所俾差佬搜,我嚟問祖先聽日仲去唔去投票。」
問米婆撒米作法,一輪功架後,拍案而起:
「你有冇搞錯,咁重要嘅嘢走嚟問米都唔去問國安?」
完!


【10】
警方搜查過民研辦公室電腦系統,一無所獲,向國安公署匯報。
「查不到什麼,他們的系統都在雲上。」
「有多難?你不知祖國科技有多先進嗎?」
專員綻笑,馬上直撥電話上京:「X 主任,勞煩你將兩會時期射上北京上空製造藍天的導彈射到香港,將那些雲打掉。」
完!

發表意見